Nemendur í áfanganum Félagsfræði þróunarlanda, sem er kenndur í Menntaskólanum í Kópavogi, komu fyrir stuttu í sjálfboðamiðstöð Kópavogsdeildar og fengu kynningu á hjálparstarfi Rauða krossins. Nína Helgadóttir fræddi nemendurna og kennarann þeirra, Hjördísi Einarsdóttur, um hjálparstarf Rauða krossins í kjölfar jarðskjálftans í Pakistan 8. október síðastliðinn.

Sú hugmynd hefur nú kviknað meðal nemenda MK að halda tónleika 29. desember til styrktar fórnarlömbum jarðskjálftans í Pakistan. Tónleikarnir verða haldnir í Austurbæ kl. 21 og miðaverð er 2.500 kr. Meðal listamanna sem koma fram eru: Jagúar, Ragnheiður Gröndal, Millarnir ásamt Páli Óskari og Bogomil Font, Stebbi og Eyvi, Leaves, Ske, Dúndurfréttir og Brynhildur Guðjónsdóttir. Miðar fást í Austurbæ og á midi.is.

Tónleikarnir eru haldnir í samtarfi við Kópavogsdeild Rauða krossins og mun allur ágóði af tónleikunum renna í hjálparstarf Rauða krossins á hamfarasvæðunum.

Sjálfboðaliðar Kópavogsdeildar skipulögðu í vikunni aðventuhátíð í hjúkrunarheimilinu Sunnuhlíð. Samkomusalurinn var þéttsetinn á hátíðinni enda öllum vistmönnum Sunnuhlíðar boðið auk þess sem nokkrir aðstandendur tóku þátt.

Sjálfboðaliðarnir, sem allir eru úr hópi heimsóknavina deildarinnar, stjórnuðu fjöldasöng á jólalögum í bland við önnur lög. Undirspilið var ýmist frá harmonikku, gítar eða munnhörpu.

Nokkrir af sjálfboðaliðunum höfðu tekið með sér heimalagaðar pönnukökur og annað góðgæti og sú viðbót við kaffiveitingarnar vakti lukku.

Sorpa afhenti athvörfunum Dvöl, Læk og Vin styrk í ferðasjóð að upphæð 70.000 kr. fyrir hvert athvarf. Sorpa veitir styrkinn í stað þess að senda viðskiptavinum sínum jólakort í ár. Athvörfin þrjú eru athvörf Rauða krossins fyrir geðfatlaða á höfuðborgarsvæðinu því auk Dvalar í Kópavogi er Vin í Reykjavík og Lækur í Hafnarfirði.

Ferðalög eru kærkomin upplyfting fyrir gesti athvarfanna sem margir treysta sér ekki í ferðalög upp á eigin spýtur. Í öllum athvörfunum er safnað peningum í sérstaka ferðasjóði sem nýttir eru til ferðalaga innanlands sem utan.

Fimm ára börn á leikskólanum Núpi komu færandi hendi í sjálfboðamiðstöð Kópavogsdeildar í vikunni. Börnin höfðu safnað fatnaði til styrktar Rauða krossinum í tengslum við fræðsluefnið „Hjálpfús heimsækir leikskólann“ sem notað er á Núpi. Fræðsluefnið inniheldur sögur sem sagðar eru af Rauða kross stráknum Hjálpfúsi í formi fingur-brúðu. Markmið námsefnisins er að kenna nemendum hversu mikilvægt það er að rétta fólki hjálparhönd þegar eitthvað bjátar á.

Börnin á Núpi söfnuðu fötum undir yfirskriftinni „Að gleðja um jól“ og vona að fötin nýtist til að gleðja þá sem á þurfa að halda. Í heimsókninni í sjálfboðamiðstöðina fengu börnin afhent eintak af geisladisknum „Úr vísnabók heimsins“ sem hefur verið sendur til allra leikskóla í Kópavogi. Geisladiskinn er hægt að nota í tengslum við námsefnið um Hjálpfús sem allir leikskólar á landinu fengu að gjöf í fyrra frá Rauða krossi Íslands.

Sjálfboðaliðar Kópavogsdeildar fjölmenntu á fögnuð deildarinnar í tilefni alþjóðadags sjálfboðaliðans. Á meðan mest var voru um fimmtíu sjálfboðaliðar og gestir þeirra samankomnir í sjálfboðamiðstöðinni.

Sjálfboðaliðar úr fjölbreyttum verkefnum komu saman, svo sem heimsóknavinir sem heimsækja fólk sem býr við einsemd og einangrun, sjálfboðaliðar í Dvöl, athvarfi fyrir geðfatlaða, sjálfboðaliðar sem starfa að neyðarvörnum, öflugar hannyrðakonur í verkefninu Föt sem framlag, stjórnarmenn deildarinnar og sjálfboðaliðar í starfi með ungum innflytjendum.

Þrjár bekkjarsystur úr 2.J. í Kársnesskóla söfnuðu flöskum og dósum að andvirði 855 kr. og færðu Kópavogsdeild Rauða krossins. Þetta voru þær Margrét Kristín Kristjánsdóttir, Ósk Jóhannesdóttir og Ósk Hind Ómarsdóttir.

Með söfnuninni styrkja stelpurnar börn í neyð í gegnum verkefni Rauða krossins erlendis. Stelpurnar fundu upp á því sjálfar að safna fyrir Rauða krossinn og nutu dyggrar aðstoðar nágranna sinna sem lögðu þeim lið.

Í tilefni alþjóðadags sjálfboðaliðans 5. desember munu sjálfboðaliðar Kópavogsdeildar koma saman í sjálfboðamiðstöðinni Hamraborg 11 og gera sér glaðan dag þriðjudaginn 6. desember kl. 19.30-21. Léttar veitingar verða á boðstólnum með jólalegu ívafi. Sjálfboðaliðar deildarinnar eru hvattir til að fjölmenna og taka gesti með sér.

Dagskrá:
• Þráinn Bertelsson les upp úr nýjustu bók sinni Valkyrjur.
• Oddný Sturludóttir, einn af höfundum Dísar og þýðandi bókarinnar Móðir í hjáverkum, flytur erindið „Jólympíuleikar“ um jólahald Íslendinga.
• Vallargerðisbræður flytja nokkur lög. Vallargerðisbræður er karlakvartett skipaður 17 ára piltum sem voru saman í skólakór Kársness.

