Heimsoknavinir_kaffibollar

23. sep. 2015 : Heimsóknavinir rjúfa einangrun og einsemd

Meðal margra sjálfboðaliða Rauða krossins eru um 450 heimsóknavinir um allt land. Hlutverk þeirra er fyrst og fremst að rjúfa einsemd og einangrun fólks sem af einhverjum ástæðum hefur misst samband við aðra

Heimsoknavinir_kaffibollar

27. mar. 2014 : Góð þátttaka á heimsóknavinanámskeiði

Mjög góð þátttaka var á námskeiði fyrir nýja  heimsóknavini  sem haldið var  í gærkvöldi.
 

14. ágú. 2013 : Heimsókn með hund

20. nóv. 2012 : Hundavinir - afrekshundar ársins 2012

Hundavinir Rauða krossins voru heiðraðir sem afrekshundar ársins 2012 á alþjóðlegri sýningu Hundaræktarfélags Íslands 17. nóvember síðastliðinn.

Anna Stefánsdóttir, formaður Rauða krossins á Íslandi veitti viðurkenningunni viðtöku og með henni mætti 21 heimsóknarhundur ásamt eigendum sínum.

9. feb. 2012 : Nýir söngvinir bætast í hópinn hjá Kópavogsdeild

Tveir nýjir söngvinir hafa bæst í hóp heimsóknavina Kópavogsdeildar sem taka þátt í söngstundum á dvalarheimilum fyrir aldraða. Einnig hefur nýr sjálfboðaliði sem spilar á gítar hafið störf í sambýlinu fyrir aldraða í Roðasölum. Þar spilar hann undir og syngur með vistmönnum og fleiri sjálfboðaliðum. Hann leysir einnig af í hjúkrunarheimilinu Sunnuhlíð á meðan leitað er að öðrum gítarspilara til þess að sjá um söngstundina þar á fimmtudögum.

21. okt. 2011 : Viðtal við Lovísu Guðmundsdóttur, heimsóknavin

Lovísa Guðmundsdóttir er búin að vera heimsóknavinur hjá Kópavogsdeild í hátt í tvö ár. Hún ákvað að gerast heimsóknavinur eftir að hún hætti að vinna eins og hún segir sjálf frá: „Ég ætlaði að vinna þangað til ég yrði 67 ára en því miður varð ég að hætta vegna heilsubrests. Það er ekki auðvelt að þurfa að hætta vinnu fyrir aldur og mig langaði að gera eitthvað gagnlegt. Ég vissi að Rauði krossinn væri með alls konar sjálfboðaliðastörf ég fór í Rauðakrosshúsið í Kópavogi og sé ekki eftir því.“

18. okt. 2011 : Viðtal við Sigrúnu Guðmundsdóttur, gestgjafa í heimsóknaþjónustu

Sigrún Guðmundsdóttir, sem er nýorðin 84 ára, hefur fengið til sín heimsóknavin frá Kópavogsdeild um nokkurra mánaða skeið. Dóttir Sigrúnar hafði samband við deildina fyrir hönd móður sinnar og óskaði eftir heimsóknavin fyrir hana. Sigrún og heimsóknavinurinn hittast einu sinni í viku og finnst henni það ágæt tilbreyting. Þau fara út að ganga saman og henni finnst gott að hafa stuðninginn í göngutúrunum. „Það er gott að fá félagsskapinn“, segir hún einnig og mælir með heimsóknaþjónustunni.

19. apr. 2011 : Gæðastundir í heimsóknaþjónustu

Í hverri viku fer hópur heimsóknavina Rauða krossins í heimsóknir til gestgjafa sinna til að gefa af sér gæðastund. Í heimsóknaþjónustu er lagt upp með að maður er manns gaman og snýst hún því um samveru og það að njóta félagskapar hvors annars.

Í Hafnarfirði hafa heimsóknavinir verið að störfum frá árinu 2002 og nú eru 25 sjálfboðaliðar í heimsóknaþjónustu. Heimsótt er bæði inná einkaheimili og á stofnanir. Það sem er hvað skemmtilegast við heimsóknaþjónustuna er að verkefnið er bæði fjölbreytt og sveigjanlegt. Allir geta auðveldlega tekið þátt og fundið heimsókn við sitt hæfi. Hvað gert er í heimsóknum er samkomulag á milli heimsóknavinar og gestgjafa og getur það t.d. verið spjall, lestur dagblaða, skák eða gönguferðir svo eitthvað sé nefnt.

30. mar. 2011 : Maður er manns gaman!

Heimsóknavinir er eitt eftirsóttasta sjálfboðaliðaverkefni Rauða krossins og flestar deildir félagsins eru með það á verkefnaskránni.

Þórunn Sigurðardóttir gerðist heimsóknavinur fyrir stuttu. Gestgjafi hennar er öldruð kona sem hefur áhuga á að fara í göngutúr þrátt fyrir að hún þarf að styðjast við göngugrind. Markmiðið er að hitta hana einu sinni í viku.

27. jan. 2011 : Bætist í hóp hundaheimsóknavina á Norðurlandi

Haldið var námskeið í húsnæði  Akureyrardeildar fyrir þá heimsóknavini sem vilja heimsækja með hunda. Þetta var annað námskeið þessa eðlis sem haldið hefur verið á Norðurlandi.

Þátttakendur komu frá þremur deildum á svæðinu þ.e. Akureyrar-, Skagafjarðar- og Húsavíkurdeild og voru fulltrúar frá síðastnefndu deildinni að sækja svona námskeið í fyrsta sinni.

