Vorferð barna og unglinga

19. maí 2010

Á uppstigningardag héldu börn og ungmenni sem tekið hafa þátt í Rauða kross starfi deildanna á höfuðborgarsvæðinu í sína árlegu vorferð. Um 70 manna hópur mætti við Viðeyjarhöfn og hélt af stað á vit ævintýra eyjarinnar.

Guðlaug Elísabet Ólafsdóttir tók á móti hópnum og kynnti staðarhætti. Þar er margt forvitnilegt að sjá og vel hægt að eyða löngum tíma í að spóka sig í göngutúrum um þessa fallegu eyju. Þegar Guðlaug lauk sínu máli var komið að ratleikjum. Eldri krakkarnir spreyttu sig í skyndihjálp og þrautum tengdum henni en yngri krakkarnir reyndu á kunnáttu sína um Rauða krossinn, þar sem grundvallarmarkmiðin skipuðu stóran sess.

Eftir að hópurinn hafði hlaupið um eyjuna þvera og endilanga í leit að vísbendingum var komið að því að gæða sér á pylsum sem runnu ljúflega niður í svanga maga. Þá var ekki seinna vænna en að bregða á leik áður en bátnum var náð og aftur siglt heim á leið.

Tilgangur vorferðanna er að gefa börnum og unglingum í Rauða kross verkefnum á höfuðborgarsvæðinu tækifæri að hittast og kynnast sín á milli.

Í sumar fer ungmennastarfið í sumarfrí en hefst svo aftur strax í byrjun september. Unglingar, 12 ára og eldri, geta þó skráð sig í sumarbúðir sem haldnar verða í Alviðru í 11.-15. ágúst. Nánari upplýsingar og skráningu í sumarbúðir finnurðu hér.