Nemendur Fjölsmiðjunnar sóttu nýverið námskeið í skyndihjálp í boði Kópavogsdeildar Rauða krossins. Á námskeiðinu lærðu nemendurnir grunnfærni í að beita skyndihjálp, endurlífgun og sálrænum stuðningi í neyðartilvikum. Nemendurnir öðluðustu auk þess færni í að meta einkenni algengra sjúkdóma og áverka. Á námskeiðinu voru flestir að fræðast um skyndihjálp í fyrsta sinn og öðlast þekkingu sem eykur öryggi þeirra og annarra í starfi sem og daglegu lífi.

Fjölsmiðjan, sem staðsett er í Kópavogi, er mennta- og verkþjálfunarsetur fyrir fólk á aldrinum 16-24 ára sem ekki hefur náð að fóta sig í námi eða á vinnumarkaði.

Fjórir vinir og bekkjarfélagar úr Kópavogsskóla héldu tombólu fyrir utan verslunina Nóatún í Hamraborg og söfnuðu alls 4.850 kr. fyrir Rauða kross Íslands. Þetta voru þeir Breki Barkarson, Elmar Tryggvi Hansen, Jón Ingi Þorgeirsson og Jón Veigar Kristjánsson.

Strákarnir voru áhugasamir um Rauða krossinn og komu aftur í sjálfboðamiðstöð Kópavogsdeildar til að taka þátt í starfi með ungum innflytjendum sem fer fram á miðvikudögum kl. 14-15.30.

Nemendur í bekknum 2.S.S. í Hjallaskóla afhentu Rauða krossi Íslands afrakstur af fjársöfnun sinni fyrir bágstödd börn. Söfnunarfénu verður varið í stuðning við börn í Sri Lanka. Hugmyndin að söfnuninni varð til í tíma í samfélagsfræði þegar nemendurnir voru að læra um mismunandi lífskjör og hvernig væri hægt að hjálpa öðrum.

Krakkarnir söfnuðu alls 11.057 kr. með fjölbreyttum hætti, svo sem með því að safna flöskum og dósum, halda tombólur og einn nemandinn gaf hluta af peningum sem hann hafði nýlega fengið í afmælisgjöf. Kennslustundir í samfélagsfræði og kristinfræði voru nýttar undir söfnunina og fræðslu henni tengdri en þar að auki urðu stærðfræðitímarnir mjög vinsælir þegar þeir voru nýttir í flokkun og talningu á drykkjarílátum sem höfðu safnast.

Streita, geðsjúkdómar og svefnvenjur voru á meðal þess sem rætt var um á mánudagskvöldið þegar sjálfboðaliðar, gestir og starfsfólk Dvalar, Lækjar og Vinjar hittust í húsakynnum Reykjavíkurdeildar Rauða kross Íslands.

Rauði krossinn rekur eins og kunnugt er þrjú athvörf fyrir geðfatlaða á höfuðborgarsvæðinu: Dvöl í Kópavogi, Læk Hafnarfirði og Vin í Reykjavík. Markmiðið með rekstrinum er að rjúfa félagslega einangrun geðfatlaðra og styrkja með samneyti við aðra andlega og líkamlega heilsu. Þar sem athvörfin eru þrjú á höfuðborgarsvæðinu þykir tilvalið að standa að sameiginlegum fræðslukvöldum og frumraunin var nú í vikunni.

Gestir athvarfanna höfðu gert veggspjöld um starfsemi athvarfanna sem hengd voru upp og því næst kynntu gestir og sjálfboðaliðar starfsemina á hverjum stað.

Fjórar vinkonur söfnuðu alls 3.500 kr. fyrir Rauða krossinn með því að afhenda ágóðann af flöskum og dósum sem þær höfðu safnað meðal íbúa í Smárahverfi. Þetta voru þær Eygló Dögg Ólafsdóttir, Sólveig Huld Sveinsdóttir, Arndís Lea Ásbjörnsdóttir og Sigrún Sunna Guðmundsdóttir.

Stúlkurnar höfðu búið til lag um sólina, tunglið og norðurljósin sem þær sungu fyrir fólkið í hverfinu og einnig þegar þær komu í sjálfboðamiðstöð Kópavogsdeildar Rauða krossins.

Fjölmargir sjálfboðaliðar Kópavogsdeildar sáu sýninguna Woyzeck í síðustu viku í boði leikhópsins Vesturports. Sýningin er sýnd á fjölum Borgarleikhússins þessa dagana við góðar undirtektir. Fyrir utan frábæran leik og óvenjulega sviðsmynd vekur sýningin ekki síst athygli fyrir tónlistina sem Nick Cave samdi sérstaklega fyrir sýninguna. Áhugasamir eru hiklaust hvattir til að skella sér á Woyzeck á meðan færi gefst.

Kópavogsdeild þakkar Vesturporti kærlega fyrir boðið og að viðurkenna með þessum hætti störf sjálfboðaliða Rauða krossins.

Sigrún Árnadóttir lét af störfum sem framkvæmdastjóri Rauða kross Íslands í byrjun nóvember. Í kveðjuhófi sem samstarfsmenn Sigrúnar héldu henni þakkaði Garðar Guðjónsson, formaður Kópavogsdeildar, Sigrúnu um leið fyrir störf hennar sem sjálfboðaliði Kópavogsdeildar.

Sigrún hefur á undanförnum misserum sinnt af alúð heimsóknum til vistmanna á sambýli fyrir aldraða í Gullsmára. Sökum búferlaflutninga Sigrúnar út fyrir landsteinana mun hún hætta að sinni sjálfboðastörfum fyrir Kópavogsdeild en snýr vonandi aftur að einhverjum tíma liðnum.

Námskeið í skyndihjálp hafa verið vinsæl að undanförnu hjá Kópavogsdeild. Vegna mikillar eftirspurnar verður aukanámskeið í viðbrögðum og vörnum gegn slysum á börnum 21. og 22. nóvember kl. 19-22. Uppselt er á námskeið í skyndihjálp 14. nóvember. Áhugasamir eru þó hvattir til að hafa samband því hægt er að skipuleggja annað námskeið á næstunni ef þátttaka leyfir.

Um er að ræða fjögurra klukkustunda námskeið þar sem þátttakendur læra grundvallaratriði í skyndihjálp og endurlífgun. Markmiðið er að þátttakendur verði hæfir til að veita fyrstu hjálp á slysstað. Námskeiðið byggist á glænýju kennsluefni sem er í takt við nýjustu aðferðir í skyndihjálp og slysaforvörnum.