Gunnhildur Jakobsdóttir og Brynja Tomer fluttu erindi um hjálparhunda fyrir hundaeigendurna en  að því búnu flutti námskeiðsfólk sig yfir í dvalarheimilið Hlíð þar sem fram fór úttekt á hundunum.

3. des. 2010 : Hekla er heimilishundur með hlutverk

Fyrsti hundurinn til að sinna sjálfboðnu starfi fyrir Rauða krossinn í Mosfellsbæ heitir Hekla. Hún er vinaleg blendingstík og heimilishundur Völu Friðriksdóttur líffræðings. Hekla gegnir margföldu hlutverki sem heimsóknavinur Rauða krossins.

11. nóv. 2010 : Við eldumst öll

Við eldumst öll er yfirskrift erindis sem Erlingur Jóhannsson flutti á fundi heimsóknarvina Akureyrardeildarinnar. Erindið fjallaði um rannsókn sem hann stóð fyrir á líkams- og heilsurækt aldraðra. Rannsóknin sýndi fram á að með reglubundinni og skipulagðri þol- og styrktarþjálfun geta aldraðir bætt heilsu sína og lífsgæði umtalsvert. *

Erlingur, sem er deildarforseti íþrótta-, tómstunda- og þroskaþjálfadeildar Háskóla Íslands,  lýsti því hvernig rannsóknin var gerð og fór yfir helstu niðurstöður hennar. Mjög svo áhugaverð rannsókn og efni sem í raun á erindi við alla aldurshópa.

Heimsóknarvinir Rauða krossins heimsækja aldraða og sjúka á heimili sín hvort heldur er út í bæ eða inn á stofnunum.

18. okt. 2010 : Heimsóknir með hund

Ég gerðist heimsóknarvinur með hund snemma þessa árs. Mitt verkefni er að fara með hund og heimsækja og gleðja aldraða og alzeimer sjúklinga á Droplaugarstöðum.

3. ágú. 2010 : Nærveran er gefandi

Gestum í athvarfinu Dvöl í Kópavogi líkar vel við tíkina Tinnu. Hundurinn er í eigu Þórðar Ingþórssonar forstöðumanns sem kom á óvart hve tímafrekt hundahald er. Greinin birtist í Morgunblaðinu 21.07.2010

„Hundar eru góðir fyrir geðheilsuna. Þetta er staðreynd sem bæði erlendar rannsóknir hafa sýnt fram á og einnig er þetta eitthvað sem margir hafa sjálfir upplifað,“ segir Þórður Ingþórsson forstöðumaður Dvalar í Kópavogi, athvarfs sem Kópavogsdeild Rauða krossins og bæjaryfirvöld starfrækja í sameiningu.

Þórður kemur með hundinn sinn, tíkina Tinnu, til vinnu sinnar í Dvöl sérhvern dag. Tinnu og Dvalar-gestum kemur afar vel saman og eru gestirnir sammála um að nærvera hennar sé mjög gefandi á allan hátt.

17. júl. 2010 : Hjartahreinir í heimsókn

Rauði krossinn heldur úti verkefninu Hundavinir. Í því felst að hundar heimsækja einstaklinga, stofnanir eða sambýli og gleðja fólk í kringum sig. Verkefnið er á fjórða starfsári og hefur hlotið frábærar viðtökur. Greinin birtist í Morgunblaðinu 17.07.2010.

7. maí 2010 : Heimsóknavinur með hund

Heimsóknavinir Rauða krossins eru í öllum stærðum og gerðum. Jafnvel hundar hafa tekið að sér þetta mikilvæga verkefni, með hjálp eigenda sinna. Áður en sjálfboðaliðar sem eiga hunda taka að sér heimsóknir sækja þeir námskeið á vegum Rauða krossins. Nýverið var eitt slíkt námskeið haldið en fyrirlesari á námskeiðinu var Brynja Tomer. Fyrirlesturinn var fræðandi og skemmtilegur og áttu sér stað fjörugar umræður í lok námskeiðsins.

Árlega heimsækja sjálfboðaliðar Rauða krossins hundruð einstaklinga sem eru félagslega einangraðir. Árið 2006 hófst starfsemi hundavina og er verkefnið að erlendri fyrirmynd.

26. mar. 2010 : Ferfættur vinur í Vin

Fimmtudagar eru sérstakir dagar í athvarfinu Vin að Hverfisgötu. Þá fá gestir hússins heimsókn frá vin sem segir ekki margt en er þeim mun elskulegri við alla. Bergþóra Njála Guðmundsdóttir blaðamaður á Morgunblaðinu fylgdist með og birti meðfylgjandi myndskeið.

22. feb. 2010 : Hyllti Kristján konung tíunda

Miklar eru þær breytingar sem hafa átt sér stað í íslensku samfélagi frá því hún Sigurrós fæddist fyrir hundrað árum. En áhersla hennar á að vera almennilega til fara hefur ekkert breyst á heilli öld. Greinin birtist í Morgunblaðinu 20.02.2010.

17. feb. 2010 : Fróðlegt hundaheimsóknanámskeið

Akureyrardeild Rauða krossins hélt námseið á dögunum fyrir þá heimsóknavini sem hyggjast taka hunda með sér í heimsóknir. Fjórir hundar tóku þátt og kom einn alla leið frá Skagafirði.

