Heimalundur, nýtt húsnæði Stöðvarfjarðardeildar

27. jan. 2009

Í tilefni þess að Stöðvarfjarðardeild Rauða krossins er komin í nýtt húsnæði var haldin opnunarhátíð með pomp og prakt á laugardaginn. Boðið var upp á kaffi og veglegar veitingar og mættu þangað 50 manns. Húsnæðið nefnist Heimalundur og er til húsa að Fjarðabraut 48.

Stöðvarfjarðardeild er ein öflugasta deildin á Austurlandi með fjöldann allan af sjálfboðaliðum. Sjö heimsóknavinir heimsækja aldraða, 14 konur prjóna og sauma föt fyrir börn í Afríku í verkefninu Föt sem framlag. Afurðirnar hafa verið til sýnis hjá deildinni. Fólk með geðraskanir og aðstandendur þeirra frá Stöðvarfirði, Breiðdalsvík og Fáskrúðsfirði hittast á Stöðvarfirði og því kemur sér vel að deildin er komin í stórt og gott húsnæði. Ungmennastarfið er öflugt í umsjón Björgvins Vals Guðmundssonar en hann er að hætta og við taka Rósa Valtingojer og Zdenek Paták.

Á vordögum mun deildin opna litla Rauða kross búð í nýja húsnæðinu með sölu á notuðum fatnaði og öðru sem til fellur.

Hægt er að fara að síðu 123.is/vinaminni í albúm og Heimalundur til að skoða fleiri myndir.