Rauði krossinn tekur þátt í 112 deginum á Djúpavogi

8. feb. 2013

Rauði krossinn á Djúpavogi tekur þátt í hátíðarhöldum 112 dagsins á Djúpavogi ásamt fleiri aðilum sem sinna neyðarþjónustu.

Upp úr kl. 13:00 munu allir viðbragðsbílar byggðarlagsins keyra um götur Djúpavogs. Kl. 14:00 til 15:00 bjóða viðbragðsaðilar Djúpavogs upp á léttar veitingar í Sambúð þar sem til sýnis verða bílar og græjur af öllum stærðum og gerðum. Íbúar sveitarfélagsins eru hvattir til þess að mæta og kynna sér starfsemina.

Á 112 deginum í ár verður sjónum beint sérstaklega að öryggi og velferð barna og ungmenna. Markmiðið er annars vegar að halda á lofti því víðtæka öryggis- og velferðarkerfi sem börn og ungmenni hafa aðgang að í gegnum neyðarnúmerið en hins vegar að benda á leiðir fyrir börn og ungmenni til þess að taka þátt í starfi samtaka á þessu sviði og stuðla að eigin öryggi og annarra, meðal annars með þekkingu í skyndihjálp og eldvörnum.

112 dagurinn hefur verið haldinn árlega síðan 2005. Markmið dagsins er að kynna neyðarnúmerið 112 og starfsemi hinna fjölmörgu neyðarþjónustuaðila sem tengjast því, efla vitund almennings um mikilvægi þessarar starfsemi og hvernig þjónustan nýtist almenningi. Að deginum standa auk Rauða krossins, Neyðarlínan, Ríkislögreglustjórinn, Brunamálastofnun, slökkviliðin, Slysavarnafélagið Landsbjörg, Landhelgisgæslan, Barnaverndarstofa, Landssamband slökkviliðs- og sjúkraflutningamanna og Flugstoðir.