Í fyrri hluta námskeiðsins fengu umsjónarmenn hundanna fræðslu um verkefnið og í síðari hlutanum  voru hundarnir teknir út með tilliti til þess hvort þetta verkefni henti þeim og hvort þeir henti verkefninu.

Umsjón með námskeiðinu hafði Brynja Tomer sem er frumkvöðull að slíkum heimsóknum á vegum Rauða krossins. 

Eins og fyrr segir þá er þetta hluti af  Heimsóknavinaverkefni Rauða krossins og fyrir þá sem áhuga hafa er best að setja  sig í samband við Rauða kross deildina í sinni heimabyggð eða verkefnisstjóra heimsóknavina á landsskrifstofunni í síma 570 4000.

16. feb. 2010 : Fyrsti ferfætti heimsóknavinur Kjósarsýsludeildar

Nú er Kjósarsýsludeild komin með sinn fyrsta heimsóknavin með hund og bjóðum við þær stöllur Heklu og eigenda hennar hjartanlega velkomnar til starfa! 

Hekla heimsækir reglulega ungan mann hér í Mosfellsbæ og er hverrar heimsóknar beðið með mikilli eftirvæntingu. Hekla skemmtir sér einnig hið besta í heimsóknunum og nýtur þess að vera miðpunktur athyglinnar. 

Þó nokkur undirbúningur liggur að baki hundaheimsókna. Eigendur hundanna byrja á því að láta skoða hundinn til að ganga úr skugga um að hann henti í verkefnið. Standist hundurinn matið þarf eigandinn að ljúka þriggja tíma námskeið fyrir almenna heimsóknavini og klukkutíma námskeiði sem er sér sniðið að hundaheimsóknum. Eftir það er fundinn gestgjafi sem vill fá heimsókn frá hundi og eiganda hans.

30. nóv. 2009 : Nýir heimsóknavinir hjá Siglufjarðardeild

Námskeið fyrir heimsóknavini var haldið á vegum Siglufjarðardeildar í vikunni og sóttu það fjórir einstaklingar og var kynjaskiptin jöfn. Fyrir er öflugur hópur heimsóknavina hjá deildinni sem eingöngu var skipaður konum og var því ánægjulegt að karlmenn skulu nú hafa bæst í hópinn.
 
Námskeiðið var með hefðbundnu sniði. Leiðbeinandi var Guðný H. Björnsdóttir, svæðisfulltrúi og gjaldkeri deildarinnar Steinar Baldursson sagði frá starfi deildarinnar. Hópstjórar í heimsóknaþjónustu eru þær Margrét Guðmundsdóttir og Mundína Bjarnadóttir, stjórnarkonur í Siglufjarðardeild
 
Fyrir námskeiðið var þeim sem skráðu sig til liðsauka hjá Siglufjarðardeild nú í haust, kynnt starfsemi Rauða krossins.

25. nóv. 2009 : Gefur fólki virkilega mikið að knúsa dýr

Heimsóknir hunda frá Rauða krossinum hófust á líknardeild Landspítalans í Kópavogi í gær. Á vegum Rauða krossins er fjöldi sjálfboðaliða sem fer með hunda sína í heimsóknir á stofnanir til að gleðja vistmenn, oftast eldra fólk. Greinin birtist í Fréttablaðinu 25.11.2009.

11. nóv. 2009 : Heimsóknahundur tekur til starfa í Fjarðabyggð

Vaskur er þriggja ára, ástralskur fjárhundur, sem tók nýlega til starfa sem sjálfboðaliði Rauða krossins í Fjarðabyggð. Hann er fyrsti heimsóknahundurinn utan höfuðborgarsvæðis en heimsóknahundar hafa starfað þar í nokkur ár. 

Fyrsta heimsókn Vasks var á dvalar- og hjúkrunarheimilið Uppsali á Fáskrúðsfirði og gekk mjög vel. Hann „spjallaði" við heimilismenn sem tóku honum afskaplega vel og gáfu honum hundanammi. Þetta var skemmtileg heimsókn og Vaskur kunni athyglinni vel og hafði lítið fyrir því að heilla heimilisfólk á Uppsölum.

2. nóv. 2009 : Söngstund í Roðasölum

Aðra hverja viku heimsækir hópur heimsóknavina Kópavogsdeildar sambýli fyrir fólk með heilabilun í Roðasölum og heldur söngstund fyrir íbúana. Sjálfboðliðarnir mæta með gítarinn og söngblöð og leiða íbúana í söng. Þá er einnig upplestur á ljóðum og í lokin er öllum boðið upp á kaffi og eitthvert góðmeti.

Fyrir utan söngglöðu heimsóknavinina heimsækja aðrir sjálfboðaliðar sambýlið. Heimsóknavinur með hund kemur einu sinni í viku og þá eru heimsóknir til einstaklinga.

5. okt. 2009 : Tíkin Karólína afrekshundur ársins

Það er deildinni sönn ánægja að greina frá því að tíkin Karólína, sem sinnir heimsóknaþjónustu með eiganda sínum, var heiðruð um helgina sem afrekshundur ársins af Hundaræktarfélagi Íslands. Karólína er sex ára blendingur Border og Springer. Hún og Guðleifur eigandi hennar mynda heimsóknavinateymi sem hefur farið í heimsóknir á vegum deildarinnar síðan haustið 2007.

