30 flóttamönnum boðið til landsins

4. okt. 2005

Sendinefndin hitti þessi börn í flóttamannabúðum í Sarajevo. Þar eru nú 200 manns en við stríðslok bjuggu þar rúmlega 20.000 flóttamenn.

Síðastliðið vor ákvað ríkisstjórn Íslands að bjóða til landsins 30 flóttamönnum. Stærsti hluti flóttafólksins er frá Kólumbíu en nokkrir frá Kosovo. Komu þau til landsins í ágúst og september. Börnin hófu strax nám í Austurbæjarskólanum og fullorðna fólkið er í íslenskunámi hjá Mími. Aðlögun að íslensku samfélagi gengur vel.

Rauði krossinn hefur, ásamt móttökusveitarfélagi, haft lykilhlutverki að gegna í móttöku flóttamanna. Skv. samningi við flóttamannaráð annast Rauði kross Íslands móttöku flóttamanna og veitir þeim aðstoð fyrsta dvalarár þeirra, kemur fram sem fulltrúi þeirra og veitir þeim liðveislu. M.a. eru fimm stuðningsfjölskyldur á hverja fjölskyldu flóttamanna starfandi sem sjálfboðaliðar. Að þessu sinni er það Reykjavíkurdeild Rauða krossins og Reykjavíkurborg sem annast móttökuna.

Flóttamannaráð Íslands var sett á stofn árið 1995. Síðan þá hefur verið tekið á móti 216 flóttamönnum frá Balkanskaga.

Í júní sl. fór sendinefnd á vegum ríkisstjórnarinnar til Balkanskaga í þeim tilgangi að velja þá flóttamenn sem skyldu koma frá Kosovo í ár.

Meðfylgjandi myndband er brot af mynd sem tekin var upp í þessari sömu ferð og er ætlað að gefa mynd af því ástandi sem flóttafólk á Balkanskaga býr enn þann dag í dag við, um tíu árum eftir stríðslok. Flóttamannaráð er framleiðandi myndarinnar.
 
Balkanmyndband