Umfangsmikið hjálparstarf við erfiðar aðstæður

Þóri Guðmundsson

1. jan. 2005

 

Þessar stúlkur, Eydís Lilja Eysteinsdóttir, Eva Agnarsdóttir og Lilja Dís Smáradóttir voru búnar að safna 22.000 krónum í ferðasjóð vegna ferðar sem þær ætluðu í á nýja árinu en ákváðu að gefa peningana í staðinn til hjálparstarfs Rauða krossins vegna flóðanna í Asíu.

Almenningur á Íslandi, stjórnvöld, fyrirtæki og félagasamtök hafa nú gefið samtals um 60 milljónir króna til neyðarhjálpar Rauða krossins á jarðskjálfta- og flóðasvæðum í Asíu. Hluta upphæðarinnar hefur þegar verið komið til Alþjóða Rauða krossins og nýtist til hjálparstarfs við afar erfiðar aðstæður, einkum á Sri Lanka og í Indónesíu.

Tveir sendifulltrúar Rauða kross Íslands hafa verið sendir á flóðasvæðin, einn til Sri Lanka og einn til Indónesíu. Fjöldi annarra er í viðbragðsstöðu. Enn er hægt að hringja í 907 2020 til að styðja hjálparstarfið.
 

Starfsmenn tælenska Rauða krossins aðstoða fólk á flóðasvæðum.

Í löndunum sem urðu fyrir flóðbylgjunni vinna hjálparstarfsmenn í kapp við tímann að koma matvælum, lyfjum, teppum og tjöldum til fólks sem í mörgum tilvikum hefur misst allt sitt. Full hlaðnar flugvélar flytja hjálpargögn víðs vegar að úr heiminum en samgöngukerfi á skaðasvæðunum eru sums staðar að kikkna undan álaginu við að koma hjálpargögnum frá flugvöllum áleiðis til þeirra sem á þurfa að halda.

Tala látinna er nú komin í 124.000. Þá slösuðust um 520.000 manns og allt að fimm milljónir manna þurfa á neyðaraðstoð að halda. Enn er gert ráð fyrir að þessar tölur muni hækka. Hjálparstarfið beinist einkum að Sri Lanka, Indónesíu, Indlandi og Maldív eyjum en einnig er verið að aðstoða í Tælandi, Malasíu og í löndum Austur Afríku.

Um 80.000 eru taldir af í Indónesíu. Þar eru nú fimm sérhæfð neyðarteymi frá Alþjóða Rauða krossinum auk fjölda manns frá indónesíska Rauða krossinum. Afar erfitt er að flytja hjálpargögn til afskekktra bæja á norðanverðri Súmötru því vegir hafa skolast burt og fjarskipti eru að hluta í lamasessi. Björgunarsveitir hafa enn ekki komist til sumra bæja og þorpa sem urðu fyrir flóðinu.

Á Sri Lanka misstu hundruð þúsunda manna heimili sín og hafast margir þeirra við í samkomuhúsum og félagsheimilum, þar sem sjálfboðaliðar Rauða krossins eru meðal þeirra sem hlúa að þeim.

Á Tælandi hafa læknar, hjúkrunarfólk og annað starfsfólk Rauða krossins unnið að hjálparstörfum í sex héruðum frá fyrsta degi. Færanlegar læknastofur tælenska Rauða krossins eru á væðinu, en í þeim er meðal annars hægt að framkvæma skurðaðgerðir. Herinn hefur í nokkrum tilvikum flutt hjálpargögn fyrir Rauða krossinn.

Á Indlandi er talið að um 10.000 manns hafi látið lífið. Hundruð þúsunda misstu heimili sín, þar af margir sem hafa fengið skjól í flóðvarnaskýlum Rauða krossins. Við suðurströnd Indlands er talið mikilvægast að koma í veg fyrir að farsóttir breiðist út. Talið er að um 10.000 manns hafi látist á Andaman og Nicobar eyjum, sem tilheyra Indlandi en eru beint norður af skjálftasvæðinu. Indverski Rauði krossinn hefur sent um tuttugu tonn af hjálpargögnum til eyjanna og 25 lækna.