• FF-Gbr-jan-2018

Fjölbreytt verkefni hjá Rauða krossinum í Hafnarfirði og Garðabæ

15. janúar 2018

Það er fjölbreytt starf sem fer fram hjá Rauða krossinum í Hafnarfirði og Garðabæ um þessar mundir. Deildin sér um félagsstarf fyrir hælisleitendur á öllu höfuðborgarsvæðinu og skipuleggur í samvinnu við sjálfboðaliða og hælisleitendur margvíslega viðburði eins og opið hús, konumorgna, tungumálakennslu og heimsóknir.
Heimanámsaðstoð fyrir börn í 1-10 bekk er í boði einu sinni í viku á bókasafninu í Hafnarfirði og Garðabæ og í Hvaleyrarskóla.  Heimsóknavinir eru starfandi í Hafnarfirði, Garðabæ og Álftanesi. Föt sem framlag prjónahópar eru vikulega í Hafnarfirði og hálfsmánaðarlega í Garðabæ. Karlar í skúrum er nýtt verkefni þar sem karlmenn hafa möguleika á að hittast, spjalla og vinna að ýmsum sameiginlegum verkefnum sem þeir sjálfir ákveða. 
Annað nýtt verkefni sem er í þróun heitir Tækifæri sem er fyrir einstaklinga yngri en 30 ára sem af einhverjum ástæðum eru ekki á vinnumarkaði eða í námi. Verkefnið byggir á að hver einstaklingur setji sér markmið og leitist við að ná þeim. Verkefnið er ætlað að auka sjálfstraust og valdefla þátttakendur og koma í veg fyrir félagslega einangrun. 
Hjá deildinni eru einnig haldin ýmis námskeið, svo sem skyndihjálparnámskeið, börn og umhverfi, námskeið í sálrænum stuðningi og fleira. 

Viltu gerast sjálfboðaliði?
Starf Rauða krossins er borið uppi af sjálfboðaliðum.  Við erum alltaf að leita að fleirum til að taka þátt í verkefnunum okkar. 
Hafðu samband ef þú hefur áhuga á að leggja okkur lið.  Sendu okkur tölvupóst: hafnarfjordur@redcross.is  eða hringdu í síma: 570 4221.