Á námskeiðinu Slys á börnum læra þátttakendur að þekkja varnir gegn slysum á börnum og orsakir slysa almennt, þroska barna og slys sem tengjast aldri.

Á stjórnarfundi Kópavogsdeildar í gær var samþykkt stefna og verkefnaáætlun deildarinnar 2006-2010. Stefnan byggir á eldri stefnu sem hefur verið í gildi frá árinu 2003 og var sett saman í kjölfar ítarlegrar greiningar á þörfum íbúa í Kópavogi. Eldri stefnan var tekin til endurskoðunar nú á haustdögum í stefnumótun sem fjöldi sjálfboðaliða deildarinnar auk starfsfólks tók þátt í. Nýju stefnuna má nálgast hér til hliðar og hér.

Leikhópurinn Á senunni bauð sjálfboðaliðum Kópavogsdeildar á söngleikinn Kabarett á föstudaginn. Áhorfendur skemmtu sér konunglega enda kraftmikil sýning með úrvals listamönnum. Verkið er sýnt í Íslensku Óperunni og eru fáar sýningar eftir. Kópavogsdeild þakkar kærlega fyrir boðið og hvetur áhugasama til að skella sér á söngleikinn á meðan færi gefst. Upplýsingar um sýninguna fást á vefsíðunni:  www.kabarett.is

Sjálfboðaliðar Kópavogsdeildar funduðu í gær um drög að nýrri stefnu og verkefnaáætlun deildarinnar. Á fundinum komu fram gagnlegar ábendingar um áherslur í starfi deildarinnar. „Ég vil þakka sjálfboðaliðum deildarinnar kærlega fyrir að hafa með þessum hætti tekið þátt í að hafa áhrif á stefnu og verkefni deildarinnar“, sagði Garðar H. Guðjónsson, formaður Kópavogsdeildar, í lok fundarins.

Ný stefna deildarinnar mun ná yfir starfsárin 2006-2010 og taka við af núverandi stefnu sem hefur verið í gildi árin 2003 til 2005. Hin nýja stefna og verkefnaáætlun byggir á stefnumótun sem hefur staðið yfir undanfarnar vikur þar sem fjórir hópar, sem aðallega voru skipaðir sjálfboðaliðum deildarinnar auk starfsfólks, skiptu með sér endurskoðun á núgildandi stefnu. Öllum sem tóku þátt í stefnumótuninni eru færðar bestu þakkir fyrir.

Kópavogsdeild Rauða krossins heldur námskeiðið Slys á börnum 24. og 26. október kl. 19-22 í Hamraborg 11, 2. hæð.

Á námskeiðinu er fjallað um varnir gegn slysum á börnum og orsakir slysa almennt, þroska barna og slys sem tengjast aldri. Leiðbeint er í skyndihjálp við barnaslysum og áverkum af ýmsu tagi, endurlífgun barna, andlegum undirbúningi við komu barna á sjúkrahús o.fl. Námskeiðið getur gagnast öllum þeim sem umgangast börn hvort sem er í starfi eða daglegu lífi.

Starf Kópavogsdeildar með ungum innflytjendum tók nýja stefnu á sunnudaginn þegar sjálfboðaliðar tóku krakkana með sér á söngleikinn Annie. Krakkarnir höfðu aldrei farið í leikhús áður og forsvarsmenn Annie brugðust vel við og buðu þeim á sýninguna.

Krakkarnir vissu ekki við hverju var að búast en eftir sýninguna ljómuðu andlit þeirra af ánægju. Það vakti síðan enn meiri lukku þegar sýningarstjórinn bauð þeim upp á svið til þess að skoða leikmunina og fór svo með hópinn baksviðs til að spjalla við nokkra af leikurunum. Aðalsöguhetjan, sjálf Annie, áritaði veggspjald fyrir krakkana sem hengt hefur verið upp í sjálfboðamiðstöð Kópavogsdeildar.

Kópavogsdeild Rauða krossins óskar eftir sjálfboðaliðum til að sinna heimsóknaþjónustu. Heimsóknavinir rjúfa einsemd og félagslega einangrun fólks með heimsóknum á einkaheimili og stofnanir.

Undirbúningsnámskeið verður haldið 24. október kl. 18-21 í húsakynnum Reykjavíkurdeildar að Laugavegi 120. Áhugasamir hafi samband í síma 554 6626 eða með tölvupósti á [email protected] Dagskrá námskeiðsins sést hér fyrir neðan.

Sjálfboðaliðar Kópavogsdeildar hittust í hópefli þriðjudaginn 4. október og hlýddu á erindi Guðbjargar Sveinsdóttur, geðhjúkrunarfræðings. Guðbjörg fjallaði um áföll og afleiðingar þeirra. Hún tók sérstaklega fyrir áfallastreitu (post dramatic stress disorder).

Guðbjörg sagði einnig frá för sinni til Palestínu fyrr á árinu þar sem hún lagði mat á verkefni danska Rauða krossins sem felur í sér sálrænan stuðning við börn sem búa við stríðsátök.

Starf með ungum innflytjendum hófst aftur í vikunni samfara nýju skólaári. 10 nemendur úr nýbúadeild Hjallaskóla mættu í sjálfboðamiðstöð Kópavogsdeildar og áttu skemmtilega samverustund með fjórum sjálfboðaliðum deildarinnar.

Byrjað var á að fara í nafnaleiki enda ný andlit í hópi nemenda og sjálfboðaliða. Því næst var farið í málörvunarleiki og rætt um hvað hver og einn gerði í sumarfríinu. Framundan er fjölbreytt vetrarstarf með krökkunum sem er skipulagt af hópi sjálfboðaliða.

Athvörf Rauða krossins fyrir geðfatlaða héldu sameiginlegt landsmót 14.-16. september að Laugum í Sælingdal (eða „Sæludal“ eins og ánægður mótsgestur kallaði staðinn að afloknu móti). Gestir og starfsfólk athvarfanna Dvöl, Vin og Laut mættu til leiks en fulltrúar frá athvarfinu Læk í Hafnarfirði áttu því miður ekki heimangengt að þessu sinni.

Lagt var af stað vestur í Dali 14. september og hittust mótsgestir hressir á Laugum, gæddu sér á góðum veitingum, fengu sér sundsprett og sungu og trölluðu fram á kvöld.

