Smokkasjálfsalar settir upp í Flensborg

13. feb. 2007

Síðastliðinn miðvikudag afhenti Hrafnhildur Halldórsdóttir stjórnarmaður í Hafnarfjarðardeild Rauða kross Íslands fulltrúum nemenda í Flensborgarskólanum tvo smokkasjálfsala að gjöf.

Gjöf þessi er hluti af stuðningi Hafnarfjarðardeildar við forvarnastarf í þágu ungs fólks. Sjálfsölunum verður komið fyrir á kvenna- og karlasalernum í skólanum. Með þessu framtaki er ungu fólki auðveldaður aðgangur að öruggri getnaðarvörn og einu vörninni gegn kynsjúkdómum.

Í máli Hrafnhildar við afhendinguna kom fram að nýsmit klamidíu er mjög hátt á Íslandi og er ungt fólk í miklum meirihluta þeirra sem smitast. Jafnframt eru ótímabærar þunganir um 350 á ári og þar af fara um 200 stúlkur í fóstureyðingu. Lagði hún ríka áherslu á að ungt fólk stundaði ábyrgt kynlíf og að bæði kynin bæru jafna ábyrgð.

Nemendafélag skólans mun sjá um viðhald og áfyllingar á sjálfsalana.