2. júl. 2010 : Hælisleitendur á ferð um Suðurland

Ellefu hælisleitendur, sem bíða þess að umsókn þeirra verði afgreidd, fóru í árlegt ferðalag um Suðurlandið síðustu helgi. Með þeim í för voru sjálfboðaliðar Hafnarfjarðardeildar sem vinna í verkefninu félagsstarf hælisleitenda.

Ferðinni var heitið til Víkur en á leiðinni var farið um Stokkseyri og Eyrarbakka og síðan var stoppað við Seljalandsfoss þar sem teknar voru myndir og létt nesti borðað.

Í Vík fékk hópurinn góðar móttökur hjá Sveini og Auði í Víkurdeild Rauða krossins. Þau upplýstu hópinn um eldgosið, hvaða áhrif það hefur haft í Vík og nágrenni og hvernig staðið var að hreinsunarstarfi meðan á gosinu stóð og nú þegar gosið hefur róast.