Valdaefling í verki til umræðu á fjölmennu málþingi

27. maí 2010

Geðheilsa er víðtækt hugtak og hún skiptir sköpum í samfélagi manna. Byggjum betra samfélag – valdaefling í verki var yfirskrift málþings sem haldið var á Rósenborg á Akureyri í gær. Málþingið sóttu um 90 manns og erindin höfðuðu til almennings, fagfólks, sveitarstjórnamanna, fólks út atvinnulífinu og skólafólks.

Rauði krossinn var með innlegg frá ýmsum sjónarhornum. Helga G. Halldórsdóttir sviðsstjóri innanlandssviðs kynnti niðurstöður könnunarinnar Hvar þrengir að?, Guðný H. Björnsdóttir svæðisfulltrúi á Norðurlandi kynnti hvað er á döfinni hjá Rauða krossinum í geðheilbrigðismálum. Helga Einarsdóttir forstöðumaður Lautar, athvarfs fyrir fólk með geðraskanir á Akureyri var með innleggið „Áhrif gesta á Laut“ og Jónatan Már Guðjónsson gestur athvarfsins sagði sína reynslu undir yfirskriftinni „Að brjótast út úr einangrun“. Áhersla var lögð á að fá fram viðhorf notenda til úrræða sem eru í boði.

Málþingið var haldið af Rauða krossi Íslands, Hlutverkasetri,  Akureyrarbæ, Félags- og tryggingamálaráðuneytinu, Akureyrarbæ og Háskólanum á Akureyri.