Kópavogsdeild óskar eftir fleiri sjálfboðaliðum í fjölbreytt mannúðarverkefni deildarinnar. Sjálfboðaliðar taka þátt í verkefnum sem miða að því að aðstoða einstaklinga sem búa við þrengingar og mótlæti. Verkefnin eru fjölbreytt og því ættu flestir að geta fundið eitthvað við sitt hæfi, sjá nánari lýsingar neðar. Áhugasamir hafi samband í síma 554 6626 eða með tölvupósti á [email protected] .

Kópavogsdeild Rauða kross Íslands óskar eftir sjálfboðaliðum til þess að sinna margvíslegum mannúðarverkefnum deildarinnar. Kynningarfundur fyrir nýja sjálfboðaliða verður haldinn í sjálfboðamiðstöðinni Hamraborg 11 fimmtudaginn 15. september kl. 20.

Um er að ræða verkefni sem henta körlum jafnt sem konum, fólki á öllum aldri:

• Heimsóknavinir
• Aðstoð við geðfatlaða í Dvöl
• Föt sem framlag
• Starf með ungum innflytjendum
• Neyðarvarnir
• Ökuvinir
• Fataflokkun og afgreiðsla í L-12
• Fjölsmiðjan

Nánari upplýsingar eru veittar í sjálfboðamiðstöðinni Hamraborg 11 sem er opin alla virka daga kl. 11-15, sími 554 6626, netfang [email protected].

Kópavogsdeild Rauða kross Íslands óskar eftir sjálfboðaliðum til þess að sinna margvíslegum mannúðarverkefnum deildarinnar.
Kynningarfundur fyrir nýja sjálfboðaliða verður haldinn í sjálfboðamiðstöðinni Hamraborg 11 fimmtudaginn 15. september kl. 20.
Um er að ræða verkefni sem henta körlum jafnt sem konum, fólki á öllum aldri.

Á fundi heimsóknavina á þriðjudag hlýddu heimsóknavinir Kópavogsdeildar á erindi um nýtt sambýli aldraðra í Kópavogi. Guðrún Viggósdóttir, forstöðukona sambýlisins í Roðasölum, sagði frá starfseminni sem er rekin í þágu minnissjúkra. Á sambýlinu búa 8 einstaklingar en þar er jafnframt starfrækt dagvistun fyrir um 20 aðra á virkum dögum.

Sambýlið hóf starfsemi fyrr á árinu og hefur mætt brýnni þörf minnissjúkra og aðstandenda þeirra. Guðrún sagði ómetanlegt starf þeirra sjálfboðaliða Kópavogsdeildar sem eru að hefja störf við sambýlið, annað hvort með heimsóknum til einstakra vistmanna eða með því að stýra samverustundum. Enn er þörf á fleiri sjálfboðaliðum við sambýlið í Roðasölum og í önnur verkefni heimsóknavina í Kópavogi.

Í haust munu um 10 sjálfboðaliðar starfa í Dvöl, athvarfi fyrir geðfatlaða, og skipta með sér vöktum á laugardögum. Sjálfboðaliðarnir hittust í vikunni til að stilla saman strengi fyrir starfið sem er framundan. Í hópnum eru tveir nýir sjálfboðaliðar sem munu njóta góðs af reynslu reyndari sjálfboðaliða fyrst um sinn enda starfa ávallt tveir saman á vakt.

Sjálfboðaliðar í Dvöl hafa verið virkir
í rekstri athvarfsins frá stofnun þess árið 1998. Sem sjálfboðaliðum Rauða krossins er þeim veitt nauðsynleg þjálfun og fræðsla án endurgjalds, svo sem námskeið í skyndihjálp og sálrænni skyndihjálp. Nýir sjálfboðaliðar eru alltaf velkomnir í hópinn og áhugasamir geta sett sig í samband við Kópavogsdeild Rauða krossins.

Kópavogsdeild tekur þátt í verkefni albanska Rauða krossins sem snýr að börnum og ungmennum í neyð. Verkefnið miðar að því að koma í veg fyrir mikið brottfall barna úr skóla og hættunni á vinnuþrælkun barna, mansali og eiturlyfjaneyslu.

150 börn úr bæjunum Gjirokastra, Permet og Tepelene í Albaníu hljóta nú aðstoð við að aðlagast vel skóla og samfélagi í gegnum nám og félagsstarf. Tekist hefur að auka hvata barnanna til náms og efla félagslega færni þeirra. Sum þessara barna eru munaðarlaus, hafa búið á götunni eða við mjög slæmar félagslegar og efnahagslegar aðstæður.

Hópur fjörugra krakka sótti í sumar námskeiðið Mannúð og menning á vegum Kópavogs-deildar. Krakkarnir fóru í margskonar leiki og fræddust um hugsjónir Rauða krossins um mannúð og óhlutdrægni. Fjallað var um mismunandi menningar-heima og líf fólks í fjarlægum löndum. Hópurinn var fjölþjóðlegur því meðal þátttakenda voru krakkar frá Albaníu og Tælandi auk Íslands. Einn dagur var tekinn í fræðslu um umhverfið og annar í að læra undirstöðuatriði í skyndi-hjálp en þá fengu krakkarnir að skoða og prófa búnað sjúkrabíls. Námskeiðið endaði á uppskeru-hátíð í Viðey þar sem slegið var upp grillveislu.

Kópavogsdeild fékk í gær heimsókn frá fulltrúum pólska Rauða krossins, þeim Marek Malczewski framkvæmdastjóra landsfélagsins og Krzysztof Kedzierski sem sér um innri uppbyggingu pólska Rauða krossins. Þeir félagar eru á Íslandi í nokkra daga til að fræðast um verkefni og innri uppbyggingu Rauða kross Íslands og sækja sér fyrirmyndir fyrir störf sín í Póllandi.
Gestirnir komu í sjálfboða-miðstöð Kópavogsdeildar og fengu upplýsingar um deildina og helstu sjálfboðaverkefni. Því næst lögðu þeir leið sína í Fjölsmiðjuna og Dvöl og fengu kynningu á þeirri starfsemi sem þar fer fram.

Kópavogsdeild Rauða kross Íslands hvetur Kópavogsbúa og aðra höfuðborgarbúa til þátttöku í Menningarnótt í Reykjavík 20. ágúst þar sem Rauði kross Íslands stendur fyrir stórtónleikum á Miðbakka undir yfirskriftinni „Byggjum betra samfélag“. Tónleikarnir hefjast kl. 21.00 og eru haldnir í samvinnu við Rás 2 og Íslandsbanka.

