Landsfélög Rauða krossins og Rauða hálfmánans

23. maí 2004

Í nær öllum sjálfstæðum ríkjum heims hefur verið stofnað landsfélag Rauða krossins eða Rauða hálfmánans. Sérhvert landsfélag þarf að vera viðurkennt af ríkisstjórn í viðkomandi landi, Alþjóðasambandinu og Alþjóðaráði Rauða krossins. Í flestum löndum er landsfélagið kennt við Rauða krossinn en í flestum löndum múslíma er notað táknið rauður hálfmáni á hvítum grunni.

Landsfélögin standa fyrir heilbrigðis-, öryggis- og velferðarstarfi en starfa óháð hvert öðru. Samt sem áður er það skylda þeirra að aðstoða hvert annað ef þörf krefur og starfa í anda hinna sjö grundvallarmarkmiða alþjóðahreyfingarinnar; mannúðar, óhlutdrægni, hlutleysis, sjálfstæðis, sjálfboðins starfs, einingar og alheimshreyfingar.

Sérhvert landsfélag vinnur að málefnum sem þörf er á í viðkomandi landi. Á meðal þess sem landsfélögin vinna að er: 

  • fræðsla um mannúðarsamninga sem undirritaðir hafa verið,
  • sjá um þjónustu í tengslum við neyðarvarnir,
  • rekstur heilsugæslustöðva,
  • fræðsla til almennings vegna málefna sem tengjast verkefnum Rauða krossins og Rauða hálfmánans eins og heilbrigði og öryggi,
  • blóðgjafaþjónusta,
  • ungmennastarf.


Öll landsfélög Rauða krossins og Rauða hálfmánans byggja starf sitt á sjálfboðavinnu og er stjórnað af sjálfboðaliðum.