Neyðarmötuneyti Rauða krossins, Klúbbs matreiðslumeistara og MK

18. okt. 2010

Rauði kross Íslands, Menntaskólinn í Kópavogi og Klúbbur matreiðslumeistara hafa gert með sér samstarfsamning um starfsemi neyðarmötuneyta Rauða krossins til að tryggja faglega umgjörð í framkvæmd og rekstri þeirra.  Neyðarmötuneyti eru meðal annars starfrækt tímabundið í fjöldahjálparstöðvum Rauða krossins, þjónustumiðstöðvum almannavarna og í aðstöðu fyrir hjálparlið í kjölfar náttúruhamfara eða annarra alvarlegra atburða.

Samningurinn verður undirritaður í Menntaskólanum í Kópavogi þriðjudaginn 19. október kl. 15:00.  Þar munu félagar í Klúbbi matreiðslumanna mæta í fullum skrúða og reiða fram veitingar í boði MK – hótels og matvælasviðs.

Samningurinn kveður á um gerð handbókar um rekstur neyðarmötuneyta, kortlagningu og flokkun eldhúsa í fyrirfram ákveðnum fjöldahjálparstöðvum og samstarf um faghóp sem getur verið deildum Rauða krossins til ráðgjafar um opnun og rekstur neyðarmötuneyta.

Rauði krossinn sér um þjálfun sjálfboðaliða og ber ábyrgð á rekstri neyðarmötuneytanna.  Menntaskólinn í Kópavogi- hótel og matvælasvið á fulltrúa í faghópnum, veitir ráðgjöf um gerð handbókar og hefur eftirlit með öruggri meðferð matvæla.  Þá verður fulltrúi frá Klúbbi matreiðslumeistara í faghópnum sem mun annast um þróun uppskrifta fyrir neyðarmötuneytin, og annast eftirlit með eldhúsum, birgjum og flutningsleiðum.

Nánari upplýsingar veitir Sólveig Ólafsdóttir sviðsstjóri útbreiðslusviðs Rauða krossins í síma 893 9912.