14. sep. 2009 : Heimsóknavinahundar kynntir á smáhundadögum í Garðheimum

Heimsóknavinir sem sinna heimsóknaþjónustu með hunda sína hjá Rauða krossinum kynntu verkefnið á smáhundadögum í Garðheimum um helgina. Heimsóknavinirnir mættu með hundana sína og báru hundarnir sérstaka klúta merkta Rauða krossinum en klútana nota þeir einnig í heimsóknum sínum. Bæklingum var dreift og sýndu gestirnir verkefninu mikinn áhuga.

31. ágú. 2009 : Heimsóknavinir með hunda leiddu Laugavegsgöngu

Hin árlega Laugavegsganga Hundaræktarfélags Íslands var farin á laugardaginn síðastliðinn en þá ganga hundaeigendur með hunda sína niður Laugaveginn. Eins og undanfarin ár voru heimsóknavinir Rauða krossins sem heimsækja með hunda sína í broddi fylkingar. Þeir hundar sem heimsækja á vegum Rauða krossins eru með sérstaka klúta merkta félaginu og stóðu þeir sig með stakri prýði í göngunni.

18. jún. 2009 : Hundaheimsókn á Grund

Heimsóknavinur með hund hóf að heimsækja heimilisfólk á hjúkrunar- og dvalarheimilinu Grund í vikunni. Heimsóknavinurinn María fór með hundinn sinn Check og heimsótti tvær deildir á Grund við góðar undirtektir fólksins þar. Sumir létu sér nægja að fylgjast með hundinum en aðrir klöppuðu honum, héldu á honum og gáfu honum meira að segja nokkra kleinubita. María og Check munu framvegis heimsækja Grund reglulega.

Kópavogsdeildin hefur boðið upp á heimsóknir með hunda í nokkur ár núna. Heimsóknavinir heimsækja með hundana sína á heilbrigðisstofnanir eins og hjúkrunarheimilið Sunnuhlíð og Rjóðrið, hvíldarinnlögn fyrir langveik börn, en einnig á einkaheimili þar sem fólk er einmana og félagslega einangrað. Þær stofnanir sem fá til sín hunda hafa allar fengið sérstakar undanþágur frá heilbrigðisyfirvöldum.

7. apr. 2009 : Spennt að fara í vinnuna

Stundum hefur verið sagt um hunda að þeir sér bestu vinir mannsins. Viðmót þeirra er fals- og fordómalaust en ávallt hlýtt og gefandi, enda vinsæll félagsskapur ungra sem aldinna, veikra sem frískra. Greinin birtist í Fréttablaðinu í dag.

18. mar. 2009 : Loðinn og fjórfættur sjálfboðaliði

Grein og myndskeið um hundaheimsókn sjálfboðaliða Rauða krossins var birt á mbl.is í dag.

4. feb. 2009 : Heimsóknavinir gefa gæðastund

Heimsóknavinir eru sjálfboðaliðar Rauða krossins sem yfirleitt heimsækja gestgjafa sína einu sinni í viku, klukkustund í senn.

24. okt. 2008 : Heimsóknanámskeið á Fljótsdalshéraði

Námskeið fyrir verðandi heimsóknavini var haldið í Kirkjuselinu í Fellabæ í samvinnu við Héraðs- og Borgarfjarðardeild Rauða krossins og safnaða Þjóðkirkjunnar í Eiða-, Vallanes og Valþjófsstaðarprestakalli.

Undanfarin ár hefur heimsóknaþjónustuhópur starfað í Egilsstaðakirkju og hafa félagar í hópnum bæði sótt einstaklinga heim og stuðlað að samverustundum á sjúkrahúsinu og á sambýli aldraðra.

Rauði krossinn hefur það á stefnuskrá sinni að rjúfa einangrun þeirra sem einhverra hluta vegna búa við einsemd og einangrun og því hafa þessir tveir aðilar ákveðið að vinna saman að verkefninu HEIMSÓKNAVINIR.

22. okt. 2008 : Nýir heimsóknavinir á Skagaströnd

Námskeið fyrir verðandi heimsóknavini á Norðurlandi var haldið á vegum Skagastrandardeildar í síðustu viku og sóttu það átta konur frá Skagaströnd og Blönduósi.

7. okt. 2008 : Heimsóknavinaverkefni að hefjast hjá Siglufjarðardeild

Námskeið fyrir verðandi heimsóknavini var haldið á vegum Siglufjarðardeildar í vikunni og sóttu það fimmtán konur.
 
Siglufjarðardeild er sú tíunda í röð deilda á Norðurlandi sem áætlar að fara í verkefnið. Hópstjórar verða þær Margrét Guðmundsdóttir og Mundína Bjarnadóttir.
 
Steinar Baldursson gjaldkeri Siglufjarðardeildar sagði frá starfsemi deildarinnar en leiðbeinandi námskeiðsins var Guðný H. Björnsdóttir, svæðisfulltrúi á Norðurlandi.

29. sep. 2008 : Heimsóknavinanámskeið Húsavík

Námskeið fyrir heimsóknavini var haldið í síðustu viku á vegum Húsavíkurdeildar Rauða krossins. Þrettán manns sóttu námskeiðið.
 
Fullur hugur er hjá deildinni að koma á þjónustu heimsóknavina á starfssvæði deildarinnar og munu hópstjórar verkefnisins þær Jóhanna Björnsdóttir og Erla Bjarnadóttir kynna málið fyrir samstarfsaðilum á næstunni.

