Rússneskt skyndihjálparnámskeið

18. apr. 2008

Rússnenskumælandi hælisleitendum sem bíða málsmeðferðar hér á landi var boðið á skyndihjálparnámskeið á dögunum og er það í fyrsta sinn sem Rauði krossinn kennir skyndihjálparnámskeið á rússnesku. Kennslan fór fram á íslensku en Svetlana Kabalina túlkaði og var búið að þýða allt námsefnið yfir á rússnensku. Leiðbeinandi var Kristján Carlsson Granz.

Farið var í grunnatriði skyndihjálpar sem nauðsynlegt er að allir kunni til að geta veitt slösuðum eða sjúkum hjálp þar til aðstoð fagfólks berst. Til að mynda var farið í hvernig tryggja á öryggi á slysstað, hvernig meta á ástand slasaðra eða veikra, hvernig losa má aðskotahlut úr öndunarvegi, hvernig meðhöndla á áverka eins og blæðingar, höfuðhögg, mænuskaða, brunasár, beinbrot og liðáverka og alvarleg veikindi eins og brjóstverk, bráðaofnæmi, flogaveiki, sykursýki, öndunarerfiðleika og heilablóðfall. Verklegar æfingar voru auk þess framkvæmdar í endurlífgun og notkun hjartarafstuðtækja.

Alls sóttu 603 einstaklingar um hæli á Íslandi frá 1990 til ársloka 2007. Af þeim fékk einn hælisleitandi stöðu flóttamanns en 53 hafa fengið dvalarleyfi af mannúðarástæðum þar af tveir á síðasta ári.