IMG_1021

3. apr. 2014 : Byrjað á núlli í einu fátækasta héraði Malaví

Ómar Valdimarsson, sendifulltrúi og verkefnisstjóri Rauða krossins, hélt fyrirlestur um störf sín í Masanje í Mangochi héraði í Malaví

14. feb. 2014 : Söfnuðu fyriri vatnsbrunni í Afríku

Nemendur í Menntaskólanum á Akureyri unnu á dögunum að verkefni sem þau kölluðu „Áhrif mín á samfélagið.“ Þetta var eins og nafnið bendir til samfélagsverkefni þar sem nemendur skoðuðu hvernig hægt er, stundum með auðveldum hætti að bæta líf okkar og annarra í samfélaginu. Fjórir nemendur; Arney Líf Þórhallsdóttir, Anna Lilja Valdimarsdóttir, Guðfinna Rós Sigurbrandsdóttir og Þóra Katrín Erlendsdóttir, völdu Rauða kross verkefni sem snýr að vatnsbrunnum í Afríku.

6. júl. 2011 : Árangursríkt starf í Malaví

„Starfið í þágu alnæmissmitaðra í Malaví er mjög öflugt og hefur greinilega skilað árangri," segir Bernard Gardiner sem um þessar mundir er að gera úttekt á aðstoð Rauða krossins vegna alnæmisvandans í sunnanverðri Afríku. Hann hefur ásamt nokkrum öðrum sérfræðingum á þessu sviði metið árangurinn af starfinu í tíu löndum og er Malaví þar á meðal.

Rauði krossinn hér heima hefur um árabil stutt alnæmissmitaða í Malaví og hafa regluleg framlög frá mannvinum Rauða krossins runnið m.a. til þessa starfs.

3. jún. 2011 : Gaf fermingarpeninga til Malaví

Anna Rún Arnfríðardóttir, nemandi í 8. bekk Kópavogsskóla, kom færandi hendi til Kópavogsdeildar Rauða krossins með peningagjöf að upphæð 20.000 krónur. Upphæðin var hluti peninga sem hún fékk í fermingargjöf og vildi Anna Rún láta þessa fjárhæð renna til góðs. Hún óskaði eftir því að gjöfin rynni til alþjóðaverkefna en hún tók þátt í að ganga til góðs síðastliðið haust og vildi að styrkurinn rynni í sama málstað.

Styrkurinn verður því nýttur í starf Rauða kross Íslands í Malaví en þar hefur félagið unnið með malavíska Rauða krossinum síðan 2002. Mikill árangur hefur náðst í starfi Rauða kross í Malaví í þau ár sem samvinnan hefur staðið og má til að mynda nefna að árið 2009 nutu um 3.600 börn aðstoðar og fengu tækifæri til að sækja skóla ásamt því að fá fæði og klæði og félagslegan stuðning.

22. feb. 2011 : Brennandi áhugi sjálfboðaliða Rauða krossins í Mangochi

Hannock Masanga formaður Mangochi deildar malavíska Rauða krossins er stoltur af sínu fólki. Alls 2.500 sjálfboðaliðar í 47 undirdeildum sinna víðtæku hjálparstarfi á svæði þar sem þarfirnar eru miklar en Rauða krossinum þröngur stakkur skorinn.

1. feb. 2011 : Bjartar vonir um góða uppskeru stuðningshópa í Malaví

Stuðningshópar alnæmissmitaðra í Chiradzulu eru himinlifandi yfir góðum spretti maísins sem þeir plöntuðu í nóvember. Rigningarnar hafa verið stöðugar þetta árið og ef fram heldur sem horfir verður úrvalsuppskera í mars.

Hins vegar verða næstu vikur erfiðar og hungurvofan er ekki langt undan. Uppskeran í fyrra var nefnilega rýr og margir eru þegar orðnir uppiskroppa með maísmjöl.

