Fréttir

31. okt. 2005 : Sjálfboðaliðar skemmtu sér á Kabarett

Leikhópurinn Á senunni bauð sjálfboðaliðum Kópavogsdeildar á söngleikinn Kabarett á föstudaginn. Áhorfendur skemmtu sér konunglega enda kraftmikil sýning með úrvals listamönnum. Verkið er sýnt í Íslensku Óperunni og eru fáar sýningar eftir. Kópavogsdeild þakkar kærlega fyrir boðið og hvetur áhugasama til að skella sér á söngleikinn á meðan færi gefst. Upplýsingar um sýninguna fást á vefsíðunni:  www.kabarett.is

28. okt. 2005 : Héldu tombólu í Salahverfi

Laufey Jörgensdóttir og Karitas Marý Bjarnadóttir.
Þær Karitas Marý Bjarnadóttir og Laufey Jörgensdóttir færðu í dag Kópavogsdeild Rauða krossins 2.267 kr. sem þær söfnuðu með því að halda tombólu fyrir utan Nettó í Salahverfi. Upphæðin mun renna í hjálparsjóð til styrktar börnum í neyð erlendis.

Stelpurnar sögðust hafa selt fullt af dóti og eiga enn nóg í aðra tombólu sem þær stefna á að halda þegar hlýnar aftur í veðri.

26. okt. 2005 : Ný stefna Kópavogsdeildar lítur brátt dagsins ljós

Sjálfboðaliðar Kópavogsdeildar funduðu í gær um drög að nýrri stefnu og verkefnaáætlun deildarinnar. Á fundinum komu fram gagnlegar ábendingar um áherslur í starfi deildarinnar. „Ég vil þakka sjálfboðaliðum deildarinnar kærlega fyrir að hafa með þessum hætti tekið þátt í að hafa áhrif á stefnu og verkefni deildarinnar“, sagði Garðar H. Guðjónsson, formaður Kópavogsdeildar, í lok fundarins.

Ný stefna deildarinnar mun ná yfir starfsárin 2006-2010 og taka við af núverandi stefnu sem hefur verið í gildi árin 2003 til 2005. Hin nýja stefna og verkefnaáætlun byggir á stefnumótun sem hefur staðið yfir undanfarnar vikur þar sem fjórir hópar, sem aðallega voru skipaðir sjálfboðaliðum deildarinnar auk starfsfólks, skiptu með sér endurskoðun á núgildandi stefnu. Öllum sem tóku þátt í stefnumótuninni eru færðar bestu þakkir fyrir.

21. okt. 2005 : Slys á börnum - námskeið

Námskeiðið er haldið 24. og 26. október.
Kópavogsdeild Rauða krossins heldur námskeiðið Slys á börnum 24. og 26. október kl. 19-22 í Hamraborg 11, 2. hæð.

Á námskeiðinu er fjallað um varnir gegn slysum á börnum og orsakir slysa almennt, þroska barna og slys sem tengjast aldri. Leiðbeint er í skyndihjálp við barnaslysum og áverkum af ýmsu tagi, endurlífgun barna, andlegum undirbúningi við komu barna á sjúkrahús o.fl. Námskeiðið getur gagnast öllum þeim sem umgangast börn hvort sem er í starfi eða daglegu lífi.

17. okt. 2005 : Ungum innflytjendum boðið á Annie

Hluti af krökkunum með Annie eftir sýninguna.
Starf Kópavogsdeildar með ungum innflytjendum tók nýja stefnu á sunnudaginn þegar sjálfboðaliðar tóku krakkana með sér á söngleikinn Annie. Krakkarnir höfðu aldrei farið í leikhús áður og forsvarsmenn Annie brugðust vel við og buðu þeim á sýninguna.

Krakkarnir vissu ekki við hverju var að búast en eftir sýninguna ljómuðu andlit þeirra af ánægju. Það vakti síðan enn meiri lukku þegar sýningarstjórinn bauð þeim upp á svið til þess að skoða leikmunina og fór svo með hópinn baksviðs til að spjalla við nokkra af leikurunum. Aðalsöguhetjan, sjálf Annie, áritaði veggspjald fyrir krakkana sem hengt hefur verið upp í sjálfboðamiðstöð Kópavogsdeildar.

14. okt. 2005 : Heimsóknavinir óskast!

