Rauði krossinn veitir 3 milljónir í neyðaraðstoð í Chile

1. mar. 2010

Rauði kross Íslands hefur ákveðið að senda 3 milljónir króna til neyðaraðgerða í kjölfar jarðskjálftans í Chile nú um helgina. Alþjóða Rauði krossinn hefur þegar veitt 360 milljónum króna úr neyðarsjóði sínum og Rauði krossinn í Chile hefur hrint af stað fjáröflun til aðstoðar fórnarlömbum hamfaranna. 

Hægt er að styðja hjálparstarfið í Chile með því að leggja inn á reikning Rauða krossins í banka 0342, hb. 26, reikn. 555, kt. 530269-2649, eða greiða með kreditkorti hér.

Rauði krossinn í Chile hefur unnið sleitulaust frá því jarðskjálftinn reið yfir að björgun úr rústum, aðhlynningu slasaðra og dreifingu hjálpargagna. Rauði krossinn hefur gríðarlega mikla reynslu af viðbrögðum vegna jarðskjálfta og annarra náttúruhamfara og hefur mikilvægu hlutverki að gegna í almannavörnum landsins.

Systurfélög Rauða krossins í Suður-Ameríku og Alþjóða Rauði krossinn eru reiðubúin að senda hjálparstarfsmenn og hjálpargögn á vettvang með litlum fyrirvara. Rauði kross Íslands hefur einnig beðið sendifulltrúa sína að vera í viðbragðsstöðu vegna hamfaranna komi alþjóðleg beiðni um aðstoð.

Rauði kross Íslands veitir fólki sem misst hefur samband við ástvini í Chile aðstoð með sálrænum stuðningi og hjálp við að nýta leitarþjónustu Alþjóða Rauða krossins. Rauði krossinn hvetur fólk sem leitar að vinum og aðstandendum að hafa samband í síma 570 4000 eða með því að senda fyrirspurnir til Atla Viðars Thorstensen, verkefnisstjóra leitarþjónustu, á netfangið atli@redcross.is.

Enn er gífurleg þörf á neyðaraðstoð á Haítí í kjölfar jarðskjálftans sem þar varð fyrir sex vikum. Tólf hjálparstarfsmenn frá Rauða krossi Íslands hafa verið þar að störfum og ennþá eru átta sendifulltrúar á svæðinu, einkum hjúkrunarfólk. Hægt er að gefa framlög til hjálparstarfsins á Haítí með því að hringja í söfnunarsíma Rauða krossins 904 1500 eða með því að leggja inn á banka 0342, hb. 26, reikn. 12, kt. 530269-2649.