Spennandi sumarmót fyrir unga fólkið

20. feb. 2008

Sumarmót Ungmennahreyfingar Rauða krossins, Viðhorf og virðing, verður haldið dagana 13.- 17. ágúst 2008 að Löngumýri í Skagafirði. Mótið er opið öllum unglingum á aldrinum 13-16 ára. Þátttökugjald er 20.000 krónur og innifalið í því er akstur til og frá Reykjavík, gisting, fullt fæði og þátttaka í öllum dagskrárliðum.

Í dagskrá mótsins er blandað saman bæði gamni og alvöru. Unnið verður með viðhorf þátttakenda til ýmissa hópa og fá þeir meðal annars tækifæri til að setja sig í spor þeirra í formi hlutverkaleikja. Einnig verður mikið lagt upp úr leikjum, ferðum, kvöldvökum og annarri skemmtun.

Mótið fer fram á íslensku en ákveðnir þættir fara fram á ensku og verða túlkaðir. Ef þörf er á túlkun fyrir erlenda þátttakendur er mikilvægt að láta vita af slíku við skráningu svo hægt sé að verða við óskum þar að lútandi.

Aðeins 30 pláss eru í boði en öðrum gefst kostur á að skrá sig á biðlista. Fljótlega eftir skráningu verður haft samband við foreldri/forráðamann unglingsins og gengið úr skugga um að um raunverulega skráningu sé að ræða. Í kjölfarið verður svo sendur út reikningur fyrir þátttökugjaldi.

Nánari upplýsingar um dagskrá og skráning með því að smella hér.