SAMAN hópurinn fékk íslensku lýðheilsuverðlaunin

25. apr. 2007

Í gær fékk SAMAN hópurinn íslensku lýðheilsuverðlaunin 2007 fyrir að leiða saman ólíka aðila til stuðnings íslenskum foreldrum í vandasömu uppeldishlutverki þeirra. Það var Siv Friðleifsdóttir heilbrigðis- og tryggingamálaráðherra sem afhenti verðlaunin.

Íslensku lýðheilsuverðlaunin eru veitt í samræmi við áherslur á sviði forvarna og heilsueflingar. Auglýst var eftir tilnefningum til verðlaunanna og bárust á milli 40 og 50 tilnefningar frá fyrirtækjum, einstaklingum og stofnunum.

SAMAN hópurinn er samstarfsvettvangur frjálsra félagasamtaka, sveitarfélaga og stofnana sem láta sig varða velferð barna. Markmið hópsins er að styðja og styrkja foreldra, einkum í tengslum við tímabil eða sérstaka atburði þegar talið er líklegt að aukning verði á neyslu vímuefna meðal ungmenna. SAMAN hópurinn varð til um áramótin 1999 – 2000 og hefur starfað óslitið síðan. Hópurinn hefur staðið að gerð og útgáfu auglýsinga, fræðslu- og kynningarefnis til dæmis þegar 10. bekkingar útskrifast úr grunnskóla, á haustin þegar útivistartími barna styttist, á 17. júní og um verslunarmannahelgina. SAMAN hópurinn er gott dæmi um öflugt tengslanet talsmanna um lýðheilsu en í hópnum sameina krafta sína 22 sveitarfélög, opinberar stofnanir og frjáls félagasamtök.

Rauði kross Íslands er aðili að SAMAN hópnum ásamt Akureyrarbæ, Seltjarnarnesbæ, Garðabæ, Reykjavíkurborg, Hafnarfjarðarbæ, Mosfellsbæ, Sveitarfélaginu Álftanesi, Kópavogi, Barnaheill, Fræðslumiðstöð í fíknivörnum, Heilsugæslunni í Reykjavík, Heimili og skóla, IOGT, Lögreglunni á höfuðborgarsvæðinu, Nýrri leið ráðgjöf, Ríkislögreglustjóranum, SAMFOK, Umboðsmanni barna, Vímulausri æska, Þjóðkirkjunni og Lýðheilsustöð.

Handhafi íslensku lýðheilsuverðlaunanna fékk veglegan verðlaunagrip, styttu úr gleri á grágrýtisstöpli eftir Ólöfu Davíðsdóttur í Brákarey og 500 þúsund króna fjárupphæð.