Hópur heimsóknavina hjá Rauða krossinum í Hafnarfirði heimsækir hælisleitendur einu sinni í viku.

Hælisleitendur búa við mikla félagslega einangrun og eru undir miklu andlegu álagi. Hópurinn hefur það að markmiði að rjúfa þessa einangrun og létta fólki lífið og biðina á meðan á málsmeðferð stendur. Þrír til fjórir heimsóknarvinir heimsækja hælisleitendur hverju sinni. Einnig sér hópur sjálfboðaliða um félagsstarf fyrir hælisleitendur.

Lögfræðinemar og lögfræðingar starfa sem réttindagæslufulltrúar Rauða krossins með hælisleitendum á fyrstu stigum málsmeðferðar þegar hælisleitendur eiga ekki rétt á lögmannsaðstoð á kostnað ríkisins. Réttindagæslufulltrúi fylgir hverju máli frá upphafi til enda. Haldin eru sérstök undirbúningsnámskeið fyrir réttindagæslufulltrúa sem valdir eru til þátttöku í verkefninu að undangegnum viðtölum.