Vinningshafar í 112 getraun Rauða krossins
112 dagurinn gekk vel
Áframhaldandi rekstur Lautar, athvarfs á Akureyri fyrir fólk með geðraskanir
Akureyrardeild Rauða kross Íslands, Geðverndarfélag Akureyrar og Akureyrarbær gerðu með sér samning í dag um áframhaldandi rekstur Lautar, dagsathvarfs fyrir fólk sem á við geðraskanir að stríða. Athvarfið er nú til húsa í Þingvallastræti 32 en flyst með vorinu í nýtt húsnæði þar sem áður var leikskólinn Klappir að Brekkugötu 34.
Markmiðið með starfseminni er að efla sjálfstæði þessa hóps, auka samfélagsþátttöku og bjóða tækifæri til samveru og fræðslu, auk þess að veita gestum persónulegan stuðning.
Samningur er fyrir árin 2007-2009. Akureyrardeild Rauða krossins mun annast daglegan rekstur athvarfsins en Geðverndarfélag Akureyrar sér um fræðslu og þjálfun starfsfólks, ásamt því að veita faglega ráðgjöf um daglega starfsemi.
Gerviblóð og góð erindi
Blæðingar og sár var aðalefni þriðja hluta fræðslu fyrir viðbragðshóp í skyndihjálp hjá deildum Rauða krossins á Norðurlandi. Námskeiðið fór fram um síðustu helgi.
Auk hefðbundinnar fræðslu um sár og umbúðir voru verklegar æfingar þar sem leikarar voru fengnir til aðstoðar. Voru þeir útbúnir með sex mismunandi áverka og var þátttakendum ætlað að meta áverkana og skýra hvernig þeir skildu meðhöndlaðir.
Í lok æfingar var síðan hvert tilfelli tekið fyrir og rétt meðhöndlun sýnd. Í tengslum við þennan þátt var einnig fjallað um það hvernig skuli bera sig að við að meta á skipulagðan hátt áverka á slösuðum.