1. júl. 2008 : Kópavogsdeild afhendir Héraðsskjalasafni Kópavogs gömul gögn

Linda Ósk Sigurðardóttir, framkvæmdastjóri Kópavogsdeildar, og Þóra Elfa Björnsson afhentu í dag Hrafni Sveinbjarnarsyni, héraðsskjalaverði, gömul gögn frá Kópavogsdeild. Þar á meðal voru bókhaldsgögn og handskrifaðar fundargerðarbækur, sú elsta frá stjórnarfundi 1977 en einnig bækur frá 1982 þegar sjúkravinahópur deildarinnar var settur á fót. Þóra Elfa sat í stjórn deildarinnar í 19 ár og skrifaði sumar fundargerðarbækurnar.

Helsta hlutverk sjúkravinanna var að skemmta heimilisfólki Sunnuhlíðar með lestri og söng en þeir stóðu einnig fyrir margvíslegum viðburðum á hjúkrunarheimilinu, eins og aðventuskemmtun, árshátíð og bingói. Sjúkravinir urðu svo síðar að heimsóknavinum en það kallast sjálfboðaliðar sem sinna heimsóknaþjónustu á vegum deildarinnar í dag. Heimsóknavinir standa enn fyrir ýmsum viðburðum í Sunnuhlíð en þeir heimsækja einnig sambýli aldraðra og á einkaheimili.

23. jún. 2008 : Hringdi og bað um vin

Ólöf Sigurrós, sem er 98 ára, fer í hverri viku á kaffihús með vinkonu sinni Bergdísi frá Rauða krossinum. Greinin birtist í 24stundum 12. júní 2008.

26. maí 2008 : Heimsóknavinir Rauða krossins í Sunnuhlíð

„Allt þetta samstarf Kópavogsdeildar Rauða krossins og Sunnuhlíðar hefur jafnan verið með miklum ágætum og öllum sem að því koma til gleði og skemmtunar."

6. maí 2008 : Lifnar yfir fólki þegar hundarnir koma í heimsókn

Kópavogsdeild Rauða kross Íslands hefur um árabil staðið fyrir heimsóknum í Sunnuhlíð, hjúkrunarheimili aldraðra, en fyrir tæpum tveimur árum var tekið upp á þeirri nýbreytni að leyfa ferfætlingum að gerast heimsóknarvinir. Greinin birtist í Morgunblaðnu 3. maí.

10. apr. 2008 : Doberman félagar hafa áhuga á að vera heimsóknavinir

Heimsóknir sjálfboðaliða með hunda fór af stað árið 2006 en það er angi af heimsóknavinaverkefni Rauða krossins sem lýtur að því að draga úr félagslegri einangrun fólks. Sífellt meiri eftirspurn er eftir því að fá hund í heimsókn og vantar orðið sjálfboðaliða til að sinna verkefninu.

Á laugardaginn fóru verkefnistjóri heimsóknarþjónustu á landsskrifstofu ásamt sjálfboðaliða, sem er heimsóknarvinur með hund, og kynntu verkefnið fyrir félögum í „Doberman Ísland“ sem er félag Doberman hundaeigenda á Íslandi. Mikill áhugi er hjá félagsmönnum að taka þátt í verkefninu og var þeim kynnt það ferli sem hundaeigendur þurfa að fara í gegnum áður en hundarnir geta farið að heimsækja á vegum Rauða krossins ásamt fleiru. 

9. apr. 2008 : Fjör á samveru heimsóknavina

Mánaðarleg samvera heimsóknavina Kópavogsdeildar var haldin í sjálfboðamiðstöðinni í gær og komu góðir gestir í heimsókn. Heimsóknavinum úr Hafnarfirði og Grindavík hafði verið boðið í því skyni að heimsóknavinir ólíkra deilda hittust, ættu góða stund saman og kynntu sér starf hvers annars.

Hópstjóri heimsóknavina í Kópavogsdeild byrjaði á því að segja frá heimsóknaþjónustu deildarinnar og síðan tóku fulltrúar úr Hafnarfjarðardeild við og sögðu meðal annars frá heimsóknum sínum til hælisleitenda. Heimsóknavinirnir úr Grindavík tóku því næst við orðinu og sögðu frá sínu starfi en þessi góði hópur kvenna kallar sig Friðarliljurnar. Þær syngja og spila fyrir sína gestgjafa og tóku lagið við góðar undirtektir hinna heimsóknavinanna. Það var því mikið líf og fjör í sjálfboðamiðstöðinni. Heimsóknavinirnir gæddu sér svo á fínum veitingum þar sem einn úr Kópavogsdeildinni hafði bakað pönnukökur og búið til kakó.

14. mar. 2008 : Heimsóknavinir Kópavogsdeildar hittast mánaðarlega

Kópavogsdeild Rauða krossins hélt mánaðarlega samveru heimsóknavina á þriðjudaginn. Alls mættu yfir tuttugu heimsóknavinir til að hlýða á erindi um þunglyndi og kvíða.

7. feb. 2008 : Heimsóknavinir á Ólafsfirði

Námskeið fyrir verðandi heimsóknavini var haldið hjá Ólafsfjarðardeild Rauða krossins í gær. Í framhaldi af námskeiðinu býður deildin í fyrsta sinn upp á heimsóknir sjálfboðaliða á sínu svæði.

Þar með bætast sjálfboðaliðar Ólafsfjarðardeildar í hóp hundruð sjálfboðaliða á landinu sem gefa sér tíma til að heimsækja þá sem búa við félagslega einangrun og leggja sitt að mörkum til að auka lífsgæði þeirra og sjálfra sín í leiðinni. 
 
