Börn á Íslandi safna fyrir börn á Haítí

3. maí 2010

Það er ekki ofsögum sagt að þessar ungu stúlkur frá Þórshöfn láti sig neyð annarra varða. Þær  tóku sig saman og héldu markað í búðinni á Þórshöfn þar sem þær seldu skeljar og steina og einnig máluðu þær myndir og perluðu. Framtakið gaf þeim ellefu þúsund krónur í aðra hönd sem þær afhentu Guðrúnu Stefánsdóttur gjaldkera Þórshafnardeildar Rauða krossins.

„Stjórn Þórshafnardeildar er ákaflega þakklát þessum stelpum og stolt af þeim þar sem þær sýndu mjög gott frumkvæði og gott hjartalag,“ segir Guðrún Stefánsdóttir.

Framlag stúlknanna fer í svokallaðan tombólusjóð þar sem safnast saman allt það fé sem börn safna fyrir Rauða krossinn.

Eftir að jarðskjálftinn skók Haítí í vetur varð sprenging í söfnunum barna á Íslandi. Það hefur því verið ákveðið að það sem safnast fyrir árið 2010 verður látið renna til verkefna fyrir börn á Haítí.