Skrifstofa og sjálfboðamiðstöð Kópavogsdeildar er lokuð vegna sumarleyfa en opnar aftur mánudaginn 15. ágúst. Opnunartíminn verður þá sem fyrr alla virka daga kl. 11-15. Ef nauðsyn krefur er hægt að hafa samband við formann deildarinnar, Garðar H. Guðjónsson á [email protected].

Pylsurnar runnu ljúflega niður í viðstadda í Guðmundarlundi.

Gestir í athvörfunum Dvöl, Vin og Læk, sem eru athvörf Rauða kross Íslands fyrir geðfatlaða á höfuðborgarsvæðinu, grilluðu saman í Guðmundarlundi í Kópavogi 21. júní síðastliðinn. Gestirnir mættust á miðri leið því athvörfin þrjú eru í Reykjavík, Kópavogi og Hafnarfirði. Í Guðmundarlundi fengu viðstaddir að heyra sögu lundarins og farin var smá ganga um skóginn. Í grillveislunni voru kosnir pylsukóngar (þeir sem borðuðu flestar pylsur) og sunginn var afmælissöngur fyrir einn gestinn sem átti 44 ára afmæli þennan dag. Ætlunin er að gestir athvarfanna fari aftur í Guðmundarlund 20. júlí og grilli saman.

Kópavogsdeild Rauða kross Íslands heldur sumarnámskeiðið „Mannúð og menning“ 4.-8. júlí í Hamraborg 11, 2. hæð. Námskeiðið er fyrir börn á aldrinum 9-11 ára og stendur kl. 9-16 alla dagana.

Á námskeiðinu er lögð áhersla á fræðslu og leiki í tengslum við hugsjónir Rauða krossins um mannúð og óhlutdrægni. Þátttakendur fræðast um starf Rauða krossins, skyndihjálp, mismunandi menningarheima og umhverfið.

Skráning í síma 864 6750 fyrir 29. júní. Verð: 7.500 kr.

Þátttakendur á Börn og umhverfi.

Námskeiðið Börn og umhverfi hefur verið afar vinsælt að undanförnu hjá Kópavogsdeild en þar læra ungmenni á aldrinum 12-15 ára bæði umgengni og fram-komu við börn og slysaforvarnir og skyndihjálp. Þrjú námskeið urðu fljótt fullbókuð og fjöldi skráninga er kominn á fjórða námskeiðið sem hefst 15. júní. Upphaflega stóð til að halda tvö námskeið en sökum mikillar eftirspurnar var fyrst sett á eitt aukanámskeið og svo annað. Enn eru nokkur laus pláss fyrir áhugasama á seinna auka-námskeiðið. Eins eru laus pláss á námskeiðið Mannúð og menning 4.-8. júlí sem miðast við þátttakendur á aldrinum 9-11 ára.

Gestir og starfsfólk í Dvöl, athvarfi fyrir geðfatlaða, fóru í ferðalag 7. júní ásamt fólki úr Læk, athvarfi í Hafnarfirði. Í ferðalaginu var áð á merkum stöðum á Suðurlandi. Starfsmaður Árnesingadeildar Rauða kross Íslands, Ragnheiður Ásgeirsdóttir, slóst í för með hópnum og veitti honum leiðsögn. Fyrst var farið í dýragarðinn í Slakka þar sem ferðalangar skoðuðu íslensk húsdýr sem höfðu þó mörg skriðið í skjól í rigningunni. Því næst var ekið að Skálholti þar sem Árnesingadeild bauð hópnum upp á dýrindis súpu og brauð.

7 fulltrúar frá Kópavogsdeild Rauða krossins sátu aðalfund Rauða kross Íslands sem haldinn var í Mosfellsbæ 21. maí sl. Á fundinum var Garðar H. Guðjónsson, formaður Kópavogsdeildar, kosinn í stjórn Rauða kross Íslands.

Meðfram aðalfundinum skrifuðu deildir Rauða kross Íslands á höfuðborgar-svæðinu undir samkomulag um að sameina neyðar-nefndir félagsins á svæðinu. Með því er ætlunin að efla samvinnu deildanna svo þær geti betur brugðist við neyðarástandi á svæðinu.

Nemendur í áfanganum Félagsfræði þróunarlanda, sem er kenndur í Menntaskólanum í Kópavogi, komu fyrir stuttu í sjálfboðamiðstöð Kópavogsdeildar og fengu kynningu á þróunarstarfi Rauða krossins. Nína Helgadóttir fræddi nemendurna og kennarann þeirra, Hjördísi Einarsdóttur, meðal annars um alnæmisverkefni Rauða krossins í Afríku.

Kópavogsdeild Rauða kross Íslands heldur námskeiðið Börn og umhverfi (áður barnfóstrunámskeið) fyrir ungmenni fædd árin 1991, 1992 og 1993.

Fyrsta námskeiðið: 23., 24., 25. og 26. maí 
                             kl. 17-20 alla dagana.

Annað námskeiðið: 1., 2., 6. og 7. júní 
                             kl. 17-20 alla dagana.

Námskeiðsgjald: 5.500 kr. Innifalin eru námskeiðsgögn, bakpoki með skyndihjálparbúnaði og hressing.
Skráning: Í síma 554 6626 eða á [email protected]

Fjöldi fólks gerði góð kaup til styrktar góðu málefni.

Fjöldi fólks lagði leið sína á fatamarkað Kópavogsdeildar Rauða krossins sem haldinn var í tilefni af alþjóðadegi Rauða krossins 8. maí. Á markaðnum voru seld notuð föt til styrktar börnum í neyð vegna alnæmisvandans í Malaví. Salan gekk afar vel því alls söfnuðust 91.500 kr.

Kópavogsdeild þakkar öllum þeim sem komu á markaðinn og keyptu föt. Þar að auki eiga þakkir skyldar allir þeir sjálfboðaliðar sem tóku þátt í að undirbúa og halda markaðinn. Ekki er útilokað að annar fatamarkaður verði haldinn á vegum deildarinnar áður en langt um líður.

