Pálína Ásgeirsdóttir hlaut fálkaorðuna fyrir hjálparstörf

23. jún. 2009

Pálína Ásgeirsdóttir hjúkrunarfræðingur og einn allra reyndasti sendifulltrúi Rauða kross Íslands var sæmd fálkaorðunni á þjóðhátíðardaginn 17. júní fyrir alþjóðlegt hjálparstarf.  Hartnær 25 ár eru síðan Pálína hóf störf með Rauða krossinum og er hún vel að þessum heiðri komin.

“Ég lít á þennan heiður ekki síður sem viðurkenningu fyrir hjúkrunarstéttina og hjálparstarf almennt,” sagði Pálína Ásgeirsdóttir að þessu tilefni.

Fyrsta starf Pálínu á vettvangi hjálparstarfa var við neyðaraðstoð í Eþíópíu árið 1985, en þangað hélt hún á vegum Hjálparstarfs kirkjunnar vegna mikillar hungursneyðar sem þar geisaði.  Árið 1986 varð hún sendifulltrúi Rauða kross Íslands við skurðspítala Alþjóða Rauða krossins á Tælandi.

Pálína hefur síðan þá starfað fyrir Alþjóða Rauða krossinn og hefur gríðarlega reynslu af störfum á átakasvæðum bæði sem hjúkrunarfræðingur og sem stjórnandi aðgerða.  Hún hefur meðal annars unnið í Sómalíu, í Afganistan, Pakistan og Kenýa vegna borgarstríðs í Súdan.  Pálína starfaði á vegum utanríkisráðuneytisins við friðargæslustörf á hersjúkrahúsi NATO í Bosníu árið 1999.  Þá vann hún sem fulltrúi Alþjóða Rauða krossins að uppbyggingu nýs Rauða kross landsfélags í Austur Tímor.

Árið 2005 tók Pálína við stöðu yfirmanns spítalahjúkrunarþjónustu í höfuðstöðvum Alþjóða Rauða krossins í Genf.   Þar starfaði hún til ársins 2007, er hún hélt til Palestínu til að stýra aðstoð Alþjóða Rauða krossins við sjúkrahús á herteknu svæðunum og í Gaza.   Pálína tók við nýju starfi fyrr í þessum mánuði í Gaza þar sem hún mun stýra sjúkrahúsþjónustu og uppbyggingu heilbrigðisverkefna Alþjóða Rauða krossins.

Rauði kross Íslands óskar Pálínu innilega til hamingju með þessa viðurkenningu á starfi hennar víða um heim í þágu fórnarlamba átaka.