Leiðbeinandi á námskeiðinu var Guðný H. Björnsdóttir svæðisfulltrúi á Norðurlandi og Sigrún Sigurðardóttir formaður Ólafsfjarðardeildar sagði frá starfi deildarinnar.

29. jan. 2008 : Austur- Húnavatnssýsludeild fer af stað með heimsóknaþjónustu

Námskeið fyrir heimsóknavini var haldið á Blönduósi á mánudaginn og sóttu það sjö konur.
 
Í kjölfar námskeiðsins bætist Austur- Húnavatnssýsludeild Rauða krossins í hóp þeirra deilda sem bjóða upp á þjónustu heimsóknavina.
 
Námskeiðið var með hefðbundnu sniði. Farið var yfir tilgang verkefnisins og verklag. Leiðbeinandi var Guðný H. Björnsdóttir svæðisfulltrúi á Norðurlandi og Einar Óli Fossdal formaður Austur -Húnavatssýsludeildar sagði frá starfi deildarinnar.

10. des. 2007 : Heimsóknavinir á hjúkrunarheimilinu Fellsenda

Búðardalsdeild Rauða krossins hóf í haust heimsóknir á hjúkrunarheimilið Fellsenda í Dölum. Á Fellsenda er heimili fyrir 28 geðfatlaða einstaklinga á efri árum lífs síns. Flestir búa langt frá heimahögum og aðstandendum og er því vel þegið að fá þessar heimsóknir frá sjálfboðaliðum Rauða krossins.

Sjálfboðaliðarnir sóttu námskeið fyrir heimsóknavini sem heimsækja geðfatlaða. Hafa þeir mikla ánægju af heimsóknunum ekki síður en þeir sem heimsóttir eru og starfsfólk heimilisins.
 
Mikið hefur verið rætt og hlegið, tekið í spil og listaverk heimilismanna skoðuð. Þegar eru komnar hugmyndir um að fjölga sjálfboðaliðum í þetta verkefni sem og að fjölga stöðum sem yrðu heimsóttir.

3. des. 2007 : Samverustund stjórnenda heimsóknavina

Árleg samvera hóp- og verkefnisstjóra heimsóknavina var haldin á laugardaginn. Alls mættu 27 manns víðsvegar að af landinu. Veðrið setti strik í reikninginn en útlit var lengi vel fyrir að fólk kæmist ekki frá Akureyri og Austfjörðum. Austfirðingarnir komust með miklu harðfylgi eftir hádegi og náðu í skottið á samverunni.

Tekið var fyrir hvernig hóp- og verkefnisstjórar gætu veitt sjálfboðaliðum í heimsóknaþjónustu handleiðslu og sálrænan stuðning. Þá var fjallað um heimsóknir til fólks með geðraskanir og meðal annars kom heimsóknavinur sem fer á sambýli til fólks með geðraskanir og sagði frá reynslu sinni.

5. nóv. 2007 : Heimsóknarvinahundar fremstir í flokki í hundagöngunni

Laugardaginn 3. nóvember stóð Hundaræktarfélag Íslands fyrir árlegri göngu með hunda niður Laugaveginn. Fjölmennt var í göngunni og ýmsar tegundir hunda skörtuðu sínu fegursta.

Hundar og eigendur þeirra sem starfa sem sjálfboðaliðar í heimsóknarþjónustu fyrir Rauða kross Íslands voru fremstir í flokki og fóru fyrir göngunni.

27. okt. 2007 : Þjónusta heimsóknavina nú í boði á Hvammstanga

Enn fjölgar deildum sem bjóða þjónustu heimsóknavina. Haldið var námskeið fyrir verðandi heimsóknavini á Hvammstanga á þriðjudaginn. Fimm konur sóttu námskeiðið, en fyrirhugað er að koma verkefninu í gang sem fyrst og verður það í samvinnu við kirkjuna á staðnum.

Heimsóknavinir eru sjálfboðaliðar, sem hafa það að markmiði að rjúfa einsemd og félagslega einangrun með heimsóknum,spjalli, göngutúrum og öðru því sem hentar hverju sinni. 

24. okt. 2007 : Heimsóknavinir Rauða krossins leita að gestgjöfum

Á laugardag lauk námskeiði fyrir heimsóknavini sem var í boði allra deilda á Vestfjörðum. Sautján heimsóknavinir hafa bæst í hóp sjálfboðaliða Rauða krossins og margir þeirra sem sóttu námskeiðið sögðust vera að sækjast eftir vináttu og félagsskap um leið og þeir vilja láta gott af sér leiða.

Einn heimsóknavinur taldi það ávinning fyrir barnið sitt að fá að kynnast eldra fólki sem gæti komið í stað afa eða ömmu og hlakkaði því til að fá tækifæri til að heimsækja eldri borgara. Eldri borgarar búa oft yfir reynslu sem er verðmæt fyrir sjálfboðaliðana þannig að báðir hafa þess vegna eitthvað að gefa og þiggja.

23. okt. 2007 : Fjölgun í hópi heimsóknavina á Stöðvarfirði

Haldið var heimsóknavinanámskeið á Stöðvarfirði á fimmtudaginn fyrir nýja sjálfboðaliða í heimsóknaþjónustu sem komu frá Stöðvarfirði og Egilsstöðum.