Kópavogsdeild Rauða krossins heldur námskeiðið Slys á börnum 10. og 12. maí kl. 19-22 í Hamraborg 11, 2. hæð. Á námskeiðinu er fjallað um varnir gegn slysum á börnum og orsakir slysa almennt, þroska barna og slys sem tengjast aldri. Leiðbeint er í skyndihjálp við barnaslysum og áverkum af ýmsu tagi, endurlífgun barna, andlegum undirbúningi við komu barna á sjúkrahús o.fl. Námskeiðið getur gagnast öllum þeim sem umgangast börn hvort sem er í starfi eða daglegu lífi. 



·        Leiðbeinandi: Sigríður K. Sverrisdóttir, hjúkrunarfræðingur. 

·        Námskeiðsgjald: 5.000 kr./7.000 kr. ef maki eða eldra systkin tekur líka þátt. Innifalin eru námskeiðsgögn og skírteini sem staðfestir þátttöku.

·        Skráning í síma 554 6626 eða með tölvupósti á [email protected] eigi

               síðar en 10. maí. 

Kópavogsdeild Rauða krossins heldur fatamarkað laugardaginn 7. maí kl. 11-16 í sjálfboðamiðstöðinni Hamraborg 11. Allur ágóði rennur til styrktar börnum í neyð vegna alnæmisvandans í Malaví. Fatamarkaðurinn er haldinn í tilefni alþjóðadags Rauða krossins 8. maí og 50 ára afmælis Kópavogsbæjar. Seld verða notuð föt á konur, karla, ungmenni og börn.

Verð 300 kr./500 kr.

Kaffi á könnunni.

David Lynch frá landsskrifstofu Rauða kross Íslands, Hulda Perry úr Reykjavíkurdeild Rauða krossins, Aurelia Balpe starfsmaður Alþjóðasambandsins og Garðar Guðjónsson formaður Kópavogsdeildar.

Kópavogsdeild Rauða krossins fékk í gær heimsókn frá Aureliu Balpe sem starfar á vegum Alþjóðasambands Rauða krossins í Genf í Sviss. Aurelia er að kynna sér samstarf landsfélaga Rauða krossins, þ.á.m. vinadeilda-samstarf. Í heimsókninni fræddist hún m.a. um samstarf Kópavogsdeildar við deildir innan Rauða krossins í Albaníu en Kópavogsdeild tekur nú þátt í verkefni í Albaníu sem snýr að því að sporna við miklu brottfalli barna úr grunnskóla.

 

David Lynch frá landsskrifstofu Rauða kross Íslands, Hulda Perry úr Reykjavíkurdeild Rauða krossins, Aurelia Balpe starfsmaður Alþjóðasambandsins og Garðar Guðjónsson formaður Kópavogsdeildar.

Kópavogsdeild Rauða krossins fékk í gær heimsókn frá Aureliu Balpe sem starfar á vegum Alþjóðasambands Rauða krossins í Genf í Sviss. Aurelia er að kynna sér samstarf landsfélaga Rauða krossins, þ.á.m. vinadeildasamstarf. Í heimsókninni fræddist hún m.a. um samstarf Kópavogsdeildar við deildir innan Rauða krossins í Albaníu en Kópavogsdeild tekur nú þátt í verkefni í Albaníu sem snýr að því að sporna við miklu brottfalli barna úr grunnskóla.

Fulltrúar Kópavogsdeildar og Reykjavíkurdeildar ræddu við Aureliu um hvernig hægt væri að gera vinadeildasamstarf sem árangursríkast og tryggja að unnið sé að sameiginlegum markmiðum.

 

Sólrún starfsmaður í Dvöl og fleiri í föstudagskaffi.

Undanfarnar vikur hefur verið mjög gestkvæmt í Dvöl, athvarfi fyrir geðfatlaða í Kópavogi. Aðsóknin í athvarfið hefur verið stigvaxandi frá áramótum þó svo að munur sé á fjölda gesta milli daga.

-Það er alltaf töluverður fjöldi af fastagestum en upp á síðkastið hafa nýir gestir bankað upp á í auknum mæli. Auk þess hafa einstaklingar verið að koma aftur eftir nokkra fjarveru, segir Sólrún Helga Ingibergsdóttir, starfsmaður í Dvöl.

-Sjaldgæft er að fólk komi í Dvöl upp á eigin spýtur, heldur er það oftast fyrir tilstilli og með stuðningi aðila innan heilbrigðiskerfisins. Aðilar í stuðningsteymi fyrir geðfatlaða, sem sett var saman í fyrra, hafa til að mynda verið iðnir við að benda fólki á Dvöl og aðstoða einstaklinga við að stíga þangað fyrstu skrefin. Það er mjög mikilvægt að fólki sé fylgt nokkrum sinnum í Dvöl til að gera einstaklingum auðveldara með að aðlagast, annars er hætta á að þeir komi aldrei aftur, segir Sólrún.

Dagbjört Silja og Harpa Hrönn.

Það var ekkert aprílgabb þegar tvær hressar stelpur, Dagbjört Silja Bjarnadóttir og Harpa Hrönn Stefánsdóttir, bönkuðu upp á 1. apríl og færðu Kópavogsdeild Rauða kross Íslands 6.363 kr. til styrktar hjálparstarfi í Asíu. Stelpurnar höfðu verið að safna að undanförnu eftir skóla og um helgar með góðum árangri. Fólk sem varð á vegi þeirra var duglegt að gefa þótt ekki hefðu allir verið með reiðufé á sér.

- Sumir tæmdu veski sín og vasa af smápeningum og afhentu okkur. Við fengum hugmyndina að þessari söfnun þegar við fundum tóma öskju úti á götu og ákváðum að safna í hana peningum til styrktar hjálparstarfi. Við horfum alltaf á fréttir og höfum þannig fylgst með ástandinu í Asíu vegna flóðbylgjunnar á annan í jólum. Við heyrðum líka um þetta í skólanum okkar sem tók þátt í söfnuninni Neyðarhjálp úr norðri, sögðu þær Dagbjört Silja og Harpa Hrönn sem eru nemendur í 5. bekk Kársnesskóla.

Krakkarnir í starfi með ungum innflytjendum heimsóttu í gær Alþjóðahúsið í Reykjavík. Þar tók á móti þeim Amal Tamimi fræðslufulltrúi og sýndi þeim húsið. Krakkarnir fræddust um börn um allan heim og að öll eigum við meira sameiginlegt en okkur grunar. Hún tók sem dæmi leik barna og sýndi krökkunum ýmsar myndir sem þau áttu síðan geta til um hvaðan kæmu. Krakkarnir höfðu mjög gaman af þessari fræðslu.

