Kynning á því sem er í boði í Fjarðabyggð

29. apr. 2009

Í gangi er kynningarfundarröð í Fjarðabyggð fyrir nýja íbúa sveitarfélagsins. Sigríður Herdís Pálsdóttir verkefnisstjóri Rauða krossins sér um fundina en hún starfar einnig fyrir Fjarðabyggð.

Á kynningarfundina mæta fulltrúar Fjarðabyggðar til að kynna þjónustu sveitarfélagsins og fulltrúar ýmissa félaga s.s íþróttafélaga, góðgerðarfélaga og ýmissa klúbba. Einnig mæta fulltrúar Fjölmenningarseturs og Þekkingarnetsins til að kynna sína þjónustu á fundunum. Fyrsti fundurinn var í gær á Reyðarfirði en næstu fundir eru á Eskifirði í dag klukkan 17 og Neskaupsstað á morgun, fimmtudag, klukkan 17, báðir í grunnskólunum á stöðunum.

Einnig hefur fjöldi heimila verið heimsóttur og fengið afhentan upplýsingabækling og lykilinn að Fjarðarbyggð. Í bæklingnum er að finna upplýsingar um þjónustu og afþreyingu sem er í boði í Fjarðabyggð en hann er gefinn út á íslensku, ensku og pólsku. Lykillinn að Fjarðabyggð veitir fólki ókeypis aðgang í sund, á söfnin, á skíði og árskort í bókasöfnin.