31. jan. 2011 : Þróunarsamvinnustofnun og Rauði krossinn í viðræðum um samstarf í Malaví

Á þessu ári ætlar Þróunarsamvinnustofnun Íslands að undirbúa nýtt fimm ára verkefni í lýðheilsu með héraðsstjórn Mangochi. Að sögn Stefáns Jóns Hafstein umdæmisstjóra ÞSSÍ í Malaví er hugmyndin sú að Rauði krossinn geti hugsanlega haft hlutverk í verkefninu. Rauði kross Íslands hefur starfað um nokkurra ára hríð í Malaví og "reynslan af þeim verkefnum þykir góð," segir Stefán Jón.

Í síðustu viku fóru fram viðræður milli fulltrúa frá íslenska Rauða krossinum og malavíska Rauða krossinum við umdæmisstjóra ÞSSÍ í Malaví um slíkt samstarf í Mangochi héraði. Þórir Guðmundsson frá íslenska Rauða krossinum og Helen Dzoole frá malavíska Rauða krossinum fóru þá í vettvangsferð um Mangochi með Stefáni Jóni, sem sýndi þeim verkefni ÞSSÍ, auk þess sem þau ræddu við félagsmenn í Rauða krossins í héraðinu.

25. jan. 2011 : Stórir draumar fylgja smálánum Rauða krossins í Malaví

Eftirvæntingin skín úr augum fólks sem hefur safnast saman í athvarfi Rauða krossins í fjallaþorpi í sunnanverðu Malaví. Verkefnisstjóri Rauða krossins er kominn með peninga sem afhentir verða fólki sem ætlar að freista þess að nýta þá til að bæta líf sitt og sinna fjölskyldna.

Um er að ræða skjólstæðinga úr alnæmisverkefnum sem Rauði kross Íslands styður í Malaví. Fólkið hefur allt farið á vikulangt námskeið þar sem það hefur lært að gera viðskiptaáætlanir, fengið fræðslu um rekstur lítilla fyrirtækja og hlustað á fyrirlestra um meðferð fjár.

Þórir Guðmundsson sviðsstjóri alþjóðastarfs Rauða kross Íslands var nýlega á ferð um verkefnasvæðin í Chiradzulu og ræddi við sjálfboðaliða og skjólstæðinga, þar á meðal áhugasama smálánaþega.

15. des. 2010 : Börn og unglingar úr Gufunesbæ afhenda ágóða af jólamarkaði

Börn og unglingar í frístundaheimilum, frístundaklúbbi og félagsmiðstöðvum afhentu fulltrúum Rauða krossins ágóða af jólamarkaði sem haldinn var í Hlöðunni við Gufunesbæinn 2. desember s.l. Seld voru jólakort, jólasmákökur, brjóstsykur, fímó-skart, perlumyndir og margt fleira sem börn og unglingar höfðu útbúið í sameiningu.

Í Geiralundi við Gufunesbæinn var hægt að gæða sér á kakói, sykurpúðum og piparkökum gegn vægu gjaldi.

Fjöldi fólks lagði leið sína í Hlöðuna og í Geiralund þennan dag og lagði um leið góðu málefni lið en alls söfnuðust rúmar 75 þúsund krónur sem renna til styrktar barnaheimilum í Malaví.

5. nóv. 2010 : Göngum til góðs söfnunin gerir kleift að efla hjálparstarfið í Malaví

Rauði kross Íslands hefur unnið að hjálparstarfi í Malaví síðan 2002, fyrst í einu þéttbýlasta og fátækasta héraði landsins, Chiradzulu, og síðan 2008 einnig í héraðinu Mwanza. Árið 2009 nutu um 3.600 börn aðstoðar og fengu tækifæri til að sækja skóla ásamt því að fá fæði og klæði og félagslegan stuðning frá sjálfboðaliðum. Áætlað er að efla verkefni Rauða krossins í Malaví enn frekar á næstu árum, meðal annars með því fjármagni sem safnaðist í landssöfnuninni Göngum til góðs í október 2010.

Einn megin styrkur þessara verkefna er að þau eru unninn í samvinnu við heimamenn, sniðin að aðstæðum á hverjum stað og það er verið að styrkja landsfélag Rauða krossins, samfélagið og fólkið til sjálfshjálpar. Mikill árangur hefur náðst í samstarfi Rauða kross Íslands og í Malaví í þau átta ár sem samvinnan hefur staðið. Vegna þess að um langtímaskuldbindingu er að ræða hafa verkefnin breyst og þróast til að mæta nýjum aðstæðum og þörfum skjólstæðinga Rauða krossins. 

