Evrópuvika gegn kynþáttamisrétti

18. mar. 2008

Ungmennahreyfing Rauða kross Íslands tekur ásamt sex öðrum félagasamtökum þátt í Evrópuviku gegn kynþáttamisrétti sem stendur 15.-21. mars. Vikan nær hámarki á lokadeginum 21. mars sem Sameinuðu þjóðirnar völdu sem alþjóðadag gegn kynþáttamisrétti. Þann dag árið 1960 voru 69 manns sem tóku þátt í mótmælum gegn aðsklilnaðarstefnu stjórnvalda í Suður Afríku myrtir í Soweto.

Evrópuvikan miðar að því að uppræta mismunun, fordóma og þjóðernishyggju í álfunni og stuðla þannig að umburðarlyndu Evrópusamfélagi þar sem allir eru jafnir, óháð útliti og uppruna.

Birtingarmyndir kynþáttamisréttis eru ólíkar eftir löndum og menningarsvæðum en kynþáttamisrétti nær yfir vítt svið - allt frá fordómum til ofbeldisverka. Kynþáttamisrétti á Íslandi birtist helst í útlendingafælni og duldum fordómum gagnvart fólki af erlendum uppruna en hefur því miður nýlega einnig brotist út í ofbeldi. Fordómarnir birtast einkum í hversdagslífinu - þegar talað er niður til þeirra sem ekki eru skilgreindir sem ,,hreinir” Íslendingar og þeir fá lakari þjónustu og atvinnu.

Á síðustu mánuðum hafa málefni innflytjenda verið ofarlega á baugi og það er áhyggjuefni hversu mjög hefur borið á fordómum og útlendingafælni í umræðunni. Í árslok 2007 voru erlendir ríkisborgarar 6,8% af heildarmannfjölda á Íslandi; það er staðreynd að íslenskt samfélag er fjölmenningarlegt og því verður ekki breytt. Til að vinna gegn misrétti og fordómum í garð fólks af erlendum uppruna á Íslandi tekur Rauði krossinn auk  Mannréttindaskrifstofu Íslands, Þjóðkirkjunni, Alþjóðahúsi, Amnesty International, Ísland Panorama og Soka Gakkai Íslandi þátt í Evrópuviku gegn kynþáttamisrétti með ýmsum hætti.

Ungmennahreyfingin býður upp á fjölmenningarspjall í Smáralindinni í dag

Ungmennahreyfing Rauða krossins verður í Smáralindinni í dag frá klukkan 16 - 18 og býður upp á fjölmenningarspjall. Einnig munu Hara-systur vera með tónlistaratriði. Allir hjartanlega velkomnir.