30. mar. 2009 : Ungt fólk nýtir tímann

Vilt þú stuðla að því að ungt fólk nýti tímann í sumar? Stjórn Ungmennahreyfingarinnar í Reykjavík er að setja af stað vinnuhóp til að undirbúa opnun sumarmiðstöðvar fyrir ungt fólk.

30. mar. 2009 : Brjálað veður í Vík í Mýrdal - Landsmót URKÍ

Katrín Björg Stefánsdóttir sendi þessa skemmtilegu söga frá ógleymanlegu landsmóti Urkí sem haldið var í Vík í Mýrdal helgina 14. og 15 mars.

24. mar. 2009 : „Flóttamenn í heimreiðinni: Af hverju hér? “

Flóttamannastofnun Sameinuðu þjóðanna stendur í þessari viku fyrir greinasamkeppni sem nær til Eystrasalts- og Norðurlanda. Þátttakendur eru nemar í fjölmiðlafræði en samkeppnin er skipulögð í samstarfi við helstu dagblöð í þessum löndum. Háskólar og hjálparstofnanir, þar á meðal Rauði kross Íslands, koma einnig að samkeppninni.

„Ólöglegir innflytjendur frá Afríku koma að landi í Evrópu, óttast er að margir þeirra hafi drukknað“. Fyrirsagnir svipaðar þessum eru algengar í evrópskum fréttum. En er allt þetta fólk „ólöglegir innflytjendur“? Getur ekki verið að sumir þeirra séu á flótta undan stríði og ofsóknum? Eru ef til vill hælisleitendur á meðal þeirra? Vitum við hvað býr að baki þessum fréttum í raun og veru. Getur verið að fréttir í þessum málaflokki endurspegli aðallega stjórnmálaskoðanir og almenningsálit? Gera blaðamenn sér alltaf grein fyrir því að á meðal ólöglegra innflytjenda eru oft einstaklingar sem flúið hafa skelfilegan mannúðarvanda og þurfa á vernd að halda?

18. mar. 2009 : Ungmenni kynna sér starfsemi Rauða krossins

Nú stendur yfir árleg þemavika í Lindaskóla í Kópavogi og þemað í unglingadeildinni í ár er Rauði kross Íslands. Nemendur úr skólanum hafa kynnt sér starfsemi Rauða krossins og hafa nokkrir hópar komið í sjálfboðamiðstöð Kópavogsdeildar og tekið viðtöl við starfsmenn deildarinnar. Þeir hafa fræðst um rekstur deildarinnar, verkefnin, námskeið og ungmennastarfið. Þá hafa nokkrir hópar líka farið á landsskrifstofu Rauða krossins og fengið upplýsingar um starfið þar. Þeir fengu meðal annars stutta kennslu í skyndihjálp.

17. mar. 2009 : Ungt fólk og fjölmenning

14. mar. 2009 : Landsmót í stormi

Landsmót Ungmennahreyfingar Rauða krossins er haldið um helgina í Vík í Mýrdal. Ekki er hægt að segja annað en mótið hafi byrjað með stæl þar sem stór hluti hópsins var veðurtepptur á leiðinni.

Notið var leiðsagnar formanns Rangárvallasýsludeildar Rauða krossins og fékk hópurinn inni í bændagistingunni í Drangshlíð þar sem vel fór um alla í nótt.

Miklir fagnaðarfundir urðu þegar hópurinn mætti í Vík klukkan 9:30 í morgun.
 

12. mar. 2009 : Kastljósþátturinn um alnæmisleikinn kominn á vefinn

Rauða kross ungmenni af öllu höfuðborgarsvæðinu sameinuðust fimmtudagskvöldið 27. nóvember 2008 í húsakynnum Kópavogsdeildar. Samkoman var liður í undirbúningi fyrir alþjóðlega alnæmisdaginn, sem haldinn er ár hvert 1. desember.

Auður Ásbjörnsdóttir stjórnarmeðlimur URKÍ hélt utan um svokallaðan „alnæmisleik". Leikurinn varpar ljósi á hvernig fólk getur sýkst af alnæmisveirunni. Kastljós kom í heimsókn og fylgdist með leiknum.

4. mar. 2009 : Kínversk heimsókn

Á dögunum fengu félagar í unglingastarfi URKÍ-H góða heimsókn frá Kína. Þar var á ferðinni Changlong Xu frá Kína sem búsettur er hér á landi en hann sagði krökkunum frá heimalandi sínu og hvernig upplifun það er fyrir hann að búa á Íslandi. Sýndi hann myndir frá heimahögunum og spjallaði um heima og geima.

Heimsóknin var einkar skemmtileg og fróðleg en hún er hluti af svo kölluðu vegabréfaverkefni URKÍ-H. Í því verkefni koma gestir og kynna ákveðið land, sögu þess og menningu. Annað hvort er um að ræða Íslendinga sem hafa búið erlendis um tíma eða innflytjendur sem búsettir eru hér á landi og koma og fræða krakkana um sitt heima land.

Markmið verkefnisins er að auka á víðsýni ungmenna, fræðast um ólík lönd og menningarheima, vinna gegn fordómum og auka á umburðarlyndi. Verkefnið er hluti af þemanu byggjum betra samfélag sem félagar URKÍ-H vinna að og er ætlað að draga úr fordómum og auka á vináttu, umburðarlyndi og virðingu í íslensku samfélagi.

4. mar. 2009 : Unglingahópur URKÍ-R Miðbæjar og Breiðholts

Miðbæjarhópur URKÍ-R kvaddi á dögunum verkefnastjóra sinn hana Hjördísi Dalberg, en hún er að fara í fæðingarorlof. Í tilefni þess að þetta var hennar síðasti hittingur var keyptur blómvöndur og föndrað kort handa tilvonandi móður. Hjördís kom einnig með gómsæta súkkulaðiköku og saman eyddu unglingarnir tímanum í að föndra persónuskjal hvers og eins þar sem helstu upplýsingar um þátttakendur í starfinu koma fram. Suluman Bah sjálfboðaliði Gambíska Rauða krossins, sem er á Íslandi í tengslum við vinadeildarsamstarfs Reykjavíkurdeildarinnar við Gambíu, kíkti á krakkanna og föndraði með þeim sitt persónuleikaskjal.

2. mar. 2009 : Heilahristingur og Vinanet – verkefni Rauða krossins fyrir ungmenni í Reykjavík

Heilahristingur, nýtt samstarfsverkefni Reykjavíkurdeildar Rauða krossins, Alþjóðahúss í Breiðholti og Borgarbóksafns, hófst þann 10. febrúar. Heilahristingur er heimanámsaðstoð fyrir börn af erlendum uppruna í 8. til 10. bekk Fella- og Hólabrekkuskóla. Einnig er fyrirhugað að setja á laggirnar heimanámsaðstoð fyrir yngri bekki Hólabrekkuskóla á næstu mánuðum. Verkefnið er starfrækt í Gerðubergssafni Borgarbókasafns.

Tilgangur verkefnisins er að bregðast við ótímabæru brottfalli grunnskólabarna af erlendum uppruna og auka líkur á að þau kjósi að fara í framhaldsskóla. Megináherslan er skapandi unglingastarf sem miðar að því að opna augu ungmennanna fyrir möguleikum sem fyrir hendi eru hvað varðar framtíð þeirra og styrkja sjálfsmynd þeirra.