Stjórnvöld veita 20 milljónir króna til alnæmisverkefna Rauða krossins

7. jún. 2006

Tuttugu og fimm ár eru frá því að alnæmisveiran greindist fyrst og síðan þá hafa um 25 milljónir manna látist af völdum sjúkdómsins. Alnæmi hefur grafið undan hefðbundnum bjargráðum í Afríku og geta við að takast á við vá verður stöðugt minni.
Utanríkisráðherra hefur ákveðið að íslensk stjórnvöld muni styðja alnæmisverkefni Alþjóðasambands Rauða krossins og Rauða hálfmánans í sunnanverðri Afríku. Framlagið mun samtals nema 320.000 bandaríkjadollurum sem svarar til um það bil 20 milljónum íslenskra króna á núverandi gengi og mun verða greitt í fjórum jöfnum greiðslum á árunum 2006-2009.

Ríkisstjórnin og Rauði kross Íslands lögðu fram áheit um samvinnu um stuðning við alnæmissjúka á 28. alþjóðaráðstefnu Rauða krossins og Rauða hálfmánans og ríkja sem eru aðilar að Genfarsamningunum. Tilkynnt var um þetta framlag ríkisstjórnarinnar á ráðherrafundi Sameinuðu þjóðanna um alnæmi sem haldinn var í New York dagana 1.-2. júní.

Rauði krossinn fagnar mjög þessum stuðningi ríkisstjórnarinnar. Alnæmisvandinn er einn helsti ógnvaldur íbúa í löndunum sunnan Sahara þar sem hlutfall smitaðra meðal fullorðinna er um 25-30% og jafnvel enn hærra í sumum löndum. Rauði kross Íslands hefur síðan árið 2000 stutt Rauða krossfélögin í sunnanverðri Afríku í glímunni við þennan vágest, bæði í samvinnu við Alþjóðasamband Rauða krossins, landsfélög Rauða krossins í Suður Afríku, Malaví og Mósambík og Þróunarsamvinnustofnun Íslands.

Nú eru liðin tuttugu og fimm ár frá því að alnæmisveiran greindist fyrst og síðan þá hafa um 25 milljónir manna látist af völdum sjúkdómsins. Alnæmi hefur grafið undan hefðbundnum bjargráðum samfélaga í Afríku og geta við að takast á við vá verður stöðugt minni eins og sjá má á viðvarandi fæðuskorti í sunnanverðri Afríku undanfarin ár. Það hefur enn fremur víxlverkandi áhrif á vandamál sem flest Afríkuríki glíma við svo sem fátækt, skuldastöðu, náttúruspjöll og vopnuð átök.

Rauði krossinn hefur um árabil unnið að alnæmisverkefnum í álfunni. Verkefni Rauða krossins snúa einkum að fjórum sviðum: heimahlynningu með aðstoð sjálfboðaliða, forvörnum og fræðslu, stuðningi við munaðarlaus börn og málsvarastarf til að vinna gegn fordómum og fáfræði og til að bæta aðstæður fórnarlamba faraldursins.

Sú staðreynd að fjöldi smitaðra eygir nú von um að halda sjúkdómnum í skefjum vegna framboðs á ódýrum alnæmislyfjum og annarra fylgikvilla sjúkdómsins hefur haft í för með sér fordómalausari umræðu og viðhorfi til þeirra sem smitaðir eru. Það skapar aftur sóknarfæri á að halda alnæmisfaraldrinum í skefjum og draga úr nýsmitum.