Heimsóknaþjónusta er eitt af öflugustu verkefnum Stöðvarfjarðardeildar Rauða krossins og eftir námskeiðið eru 11 starfandi heimsóknavinir á svæðinu.

Heimsóknavinir eru sjálfboðaliðar sem rjúfa einsemd og félagslega einangrun með heimsóknum og veita félagsskap með spjalli, göngutúrum, handavinnu, ökutúrum og margt fleira. Meiri hluti þeirra sem notfæra sér þjónustuna á Stöðvarfirði eru aldraðir.

18. okt. 2007 : Nýir heimsóknavinir Víkurdeild

Mikill áhugi er fyrir því að hefja starfsemi heimsóknavina hjá Víkurdeild. Námskeið til undirbúnings fyrir heimsóknavini var því haldið hjá deildinni á þriðjudaginn.

15. okt. 2007 : Sjálfboðaliðar Rauða krossins gegn einsemd og einangrun

Grein um starf og verkefni Rauða krossins í Kópavogi eftir Geir A. Guðsteinsson blaðamann sem birtist í Kópavogsblaðinu.

 

3. okt. 2007 : Heimsóknavinanámskeið í Skagafrði

Námskeið fyrir heimsóknavini var haldið hjá Skagafjarðardeild Rauða krossins á þriðjudaginn. Góður andi var á námskeiðinu og hugur í konunum. Heyrðist á þeim að þær hefðu mikla ánægju af að vera í verkefninu og góð tilfinning að geta látið eitthvað gott af sér leiða og fá það margfalt til baka.

Heimsóknaþjónusta hefur verið starfrækt hjá deildinni frá því árið 2001 í samvinnu við Sauðárkrókskirkju og Fjölskylduþjónustu Skagafjarðar.

Sjálfboðaliðar heimsækja gestgjafa og veita félagsskap eftir samkomulagi, svo sem að spjalla eða lesa. Hlutverk þeirra er fyrst og fremst að veita félagsskap, nærveru og hlýju.

28. ágú. 2007 : Heimsóknavinir og margmenning

Viðtal við Ásu S. Harðardóttur starfsmann Borgarfjarðardeildar Rauða krossins eftir Guðrúnu Völu Elísdóttur blaðamann á Morgunblaðinu. Birt í Morgunblaðinu 27. ágúst.

6. jún. 2007 : Sunnuhlíð fagnar 25 ára afmæli

Fulltrúar Kópavogsdeildar Rauða krossins samfögnuðu hjúkrunarheimilinu Sunnuhlíð á 25 ára afmælinu sem haldið var hátíðlegt í síðustu viku. Við það tækifæri færði Kópavogsdeild hjúkrunarheimilinu ferðatæki með geislaspilara að gjöf sem mun nýtast við spilun á tónlist í virkninni þar sem heimilisfólk stundar ýmsa handavinnu.

Reynir Guðsteinsson, varaformaður Kópavogsdeildar, flutti Sunnuhlíð kveðju frá deildinni og minnti á hvernig leiðir Sunnuhlíðar og deildarinnar hafa legið saman frá upphafi hjúkrunarheimilisins.

Sunnuhlíð er fyrsta sérhannaða hjúkrunarheimilið fyrir aldraða á Íslandi og hóf rekstur árið 1982. Kópavogsdeild var í hópi fjölmargra félagasamtaka í Kópavogi sem stóðu að byggingu Sunnuhlíðar og hefur stutt myndarlega við bakið á uppbyggingu og starfi heimilisins með styrkjum, gjöfum og sjálfboðnu starfi.

29. maí 2007 : Heimsókn heimsóknavina Akranesdeildar í Kópavogsdeild

Ellefu heimsóknavinir Akranesdeildar Rauða krossins sóttu Kópavogsdeild heim í vikunni. Með í för var Anna Lára Steindal verkefnastjóri.

16. maí 2007 : Fjórfættir heimsóknavinir Rauða krossins

Grein þessi birtist í Sámi, blaði Hundaræktarfélags Íslands. Inga Björk Gunnarsdóttir blaðamaður tók viðtal við Lindu Ósk Sigurðardóttur og Bjarna Sigurðsson.

7. maí 2007 : Námskeið heimsóknavina í Öxarfjarðardeild

Námskeið fyrir heimsóknavini var haldið í Öxarfjarðardeild mánudaginn 30. apríl og sóttu það 11 manns. Þetta er annað námskeiðið sem deildin heldur en hið fyrra var haldið fyrir tveimur árum og hefur heimsóknaþjónusta verið starfrækt síðan.

10. apr. 2007 : Sjálfboðaliðar hressa upp á daginn

Heimsóknarþjónusta kvennadeildar Reykjavíkurdeildar Rauða kross Íslands er þarft og nauðsynlegt verkefni. Sigrún Ásmundar spjallaði við Örn Ingimundarson og Brynhildi Stefánsdóttur, en þau eru sjálfboðaliðar í heimsóknarþjónustunni. Greinin birtist í Morgunblaðinu þann 15. nóvember 2006.

16. feb. 2007 : Námskeið heimsóknavina í Árnesingadeild

Námskeið fyrir heimsóknavini var haldið hjá Árnesingadeild 13.febr. sl.  Heimsóknavinir hafa verið starfandi á vegum deildarinnar um nokkurra ára skeið, en starfsemin farið mjög vaxandi á þessum vetri. Hópstjóri heimsóknavina er Ragnheiður Ágústsdóttir, starfsmaður Árnesingadeildar.