Kópavogsdeild Rauða kross Íslands heldur námskeið í almennri skyndihjálp miðvikudaginn 6. apríl kl. 18-22 í Hamraborg 11, 2. hæð.

Á námskeiðinu læra þátttakendur grundvallaratriði í skyndihjálp og endurlífgun. Markmiðið er að þátttakendur verði hæfir til að veita fyrstu hjálp á slysstað.

Námskeiðsgjald er 4900 kr. Sjálfboðaliðar deildarinnar eiga þó kost á að sitja námskeiðið endurgjaldslaust.

Skráning fer fram í síma 554 6626 eða á [email protected] eigi síðar en 4. apríl.

Hópur sjálfboðaliða hóf í gær störf við flokkun fatnaðar fyrir ungt fólk. Hópurinn mun hittast einu sinni í mánuði og flokka föt sem verða svo seld í búðum Rauða krossins í Reykjavík og Hafnarfirði. Sjálfboðaliðarnir eru flestir nemendur í Menntaskólanum í Kópavogi og nýir sjálfboðaliðar hjá Kópavogsdeild.

Árlega berast um 500 tonn af notuðum fötum til Rauða krossins. Það sem ekki er nýtt beint til hjálparstarfa er selt. Fataflokkunin er mikilvæg tekjuöflun Rauða krossins sem skilar sér beint í alþjóðlega neyðaraðstoð. 
 

Aðalfundur Kópavogsdeildar Rauða kross Íslands verður haldinn miðvikudaginn 9. mars kl. 20 í Hamraborg 11, 2, hæð.

Dagskrá:
Venjuleg aðalfundarstörf
Önnur mál

Veitingar og spjall í lok fundarins. Allir velkomnir!

Guðbjörg segir frá reynslu sinni í Aceh.

Heimsóknavinir komu saman í gær og hlustuðu á fyrirlestur Guðbjargar Sveinsdóttur, sendifulltrúa Rauða kross Íslands. Guðbjörg eyddi mánuði Aceh héraði í Indónesíu stuttu eftir að hörmungarnar dundu yfir í Asíu. Hún sagði frá reynslu sinni og sýndi myndir frá dvölinni.

Sjálfboðaliðar Kópavogsdeildar sáu um helgina leikritið Segðu mér allt í Borgarleikhúsinu. Borgarleikhúsið gaf deildinni fríðmiða á sýninguna og nýttu um 25 sjálfboðaliðar sér þetta kostaboð. Deildin færir Borgarleikhúsinu bestu þakkir fyrir miðana. 

Segðu mér allt fjallar um unga stúlku sem bundin er við hjólastól en hefur þó meiri fótfestu í lífinu en foreldrar hennar. Hún á sér draumaveröld en hún flýr á náðir hennar þegar foreldrar hennar ætlast til of mikils af henni.

Krakkarnir í starfi með ungum innflytjendum heimsóttu í gær, ásamt sjálfboðaliðum í verkefninu, Alþingi. Tekið var á móti hópnum og hann leiddur um húsið og fræddur um starfshætti Alþingis. Krakkarnir fræddust um fjölda þingmanna, fjölda ráðherra, upphaf Alþingis og fleira skemmtilegt. Auk þess fengu þau að sitja á pöllunum og fylgjast með þingumræðum um hvort hækka ætti hámarkshraða á Reykjanesbraut.

Eftir ánægjulega heimsókn lá leiðin á Kaffi París þar sem krökkunum var boðið upp á heitt kakó. Þar sátu þau, drukku ljúffengt kakó og spjölluðu saman um það sem fyrir augum bar á Alþingi.

Rauði kross Íslands hefur gefið út bækling í skyndihjálp sem inniheldur einfaldar upplýsingar um hvernig bregðast má við neyð. Markmiðið með bæklingnum er að kynna fyrir almenningi helstu atriði skyndihjálpar með stuttum og hnitmiðuðum hætti og myndrænni lýsingu. Allar myndir í bæklingnum sýna rétt viðbrögð.

Bæklingurinn tekur á þremur megin þáttum; endurlífgun, slysum og bráðum veikindum. Í bæklingnum er einnig upplýsingar um sálrænan stuðning og Rauða kross hreyfinguna. Innihald bæklingsins er aðeins ítarlegra en innihald veggspjaldsins í skyndihjálp sem Rauði krossinn gaf út í janúar og dreifði m.a. í alla skóla landsins. Sérfræðiráðgjöf við gerð bæklingins veitti Hjalti Már Björnsson læknir.

Nemendur Menntaskólans í Kópavogi fengu nýverið kynningu á sjálfboðnu starfi Kópavogsdeildar Rauða krossins. Kynningin var í höndum Kamillu Ingibergsdóttur, framkvæmdastjóra deildarinnar, og Pálínu Jónsdóttur heimsóknavinar en þær ræddu um stöðu aldraðra og kynntu fjölbreytt verkefni deildarinnar.

Nemendurnir, sem allir eru í áfanga um þroskasálfræði, sýndu starfinu mikinn áhuga og fjöldi þeirra hefur í hyggju að gerast sjálfboðaliðar. Kópavogsdeild býður þau hjartanlega velkomin til starfa.  

Þriðjudaginn 1. febrúar var haldinn fræðslufundur og hópefli fyrir heimsóknavini Kópavogsdeildar að Hamraborg 11. Starfsmaður frá hjúkrunarheimilinu Landakoti hélt fyrirlestur um aðhlynningu aldraðra, en kynningar af því tagi eru fastur liður í starfi heimsóknavina Rauða krossins.

'Fræðslufundir af þessu tagi hjálpa okkur að bæta þjónustuna sem við veitum og ekki er síður mikilvægt að við sjáum og hittum hver aðra. Hér á þessum fundum ræðum við starf okkar og það sem  þarf að gera í framtíðinni,' segir Pálína Jónsdóttir heimsóknarvinur.

Rúmlega 25 heimsóknavinir fara reglulega í heimsóknir á dvalarheimili aldraðra í Sunnuhlíð í Kópavogi og Skjólbraut og Gullsmára, sambýli fyrir aldraða. 12 manns til viðbótar heimsækja einstaklinga sem enn búa heima hjá sér en hafa þörf fyrir félagsskap og afþreyingu. 