5. okt. 2010 : Alnæmisleikþættir til fræðslu í Malaví

Hlutfall alnæmissmitaðra í Malaví hefur lækkað úr 14,4 prósentum í 12 síðan 2007. Íslenski Rauði krossinn hefur aðstoðað heimamenn, kennt þeim að rækta grænmeti og uppfrætt þá um smitleiðir með leikþáttum í stíl Spaugstofunnar.Greinin birtist í Fréttablaðinu 05.10.2010.

2. okt. 2010 : Himnarnir hrundu

Caroline Seyani missti móður sína þegar hún var fimmtán ára gömul. Föður sinn þekkti hún aldrei. Hún er einn skjólstæðinga Rauða kross Íslands í Malaví og Fréttablaðið birtir hér brot úr sögu hennar. Sigríður Björg Tómasdóttir tók saman.

21. des. 2009 : Rauði krossinn styður jafningjafræðslu í Malaví

Hluti af alnæmisverkefni Rauða krossins í Malaví felst í jafningjafræðslu um alnæmi og smitleiðir þess.

16. des. 2009 : Rauði kross Íslands styrkir nemendur til framhaldsnáms í Malaví

Rauði kross Íslands styður rúmlega 200 grunnskólabörn til mennta í Chiradzulu héraði í suðurhluta Malaví. Félagið styður einnig tvö ungmenni til náms við Náttúru- og auðlindaframhaldsskólann í Lilongve.

8. des. 2009 : Stuðningur Rauða kross Íslands við munaðarlaus og önnur bágstödd börn í Malaví

Alnæmi et eitt af alvarlegustu heilbrigðisvandamálum í suðurhluta Afríku, og frá árinu 2002 hefur Rauði kross Íslands veitt Rauða krossinum í Malaví fjárhagslega og tæknilega aðstoð til að takast á við erfiðleikana.

10. sep. 2009 : Tombóluframlag íslenskra barna til hjálpar börnum í Malaví

Tombólubörn Rauða krossins geta verið stolt af starfi sínu á árinu 2008. Börnin söfnuðu um  600.000 krónum til hjálpar börnum í forskólum í Chiradzulu og Mwanza héraði í suður-Malaví. Þar hefur Rauði kross Íslands stutt við alnæmisverkefni malavíska Rauða krossins undanfarin ár. Hólmfríður Garðarsdóttir sendifulltrúi starfar í Malaví.

Í Chiradzulu héraði eru þrír forskólar sem njóta stuðnings Rauða krossins. Það var einlæg ósk umönnunaraðila í skólunum að fá fleiri útileiktæki fyrir börnin. Var því ákveðið að hluti af framlagi tombólubarna yrði varið til kaupa á rólum, vegasalti, hringekju og rennibraut.

Í Mwanza héraði styður malavíski Rauði krossinn fjóra forskóla. Umönnunaraðilar þar og sjálfboðaliðar Rauða krossins óskuðu einnig eftir að nýta framlag tombólubarna á Íslandi til að kaupa timbur í vegasölt og rennibrautir, reipi í rólur, stóla, hillur og efni til að búa til tuskudúkkur fyrir börnin. Öll eru leiktækin framleidd í héruðunum.

28. maí 2009 : Rauði krossinn styður jafningjafræðslu í Malaví

Frá árinu 2002 hefur Rauði kross Íslands veitt Rauða krossinum í Malaví fjárhagslega og tæknilega aðstoð vegna alnæmisverkefnis í Nkalo í Chiradzulu héraði í suðurhluta landsins.

19. maí 2009 : Verkefni til að bæta matvælaöryggi í Malaví

Rauði kross Íslands hefur um nokkurra ára skeið stutt alnæmisverkefni malavíska Rauða krossins í Chiradzulu héraði í suðurhluta Malaví.

10. apr. 2009 : Fatapakkar frá sjálfboðaliðum Rauða kross Íslands til Malaví

Rauði kross Íslands sendi gám með notuðum fatnaði og vörum sem skortur var á til malavíska Rauða krossins í nóvember 2008.

