Austurbæjarbíó – Hús unga fólksins!

9. jún. 2009

Austurbæjarbíó - Hús Unga Fólksins opnar formlega þriðjudaginn 9. júní.
Húsið verður miðstöð fyrir ungt  fólk sem vill virkja krafta sína í frjóu og hvetjandi umhverfi.
Skráning í verkefnið

Verkefnið er samstarfsverkefni Rauða krossins í Reykjavík, Samfélagsins Frumkvæði ( www.frumkvaedi.is ), Hins Hússins,  Lýðheilsustöðvar og Sambands Íslenskra Framhaldsskólanema. Nánari upplýsingar veitir Þór Gíslason hjá Rauða krossinum í Reykjavík í síma 545-0406 eða netfang: thorgisla@redcross.is 
 
Markmið miðstöðvarinnar er að bjóða upp á aðstoð og aðstöðu við framkvæmd hugmynda ungs fólks, bjóða upp á fjölbreytilega dagskrá í húsinu og virkja krafta ungs fólks við andlitslyftingu Austurbæjarbíós ásamt því að bjóða upp á hressingu. Haft verður að leiðarljósi að skapa vettvang þar sem öllum er frjálst að koma á sínum eigin forsendum og taka þátt í verkefnum með öðru fólki í góðu umhverfi.

Austurbæjarbíó er hugsað sem miðstöð þar sem ungt fólk fær aðstoð við framkvæmd verkefna sinna, hvort sem þau eru á byrjunarstigi eða lengra komin, tengd viðskiptum, listgreinum eða hverju sem er. Hægt er að sækja um styrki til að vinna ýmis verkefni, nánari upplýsingar gefur starfshópur Austurbæjarbíós.

Hér má nálgast upplýsingar og umsóknareyðublað hjá Lýðheilsustöð (http://www.lydheilsustod.is/ungt-folk/heilsa-og-lifsstill/styrktarsjodur/nr/2787)

Austurbæjarbíó - Hús Unga Fólksins býður, eins og nafnið gefur til kynna, upp á fjölbreytilega dagskrá sem boðin er þátttakendum þeim að kostnaðarlausu og er öllu ungu fólki opin.

Ertu með góða hugmynd sem þarf að framkvæma sem fyrst?
Langar þig að hitta annað fólk með svipaðar hugmyndir?
Viltu gera þér dagamun, fá þér hressingu, sýna þig og sjá aðra?  
Viltu gerast sjálfboðaliði við uppbyggingu og andlitslyftingu Austurbæjarbíós?
Viltu taka þátt í áhugaverðum námskeiðum og verkefnum?
Þá er Austurbæjarbíó vettvangur þinn!
Engar sérstakar kröfur eða skilmálar eru settar verkefnunum sem fram fara í húsinu, þó eru undantekin verkefni sem stangast á við almenn lög eða reglur hússins. Reynt verður þó eftir fremsta megni að koma til móts alla sem vilja koma hugmyndum sínum í verk.

Haldin verða námskeið og samstarfshópar myndaðir um hvaðeina sem áhuga vekur hverju sinni.  Lögð er áhersla á að virkir þátttakendur í sumarstarfi Austurbæjarbíós leiði mótun dagskrár hússins og haldi utan um verkefnin.

Opnunarhátíðin fer fram með pomp og prakt þriðjudaginn 9. Júní og mun skrúðganga fara af stað kl. 18 frá klukkunni á Lækjartorgi.
Leiðin liggur upp í Austurbæjarbíó þar sem tekið verður á móti gestum með grillpartýi, kynningu á starfi hússins og ýmsum tónlistaratriðum. Við hvetjum alla til að mæta og fagna opnun hússins.

Húsið verður opið á milli 10 og 18 alla virka daga í sumar.
Dagskráin er auglýst jafn óðum á heimasíðunni www.frumkvæði.is  og svo á facebook, hópurinn er Austurbæjarbíó!

Láttu sjá þig á þriðjudaginn!
Austurbæjarbíó- Hús Unga Fólksins.