18. maí 2010 : Samstarfssamningur um neyðarvarnir á höfuðborgarsvæðinu

Á aðalfundi Rauða kross Íslands þann 15. maí skrifuðu deildir á höfuðborgarsvæðinu undir nýjan samstarfssamning um neyðarvarnir. Samningurinn fjallar um markmið og skyldur neyðarnefndarinnar á höfuðborgarsvæðinu en neyðarnefndinni er ætlað að samhæfa neyðarvarnastarf deildanna á svæðinu. Þetta er í annað skipti sem slíkur samningur er undirritaður en sá fyrri er frá árinu 2005.

Samstarf deildanna hefur reynst vel og það hefur sýnt sig að deildirnar ná meiri árangri saman í neyðarvörnum en hver í sínu lagi.  Í nýja samningnum er gert ráð fyrir stofnun skyndihjálparhóps sem mun líta dagsins ljós á næsta ári. Fyrir er starfandi viðbragðshópur neyðarnefndarinnar sem sinnir neyðaraðstoð vegna atburða utan almannavarnaástands.

12. maí 2010 : Aðstoð veitt vegna röskunar á flugi

Ósk um aðstoð Rauða krossins barst frá starfsmönnum Akureyrarflugvallar á laugardaginn þegar millilandaflug færðist yfir til Akureyrar vegna ösku frá Eyjafjallajökli sem hindraði flug til Keflavíkur.

Fjöldi sjálfboðaliða Akureyrardeildar gaf kost á sér til verksins og hófst þegar undirbúningur. Skipulagi var komið á vakir því gert var ráð fyrir að ástandið gæti varað í einhvern tíma. Deildin fékk til afnota flugskýli þar sem sett var upp aðstaða til að sinna farþegum.

11. maí 2010 : Flugslysaæfing á Ísafjarðarflugvelli

Um 20 sjálfboðaliðar deilda Rauða krossins á norðarverðum Vestfjörðum tóku þátt í flugslysaæfingu á Ísafjarðarflugvelli á laugardaginni. Sjálfboðaliðarnir sáu um opnun fjöldahjálparstöðvar og söfnunarsvæðis aðstandenda auk þess að sinna skyndihjálp og aðhlynningu á söfnunarsvæði slasaðra. Þá tóku einnig gestir frá Akranesdeild Rauða krossins þátt í æfingunni.

Yfir 200 manns tóku þátt í æfingunni, sem gekk mjög vel. Einn helsti tilgangur hennar er að láta reyna á áreiðanleika áætlunarinnar með því að leiða saman þá viðbragðsaðila sem hafa hlutverk í áætluninni og síðan nýta þá reynsluna til að bæta áætlunina.

11. maí 2010 : Starfsmenn Arion banka hjálpuðu til við hreinsunarstarf undir Eyjafjöllum

103 starfsmenn Arion banka og liðsaukar Rauða kross Íslands lögðu sitt á vogarskálarnar og hjálpuðu til við hreinsunarstörf á Skógum, Þorvaldseyri, Rauðafelli, Raufarfelli og við Seljavallalaug undir Eyjafjöllum í síðustu viku.

Á annað hundrað starfsfólk bankans skráði sig sem liðsaukar hjá Rauða krossinum síðasta vetur. Liðsaukar gegna því starfi að vera viðbúnir ef Rauði krossinn þarf á sjálfboðaliðum að halda. Það var því sjálfsagt mál hjá bankanum að liðka til fyrir starfsmenn svo þeir gætu farið og gegnt sjálfboðaliðastörfum. Bankinn leggur mikið upp úr samfélagslegri ábyrgð sinni og telur þetta lið í því verki.

3. maí 2010 : Öskuhreinsun undir Eyjafjöllum – hlé meðan öskufall stendur yfir

Þriðji hópur sjálfboðaliða Rauða krossins kom til Reykjavíkur laust eftir fimm á föstudaginn eftir að hafa verið þar við öskuhreinsun yfir daginn. Hópinn skipaði 15 manns sem skipt var á þrjá bæi. 

Hreinsunarstarfið gekk vel til að byrja með en því miður fór ösku að rigna yfir þegar líða tók á daginn. Þrátt fyrir það var ánægja með dagsverkið og margir til í að endurtaka leikinn.

  Þeim sjálfboðaliðum sem lagt hafa hönd á plóginn við hreinsunarstarfið undir Eyjafjöllum er þakkað kærlega fyrir flott og mikilvægt starf. Þó svo að aska fari yfir svæðið aftur þá skiptir starfið mjög miklu máli fyrir bændur á svæðinu. Eins og staðan er í dag þá hefur verið gert hlé á hreinsun en mun það hefjast að nýju þegar aðstæður leyfa.