9. des. 2008 : Barist gegn alnæmi í sveitum Malaví

Söngur ómar um sveitir Malaví þegar fulltrúar Rauða kross Íslands koma að heimsækja leikskóla, sem byggður var fyrir aðstoð frá Íslandi. Í Malaví syngja menn þegar þeir eru glaðir og þegar þeir eru sorgmæddir.

24. okt. 2008 : Rauði kross Íslands opnar skrifstofu í Malaví

Hólmfríður Garðarsdóttir hefur opnað skrifstofu Rauða kross Íslands í Lilongwe, höfuðborg Malaví, sem er eitt þéttbýlasta land Afríku með 11 milljónir íbúa.

5. sep. 2008 : Náin samvinna við þorpshöfðingja við framkvæmd alnæmisverkefna í Malaví

Rauði kross Íslands hefur í mörg ár átt í samstarfi við malavíska Rauða krossinn og stutt við alnæmisverkefni í einu af héruðum Malaví.

4. jan. 2008 : Grundaskóli styrkir börn í Malavaí.

Nemendur og starfsfólk Grundaskóla afhentu Rauða krossinum á dögunum 318.000 króna framlag til styrktar börnum í Malaví. Þessi glæsilega upphæð  var afrakstur jólasöfnunar sem hrundið var af stað í stað þess að gefa hefðbundnar jólagjafir innan skólans.

Það var Lóa Guðrún Gísladóttir, fulltrúi nemenda í Grundaskóla, sem afhenti Sveini Kristinssyni, formanni Arkanesdeildarinnar söfnunarféð.  Í ávarpi sem hún flutti af því tilefni kom fram að þetta er í þriðja sinn sem Grundaskóli styður með þessum hætti við uppbyggingarstarf í Malaví .

Rauði krossinn sendir nemendum og kennurum í Grundaskóla hugheilar þakkir fyrir framtakið. Það er ekki nokkur vafi á því að peningarnir koma í góðar þarfir. Rauði kross Íslands styður börn sem þjást vegna alnæmis í Malaví. Mörg þeirra hafa misst foreldra sína úr sjúkdómnum og þau fá ýmiss konar aðstoð svo að þau geti haldið áfram skólagöngu og komist til manns.

5. des. 2007 : Rauði krossinn hyllir tombólubörnin á alþjóðadegi sjálfboðaliðans

Alþjóðadagur sjálfboðaliðans er haldinn hátíðlegur um allan heim þann 5. desember. Að því tilefni vill Rauði krossinn sérstaklega þakka tombólubörnunum, sem eru yngstu sjálfboðaliðar félagsins, fyrir stuðninginn á árinu.

Rúmlega 300 börn um allt land stóðu fyrir tombólum til styrktar starfi Rauða krossins á árinu og söfnuðu alls um 500.000 kr. Framlag tombólubarnanna rennur alltaf til ungmenna- og barnastarfs Rauða krossins víða um heim, og að þessu sinni verða peningarnir notaðir til að hjálpa börnum í Malaví í suðurhluta Afríku.

Rauði kross Íslands hefur unnið að alnæmisverkefnum í samstarfi við Rauða krossinn í Malaví frá árinu 2002. Tugþúsundir barna í Malaví hafa misst foreldra sína úr alnæmi, og eiga því um sárt að binda. Í bænum Nkalo í suðurhluta  landsins eru rúmlega 4.000 börn sem Rauði kross Íslands hjálpar á ýmsan hátt svo þau geti haldið áfram í skóla. Byggð hafa verið þrjú athvörf og verða peningar tombólubarnanna notaðir til að kaupa borð og stóla, leikföng og skóladót.

1. sep. 2006 : Rauði krossinn hjálpar börnum í Malaví

Landssöfnun Rauða krossins Göngum til góðs verður haldin í fjórða sinn 9. september. Söfnunarfénu verður varið til að hjálpa börnum í sunnanverðri Afríku sem eiga um sárt að binda vegna alnæmis. Myndirnar eru af börnum í Malaví en þar styrkir Rauði kross Íslands verkefni malavíska Rauða krossins.