Rauði krossinn dreifir mat á svæðum uppreisnarmanna í Sómalíu

26. júl. 2011

Rauði krossinn dreifði um helgina 400 tonnum af matvælum til 24.000 manna á svæði uppreisnarmanna í Sómalíu. Næringarstöðvar og heilsugæslustöðvar Rauða krossins eru starfandi um allt landið.

Mikilvægt er að þetta komi fram vegna frétta um að ekki hafi fengist leyfi til að dreifa matvælum til hungraðra á svæðum uppreisnarmanna, þar sem ástandið er verst.
Rauði krossinn hefur verið með hjálparstarf á þessum svæðum undanfarin ár en hefur orðið að efla það verulega vegna yfirstandandi neyðar. Áhersla er á neyðaraðstoð við fólk – einkum börn – sem er aðfram komið af næringarskorti.
Á sama tíma heldur langtímastuðningur við fólk á svæðinu áfram, en hann felst meðal annars í útvegun vatns til áveitu sem miðar að því að gera fólki kleift að rækta meiri mat. Einnig fá bændur útsæði og landbúnaðaráhöld og aðstoð við að koma upp og viðhalda stíflum, uppistöðulónum og áveituskurðum.
Á símafundi Alþjóða Rauða krossins í dag, sem Rauði kross Íslands tók þátt í, kom fram að næringarástand barna er að versna mjög í Turkana héraði í norðaustur Kenyu. Þar sýndi könnun kenýska Rauða krossins að um 40 prósent barna þjáist af vannæringu.