Nýtt verkefni hjá Reykjavíkurdeild Rauða krossins

26. jan. 2009

Vinanet er nýtt samstarfsverkefni Ungmennadeildar R-RKÍ og Hjálparsíma Rauða krossins 1717

Hlutverk Vinanets
Vinanet er hugsað sem spjall fyrir ungt fólk á aldrinum 16-25 ára sem af einhverjum ástæðum hefur einangrað sig frá samfélaginu. Ætlunin er að ná til þessa hóps með aðstoð Internetsins en það er sá vettvangur þar sem auðvelt er að ná til sem flestra. Á Vinaneti getur fólk rætt saman á uppbyggilegan hátt um hin ýmsu málefni. Ekki er um vandamálamiðað spjall að ræða. Einu sinni í mánuði verða hittingar meðal þeirra sem eru á spjallinu ásamt sjálfboðaliðum og verður ýmislegt skemmtilegt gert eins og fara saman í bíó, í keilu, á skauta, á kaffihús og svo framvegis.

Um Vinanet
Spjallið er unnið eftir danskri fyrirmynd sem kallast Ensom Ung en þar hefur svona spjall verið starfrækt síðan 2001 og telur nú yfir 150.000 skráða notendur. Vinanet verður opið alla sunnudaga og þriðjudaga milli kl. 18:00-21:00 á slóðinni www.vinanet.is. Ungt fólk á aldrinum 16-25 er hvatt til þess að skoða síðuna, skrá sig og taka þátt í spjallinu.

Hlutverk sjálfboðaliða
Hlutverk sjálfboðaliða er að halda utan um spjallið og sjá til þess að notendur spjalli saman á jákvæðum nótum ásamt því að ýta undir að allir taki virkan þátt – bæði í spjallinu og í mánaðarlegum hittingum utan netheima. Sjálfboðaliðar verkefnisins hafa setið grunnnámskeið Vinanets og fengið þjálfun í viðtalstækni.

Formleg opnun Vinanets er sunnudaginn 1. febrúar kl 18:00.

Nánari upplýsingar veitir Garðar Örn Þórsson, verkefnastjóri Vinanets á tölvupóstfanginu gardar@redcross.is. Einnig veita Fjóla Einarsdóttir verkefnisstjóri 1717 fjola@redcross.is og Berglind Rós Karlsdóttir forstöðukona Ungmennadeildar Reykjavíkurdeildar berglind@redcross.is, nánari upplýsingar um Vinanet.