Microsoft Íslandi aðstoðar flóttamenn

16. jan. 2006

Elvar Steinn Þorkelsson, framkvæmdastjóri Microsoft, Katla Þorsteinsdóttir, framkvæmdastjóri Reykjavíkurdeildar Rauða krossins og Karen Theodórsdóttir, verkefnisstjóri Reykjavíkurdeildar Rauða krossins.
Nýjar tölvur og hugbúnaður hjálpa til við aðlögun að íslensku samfélagi
Microsoft Íslandi afhenti á dögunum Reykjavíkurdeild Rauða krossins hugbúnað að gjöf. Rauði krossinn mun svo útdeila honum til flóttamannafjölskyldna sem komu hingað til lands frá Kosovo og Kólumbíu í haust. Hugbúnaðurinn, Microsoft Windows XP stýrikerfi og Microsoft Office, verður notaður í tölvur sem flóttamennirnir hafa fengið að gjöf frá velunnurum Rauða krossins.

Fjölskyldurnar sem um ræðir eru sjö talsins, ein sjö manna fjölskylda frá Kosovo og sex einstæðar mæður frá Kólumbíu með alls 18 börn á sínu framfæri. Hver fjölskylda fær sína eigin tölvu með hugbúnaðinum frá Microsoft uppsettum. Allir fjölskyldumeðlimir stunda nú íslenskunám af miklum krafti og munu tölvurnar og hugbúnaðurinn hjálpa þeim umtalsvert við að fóta sig í nýju landi.

Karen Theodórsdóttir, verkefnisstjóri hjá Reykjavíkurdeild Rauða krossins, segir miklu máli skipta fyrir flóttafólkið að hafa aðgang að tölvum og Internetinu á heimilum sínum. „Það er mikilvægt við íslenskunámið, því bæði geta hinir fullorðnu nýtt tölvurnar við fjarnám og börnin þurfa ekki lengur að vinna öll sín verkefni á tölvustofum skólanna eins og verið hefur. Jafnframt á fólkið auðveldara með að halda sambandi við ættmenni erlendis og fylgjast með fréttum frá fyrri heimaslóðum. Þessi gjöf frá Microsoft á því eftir að reynast kærkomin."

Hjá Microsoft Íslandi var beiðni Rauða krossins um aðstoð vel tekið. „Þegar þau höfðu samband vegna þessa máls var okkur ljúft og skylt að bregðast við því. Tölvan er orðin eitt mikilvægasta tækið sem við notum í daglegu lífi og það segir sig sjálft að aðlögun nýrra Íslendinga að samfélaginu er mun erfiðari ef enginn aðgangur er að heimilistölvu og Internetinu," sagði Elvar Steinn Þorkelsson, framkvæmdastjóri Microsoft Íslandi. „Við vonum að þessi aðstoð muni koma að góðum notum og óskum fjölskyldunum gæfu og velfarnaðar í framtíðinni."

Microsoft Íslandi leggur mikið upp úr því að vera ábyrgur þegn í íslensku þjóðfélagi og rétta fram hjálparhönd þegar mikið liggur við, enda er Microsoft þekkt um allan heim fyrir framlög sín til þróunaraðstoðar og samfélagslegra verkefna. „Þessi gjöf til Rauða krossins er eitt fjölmargra samfélagsverkefna sem við munum taka þátt í á árinu," segir Elvar Steinn Þorkelsson.