Tveir sendifulltrúar Rauða krossins í neyðarteymum vegna kóleru í Simbabve

13. jan. 2009

Hjúkrunarfræðingarnir Hildur Magnúsdóttir og Maríanna Csillaq halda til Simbabve í dag og á morgun til að taka þátt í neyðaraðgerðum Rauða krossins vegna kólerufaraldurs í landinu. Þær munu starfa með neyðarteymum norska og finnska Rauða krossins.

Hildur og Maríanna verða 4-5 vikur í Simbabve. Kólerufaraldur hefur geisað í landinu síðan í byrjun desember og hafa um 600 látist, en talið er að um 13.000 landsmenn hafi smitast af sjúkdómnum. Hlutverk þeirra er að ferðast um þéttbýli og sveitir í mið- og austurhluta landsins, greina kólerutilfelli og vinna að forvörnum með þjálfun heilbrigðisstarfsfólks og sjálfboðaliða Rauða krossins í Simbabve.

Sjö neyðarteymi Rauða krossins eru nú að störfum í Simbabve vegna kólerufaraldursins -  þrjú heilbrigðisteymi frá finnska, norska og japanska Rauða krossinum, og fjögur vatnshreinsiteymi frá landsfélögum í Bretlandi, Frakklandi, á Spáni, og svo Þýskalandi og Austurríki. Neyðarbeiðni Alþjóða Rauða krossins vegna kólerunnar hljóðar upp á 1,2 milljarða íslenskra króna (6,6 milljónir evra).

Fyrir er í Simbabve Huld Ingimarsdóttir sendifulltrúi Rauða krossins sem hefur stjórnað matvæladreifingu í landinu frá því í október. Talið er að allt að helmingur landsmanna, sem eru um 12 milljónir alls, standi frammi fyrir hungursneyð á þessu ári. Helstu stoðir efnahagslífs og framleiðslu í landinu hafa brostið á undanförnum misserum vegna óðaverðbólgu og óstjórnar, og eru neyðarverkefni Rauða krossins líflína hundruð þúsunda manna sem þjást af völdum hungurs og sjúkdóma.