Fatapakkar til Malaví

6. feb. 2008

Sjálfboðaliðar Kópavogsdeildar í verkefninu Föt sem framlag komu saman í sjálfboðamiðstöðinni til að ganga frá ungbarnafötum í þar til gerða pakka sem sendir verða til barna í neyð í Malaví. Pakkarnir urðu 198.

Fötin eru afrakstur prjónavinnu sjálfboðaliðanna síðustu mánaða en síðasta miðvikudag hvers mánaðar hittast sjálfboðaliðarnir í prjónakaffi í sjálfboðamiðstöðinni og fá þá garn með sér heim til að prjóna ungbarnaföt eins og peysur, teppi, húfur og sokka. Einnig fara samfellur, treyjur, handklæði og taubleyjur í pakkana.

Tilgangurinn með verkefninu Föt sem framlag er að mæta skorti á barnafötum á svæðum þar sem neyð ríkir en í almennum fatasöfnunum berst minnst af barnafötum. Handavinnan miðar að því að draga úr þessum skorti.

Þörfin fyrir fötin er því sannarlega fyrir hendi og er kærkomið fyrir Kópavogsdeild Rauða krossins að fá fleiri sjálfboðaliða í hópinn sem hafa gaman af hannyrðum. Áhugasamir eru því eindregið hvattir til að hafa samband við deildina í síma 554 6626 eða á kopavogur@redcross.is.