Íbúar Grindavíkur fræðast um neyðarvarnir

29. mar. 2011

Neyðarvarnarnefnd Grindavíkurdeildar Rauða kross Íslands stóð fyrir fræðslukvöldi fyrir íbúa Grindavíkur um opnun fjöldahjálparstöðvar í Hópsskóla.

Jón Brynjar Birgisson verkefnisstjóri neyðarvarna hélt fyrirlestur sem gaf sýn á þau fjölbreyttu verkefni sem fylgja því að opna fjöldahjálparstöð, en ástæður opnunar eru mismunandi.
 
Fróðlegt var að heyra raunverulegar reynslusögur en eins og allir vita þá hefur nýverið reynt töluvert á neyðarviðbrögð bæði í Árnes- og Rangárvallarsýslum en einnig víðar um land í gegnum tíðina vegna t.d snjóflóða og rútuslysa og á höfuðborgarsvæðinu þá oftast vegna bruna.

Þátttakendur tóku þátt í æfingu sem fólst í því að gera fjöldahjálparstöðina, Hópsskóla í þessu tilfelli, tilbúna til opnunar fyrir þolendur rútuslyss. Tveir hópar skiptu skólanum á milli sín og skipulögðu opnunina samkvæmt teikningum sem neyðarvarnarnefndin hefur útbúið og sýnir skipulag fjöldahjálparstöðvar í Hópsskóla (slíkt skipulag hefur nefndin einnig gert fyrir Grunnskólann við Ásabraut). Mikið kapp og glens var í mannskapnum og tók ekki langan tíma að merkja allan skólann og skipa valinn mann í hvert sæti/verkefni en um 20-25 manns þarf til að manna eina vakt í fjöldahjálparstöð.

Um svipað leyti og allt varð klárt náði Stjarnan rétt að merja fram sigur á strákunum okkar í körfunni og varð þá gárungunum á orði að nú gætum við tekið á móti þeim Grindvíkingum sem voru á leiknum í sálrænan stuðning og hughreystingu.

Mikilvægt er að íbúar hér sem og annar staðar viti að ALLIR geta lagt sitt af mörkum í þessari starfsemi - það þarf bara að taka ákvörðun um að vilja hjálpa þegar á reynir.

Ef þú hefur áhuga á að gerast fjöldahjálparstjóri eða að vera á lista sem liðsauki, og býrð í Grindavík,  þá endilega hafðu samband við Rósu 6617041 rosy@internet.is eða Brynju 8979035 grimurorn@simnet.is