Rauði krossinn safnar til hjálparstarfsins á skjálftasvæðum

Konráð Kristjánsson

10. okt. 2005

 

Hjálparstarfsmenn flytja birgðir frá tyrkneska Rauða hálfmánanum á hjálparsvæðin í Pakistan. Alþjóðahreyfing Rauða krossins og Rauða hálfmánans vinnur sameiginlega að hjálparstarfinu. Reuters/Faisal Mahmood, frá www.alertnet.org.

Rauði kross Íslands hefur hafið söfnun til stuðnings fórnarlömbum jarðskjálftans í Pakistan. Þeir sem vilja gefa eitt þúsund krónur til hjálparstarfsins geta hringt í 907 2020. Einnig er hægt að leggja fram fé af greiðslukorti með því að smella hér.

Hjálparsveitir Rauða krossins og Rauða hálfmánans eru við störf á skjálftasvæðinu, bæði í Pakistan og á Indlandi. Aðgerðir Rauða krossins til lengri tíma miða að því að aðstoða 50.000 fjölskyldur, eða um 250.000 manns, til næstu fjögurra mánaða.

Pakistanski Rauði hálfmáninn leiðir hjálparstarfið í Islamabad, þar sem stórhýsi hrundu með skelfilegum afleiðingum. Alþjóða Rauði krossinn er að senda birgðir af teppum, tjaldefni, eldunaráhöldum og öðrum hjálpargögnum á staðinn. Birgðirnar koma meðal annars úr birgðastöðvum Rauða krossins í Afganistan.

Fyrst og fremst er þörf fyrir fjármagn til hjálparstarfsins. Rauði krossinn hefur ákveðið að öll innkaup vegna hjálparstarfsins í Pakistan, muni fara fram þar í landi.

Nánari upplýsingar veita Helga Þórólfsdóttir sviðstjóri alþjóðaviðs og Davíð Lynch verkefnisstjóri neyðarstoðar í síma 570-4000.