Kópavogsdeild Rauða krossins óskar eftir sjálfboðaliðum til að sinna heimsóknaþjónustu. Heimsóknavinir rjúfa einsemd og félagslega einangrun fólks með heimsóknum á einkaheimili og stofnanir.

Undirbúningsnámskeið verður haldið 24. október kl. 18-21 í húsakynnum Reykjavíkurdeildar að Laugavegi 120. Áhugasamir hafi samband í síma 554 6626 eða með tölvupósti á kopavogur@redcross.is Dagskrá námskeiðsins sést hér fyrir neðan.

13. okt. 2005 : Öflugt Rauða kross starf á höfuðborgarsvæðinu

Sigrún Jóhannsdóttir, fráfarandi formaður svæðisráðs á höfuðborgarsvæði, og Jóhann Gunnar Gunnarsson, nýr formaður ráðsins.

Fulltrúar Kópavogsdeildar Rauða krossins sóttu í gærkvöldi svæðis-fund allra deilda Rauða krossins á höfuðborgarsvæðinu sem haldinn var í Hafnarfirði. Á fundinum urðu formannaskipti í svæðisráði og farið var yfir stöðu nokkurra samstarfsverkefna eins og nýstofnaðrar neyðarnefndar sem hefur umsjón með neyðarvarna-skipulagi Rauða krossins á svæðinu. 

Á fundinum var einnig fjallað um umfangsmikla fatasöfnun og fataflokkun deildanna sem fjölmargir sjálfboðaliðar taka þátt í, svo sem með úthlutun fatnaðar í neyðaraðstoð og afgreiðslustörf í fataverslunum Rauða krossins á Laugavegi 12 í Reykjavík og Strandgötu 24 í Hafnarfirði.

12. okt. 2005 : Margt góðra gesta í 7 ára afmæli Dvalar

Ljúffengar veitingar voru á boðstólnum í afmælinu.
Mánudaginn 10. október var veisla í Dvöl til að fagna 7 ára afmæli starfseminnar. Um leið var haldið upp á alþjóðlega geðheilbrigðis-daginn sem ber upp á þennan dag árlega. Margir góðir gestir komu í afmælisboðið í Dvöl og gæddu sér á ljúffengum veitingum. Sumir voru að koma í fyrsta skipti, svo sem hópur nemenda í afbrigða-sálfræði í MK sem eru að læra um geðraskanir og fengu fræðslu um Dvöl og Rauða krossinn í kennslustund fyrir skömmu.

Afmælisgestirnir veittu eftirtekt flottum málverkum í listasmiðjunni sem gestir Dvalar hafa unnið við að undanförnu undir leiðsögn sjálfboðaliða frá Svíþjóð sem mun starfa í Dvöl næstu mánuði.

7. okt. 2005 : Fjórir vinir safna fyrir bágstöddum börnum

Brynjar, Breki, Harpa og Aníta.
Vinirnir Aníta Sævarsdóttir, Harpa Haraldsdóttir og Breki og Brynjar Arndal héldu nýlega tvær tombólur fyrir utan Nóatún í Hamraborg. Þau söfnuðu alls 3.362 kr. sem þau afhentu Kópavogsdeild Rauða krossins. Þeim var umhugað um að peningarnir færu í að aðstoða veik og bágstödd börn í útlöndum.

Hópurinn boðaði síðan komu sína fljótt aftur í sjálfboðamiðstöð Kópavogsdeildar með annað framlag því þau áttu enn til varning sem þau ætla sér að koma í verð með enn annarri tombólu.

7. okt. 2005 : Sjálfboðaliðar fræðast um áfallastreitu

Sjálfboðaliðarnir hlýddu áhugasamir á erindi Guðbjargar.
Sjálfboðaliðar Kópavogsdeildar hittust í hópefli þriðjudaginn 4. október og hlýddu á erindi Guðbjargar Sveinsdóttur, geðhjúkrunarfræðings. Guðbjörg fjallaði um áföll og afleiðingar þeirra. Hún tók sérstaklega fyrir áfallastreitu (post dramatic stress disorder).

Guðbjörg sagði einnig frá för sinni til Palestínu fyrr á árinu þar sem hún lagði mat á verkefni danska Rauða krossins sem felur í sér sálrænan stuðning við börn sem búa við stríðsátök.