Hjálparsíminn og athvörf Rauða krossins opin yfir hátíðirnar

22. des. 2011

Einmana fólk sem sumt á engan að hringir mikið í Hjálparsíma Rauða krossins 1717 yfir hátíðirnar. Svarað er í símann allan sólarhringinn, allan ársins hring en um eitthundrað vel þjálfaðir sjálfboðaliðar, margir í námi í félagsráðgjöf og sálfræði í Háskóla Íslands sjá um að vakta Hjálparsímann.

Í hjálparsíma Rauða krossins 1717 er fólki veittur stuðningur til að mynda vegna þunglyndis, kvíða, fjármálaáhyggja, vanlíðunar eða einsemdar. Þar eru einnig veittar upplýsingar um samfélagsleg úrræði, matarúthlutanir, ókeypis hátíðarmálsverði og opnunartíma ýmissa athvarfa. Á liðnum árum hafa borist um 200 hringingar frá Þorláksmessu fram á annan í jólum, og svipaður fjöldi á gamlárs- og nýársdag. Þeir sem hringja inn er afar þakklátir fyrir að geta rætt við einhvern um sín mál því þessi tími árs reynist mörgum erfiður, sérstaklega þeim sem eru einir um jólin.

Konukot, athvarf fyrir heimilislausar konur, Eskihlíð 4, verður opið allan sólarhringinn yfir hátíðirnar. Þar verður hefðbundinn jólamatur á boðstólum; hamborgarhryggur, hangikjöt, laufabrauð og heimalagaður ís. Þar er fallega skreytt innanhúss sem utan og fá konurnar gjafir sem gjarnan innihalda flíkur, bækur, konfekt og snyrtivörur. Bæði sjálfboðaliðar og velunnar koma að starfinu í athvarfinu í þeim tilgangi að skapa þar heimilisleg og hátíðleg jól. Á milli jóla og nýárs er Konukot opið frá 17:00 til hádegis daginn eftir.

Vin, athvarf fyrr fólk með geðraskanir, Hverfisgötu 47, býður upp á jólakaffi  frá 14:00-17:00 á annan í jólum. Í Vin verður annars lokað yfir jólahátíðina, þann 27. desember og á gamlársdag, en annars er opið samkvæmt venju á milli jóla og nýárs.

Dvöl, athvarf fyrir geðfatlaða, Reynihvammi 43 í Kópavogi, verður opið frá 09:30-15:30 virka daga á milli jóla og nýárs.

Rauðakrosshúsið í Kópavogi, Hamraborg 11, verður opið alla virka daga frá 11:00-15:00.

Tveir sendifulltrúar Rauða krossins verða að störfum á vettvangi yfir jólin, Það eru þær Áslaug Arnoldsdóttir og Hólmfríður Garðarsdóttir, hjúkrunarfræðingar, sem báðar starfa í Írak.