Svæðisfulltrúi setti námskeiðið og síðan sagði Ragnheiður Ágústsdóttir m.a. frá starfsemi heimsóknavina deildarinnar.

23. jan. 2007 : Heimsóknavinanámskeið í Hveragerði

Hveragerðisdeild Rauða krossins stóð fyrir námskeiði fyrir heimsóknavini í húsnæði sínu að Austurmörk 7 í Hveragerði, miðvikudaginn 17.  janúar.

Þátttaka var góð og áhugi á málefninu mikill. Nokkrir komu frá Selfossi þar sem nú þegar er öflugt starf heimsóknavina. Einnig voru þátttakendur frá Þorlákshöfn, en þar verður kynning á verkefninu 22. janúar og stefnt að námskeiði í framhaldi af því.

18. jan. 2007 : Heimsóknavinir í Árnesingadeild kynna verkefnið

Árnesingadeild Rauða krossins stóð fyrir kynningu á Selfossi á verkefni heimsóknavina. Ragnheiður Ágústsdóttir starfsmaður Árnesingadeildar, sem er hópstjóri heimsóknavina á Selfossi, sagði frá starfsemi hópsins

16. jan. 2007 : Heimsóknavinir að hefja starf á Húsavík

Námskeið fyrir verðandi heimsóknavini hjá Húsavíkurdeild Rauða krossins var haldið í gær. Leiðbeinandi var Guðný H. Björnsdóttir svæðisfulltrúi og Elsa Björk Skúladóttir formaður Húsavíkurdeildar sagði frá starfsemi deildarinnar. Þátttakendur á námskeiðinu voru 11.

11. jan. 2007 : Öflugt starf heimsóknavina í Skagafirði

Mánaðarlegur samverufundur heimsóknavina í Skagafjarðardeild Rauða krossins var haldinn í vikunni. Að þessu sinni mættu góðir gestir frá landsskrifstofunni, Linda Ósk verkefnisstjóri í heimsóknaþjónustu og Guðný svæðisfulltrúi. Auk þeirra mættu 14 konur.

11. des. 2006 : Flóamarkaður Árnesingadeildar

Þann 1. desember hélt hópur heimsóknavina Árnesingadeildar Rauða krossins flóamarkað í húsnæði deildarinnar að Eyrarvegi 23 á Selfossi. Fatnaður, sem deildin fékk frá fataflokkun Rauða krossins í Hafnarfirði, var þar til sölu, ásamt ýmsu prjónalesi frá prjónahóp deildarinnar. Margir lögðu leið sina í Rauðakrosshúsið þennan dag og virðist einsýnt að þetta muni verða árvisst fyrir jólin, þar sem undirtektir voru svo jákvæðar.  

Mikið úrval var af fatnaði fyrir fólk á öllum aldri og var hægt að gera mjög góð kaup, enda verðið mjög hagstætt. Fullur plastpoki af fatnaði kostaði aðeins þúsund krónur og var fólk afar ánægt með það fyrirkomulag.

7. des. 2006 : Heimsókavinir á Stöðvarfirði

Stöðvarfjarðardeild Rauða kross Íslands bauð nýverið heimsóknavinum sem starfa með eldri borgurum og þeim sem áhuga hafa á að vinna við heimsóknaþjónustu upp á fyrirlestur um Sorg og sorgarviðbrögð eldri borgara. Fyrirlesari var séra Gunnlaugur Stefánsson.

6. des. 2006 : Efling heimsóknarþjónustu á Suðurlandi og Suðurnesjum

Hjá deildum Rauða krossins á Suðurlandi og Suðurnesjum er í gangi sérstakt átak til að efla starfsemi heimsóknarvina. Þetta er gert með kynningu á verkefninu, bæði meðal sjálfboðaliða og annarra félagsmanna Rauða kross deilda og einnig meðal annarra félagasamtaka og almennings. Haldnir hafa verið kynningarfundir og hefur þátttaka og undirtektir verið góðar. 

Þann 22. nóvember var kynning í Vík í Mýrdal og var þátttaka góð, þrátt fyrir leiðinlegt vetrarveður og erfiða færð. Tveir sjálfboðaliðar, annar frá Árnesingadeild og hinn frá Rangárvallasýsludeild, sögðu frá reynslu sinni af því að vera heimsóknarvinir. Fundarmenn sýndu málefninu áhuga og sköpuðust ágætar umræður og í kjölfar kynningarinnar verður stefnt að námskeiði fyrir heimsóknarvini.

15. feb. 2006 : Fjölgun í hópi heimsóknavina Kópavogsdeildar

Hluti af þátttakendum á námskeiði fyrir heimsóknavini.
Kópavogsdeild hélt í kvöld námskeið fyrir nýja sjálfboðaliða í heimsóknaþjónustu. Nýir heimsóknavinir munu því hefja störf á næstunni enda ekki vanþörf á þar sem deildin hefur fengið allmargar óskir um heimsóknir sjálfboðaliða að undanförnu. Meirihluti þeirra sem notfæra sér þjónustuna eru aldraðir en þó eru nokkrir yngri, allt niður í tvítugt.

Heimsóknavinir eru sjálfboðaliðar sem rjúfa einsemd og félagslega einangrun með heimsóknum á einkaheimili eða stofnanir. Heimsóknavinir veita félagsskap m.a. með því að spjalla, lesa fyrir viðkomandi og fara í gönguferðir. Heimsóknir eru að jafnaði einu sinni í viku í klukkustund.