Sett hefur verið upp myndasafn úr starfi Kópavogsdeildar á heimasíðuna. Kópavogsdeild sinnir fjölbreyttum verkefnum og gefa myndirnar innsýn í starf sjálfboðaliða. Meðal annars má skoða myndir úr starfi heimsóknavina, starfi með ungum innflytjendum og starfi í Dvöl, athvarfi fyrir geðfatlaða. Myndirnar má sjá hér og út frá tengli vinstra megin á síðunni.

Í kjölfar kynningarfundar sem haldinn var í síðustu viku bættust fleiri í hóp sjálfboðaliða Kópavogsdeildar. Deildin býður þá velkomna til starfa. Sjálfboðaliðar Kópavogsdeildar eru nú rúmlega eitt hundrað talsins og sinna sjálfboðnu starfi í fjölbreyttum verkefnum Kópavogsdeildar.  

Nýir sjálfboðaliðar hafa sýnt heimsóknaþjónustu, starfi í Dvöl og starfi með ungum innflytjendum áhuga en deildin getur alltaf tekið á móti nýjum sjálfboðaliðum. Áhugasamir geta haft samband í síma 554 6626 eða á [email protected].

Kópavogsdeild Rauða kross Íslands óskar eftir sjálfboðaliðum til þess að sinna margvíslegum mannúðarverkefnum deildarinnar. Kynningarfundur fyrir nýja sjálfboðaliða verður haldinn í sjálfboðamiðstöðinni Hamraborg 11 fimmtudaginn 20. janúar kl. 20.

Um er að ræða verkefni sem henta körlum jafnt sem konum, fólki á öllum aldri:

• Heimsóknavinir
• Aðstoð við geðfatlaða í Dvöl
• Föt sem framlag
• Starf með ungum innflytjendum
• Neyðarvarnir
• Ökuvinir
• Fataflokkun og afgreiðsla í L-12
• Fjölsmiðjan

Nánari upplýsingar eru veittar í sjálfboðamiðstöðinni Hamraborg 11 sem er opin alla virka daga kl. 11-15, sími 554 6626, netfang [email protected].

Eitt hundrað og tíu milljónir króna höfðu söfnuðust í landssöfnuninni Neyðarhjálp úr norðri um helgina. Margir lögðu hönd á plóginn við söfnunina en sjálfboðaliðar söfnuðu fé í Smáralind, Kringlunni og Glerártorgi á Akureyri. Tombólubörn tóku virkan þátt í söfnuninni og gengu um verslunarmiðstöðvarnar með söfnunarbauka.

Fjöldi listamanna lagði söfnuninni lið auk fjölda útvarpsstöðva, dagblaða og fyrirtækja. Söfnunarfénu verður varið til neyðaraðstoðar og uppbyggingar á næstu árum sem fimm mannúðarsamtök hafa umsjón með; Barnaheill, Hjálparstarf kirkjunnar, Rauði kross Íslands, SOS barnaþorpin og UNICEF - Barnahjálp Sameinuðu þjóðanna. Söfnunarfénu er ætlað að treysta framtíð barna sem misst hafa foreldra sína, hjálpa fjölskyldum sem misstu allt sitt til að koma undir sig fótum á ný og til að veita læknisaðstoð og heilsugæslu og koma í veg fyrir frekari skaða.

Fjöldi manns gaf fé í gegnum söfnunarsímann en á laugardagskvöld sat þjóðþekkt fólk við símann og tók við framlögum. Einnig voru haldin uppboð í beinni sjónvarpsútsendingu á ýmiskonar munum. Þar má nefna teinótt jakkaföt Björgólfs Guðmundssonar sem seldust á 10 milljónir króna og fótboltatreyju Eiðs Smára Guðjónssonar sem fengust rúmlega 300 þúsund krónur fyrir.

Allt fé sem safnast í landssöfnuninni fer til neyðarhjálpar og uppbyggingar á hamfarasvæðunum í Asíu.

Samstarfshópur einstaklinga, fyrirtækja og fjölmiðla undirbýr nú landssöfnun til styrktar þeim sem þjást vegna flóðanna í Asíu. Söfnunin hefst á mánudag og nær hámarki með beinni sjónvarpsútsendingu laugardaginn 15. janúar. Verndari söfnunarinnar og talsmaður verður frú Vigdís Finnbogadóttir, fyrrverandi forseti Íslands.

Söfnunin fer fram undir kjörorðunum Neyðarhjálp úr norðri. Landsmönnum mun gefast kostur á að hringja í söfnunarsíma alla næstu viku og einnig verður safnað í Smáralind og Kringlunni á föstudag og laugardag í næstu viku.

Kópavogsdeild Rauða kross Íslands hvetur alla sem vettlingi geta valdið að hringja í söfnunarsíma Rauða krossins 907 2020 en með einu símtali dragast 1000 krónur frá símareikningi. Allt söfnunarféð rennur til hjálparstarfs á hamfarasvæðunum í Asíu. Almenningur á Íslandi hefur gefið samtals rúmlega 60 milljónir króna til hjálparstarfsins en ríflega 25.000 manns hafa hringt í söfnunarsímann.

Rauði kross Íslands sendi í gær 10 tonn af vatni og eitt og hálft tonn af segldúkum til flóðasvæða í Tælandi með flugvél sem ríkisstjórn Íslands tók á leigu til að ná í slasaða Svía. Ölgerð Egils Skallagrímssonar gaf vatnið og Seglagerðin Ægir veitti Rauða krossinum verulegan afslátt af segldúkunum. 

Kópavogsdeild Rauða kross Íslands hvetur alla sem vettlingi geta valdið að hringja í söfnunarsíma Rauða krossins 907 2020 en með einu símtali dragast 1000 krónur frá símareikningi. Allt söfnunarféð rennur til hjálparstarfs á hamfarasvæðunum í Asíu. Almenningur á Íslandi hefur gefið samtals rúmlega 60 milljónir króna til hjálparstarfsins en ríflega 25.000 manns hafa hringt í söfnunarsímann.

Rauði kross Íslands sendi í gær 10 tonn af vatni og eitt og hálft tonn af segldúkum til flóðasvæða í Tælandi með flugvél sem ríkisstjórn Íslands tók á leigu til að ná í slasaða Svía. Ölgerð Egils Skallagrímssonar gaf vatnið og Seglagerðin Ægir veitti Rauða krossinum verulegan afslátt af segldúkunum.