Æskulýðsgáttin ný vefsíða Landsambands æskulýðsfélaga

25. ágú. 2008

Ný vefsíða Landssambands æskulýðsfélaga, Æskulýðsgáttin, var formlega vígð þann 12. ágúst sl. á alþjóðadegi unga fólksins í höfuðstöðvum Rauða krossins við Efstaleiti. Slóðin á nýja vefinn er http://www.aeska.is.

Fulltrúar aðildarfélaga mættu á opnunina ásamt öðrum sem starfa við æskulýðsmál. Formaður LÆF, Jón Þorsteinn Sigurðsson, flutti ávarp og Hörður Gunnarsson, einn af stofnendum og fyrrverandi formaður Æskulýðssambands Íslands, ÆSÍ, sem var forveri LÆF, opnaði síðuna en nú eru 50 ár frá stofnun ÆSÍ. Hörður talaði um hina sameiginlegu hugsjón æskulýðssamtaka og mikilvægi að þau eigi vettvang.

„Æskulýðsgáttin hefur alla burði til að vera miðpunktur í upplýsingagjöf um æskulýðsmál á Íslandi, hvort sem um ræðir upplýsingar um skipan æskulýðsmála, um styrki og sjóði, um viðburði og fréttir frá aðildarfélögum LÆF sem eru 24 talsins og frá öðrum félögum og hinu opinbera. Æskulýðsgáttin er ekki eins og listaverk sem þú hengir upp á vegg heldur er í sífelldri þróun," sagði Jón Þorsteinn Sigurðsson, formaður LÆF.