Rauði krossinn veitir áfram aðstoð í dag

7. ágú. 2013

Áfallateymi Rauða krossins er enn að störfum vegna flugslyssins á Akureyri. Eftir samverustund í Glerárkirkju klukkan 20 í kvöld, miðvikudaginn 7. ágúst, verður áfallateymið á staðnum og bíður þeim sem þess óska upp á viðtöl.

Rauða krossinum er umhugað um að þeir sem telja sig þurfa á sálrænum stuðningi að halda vegna slyssins leiti til sérfræðinga félagsins í áfallahjálp.

Fjöldi sjónarvotta varð að flugslysinu. Eðlilegt er að atburður sem þessi hafi áhrif á líðan fólks. Gott er að leita sér sálræns stuðnings í kjölfarið, en besti stuðningurinn er oft fólginn hjá aðstandendum og í samveru við vini og vandamenn.

Tíu manna áfallahjálparteymi Rauða krossins á Norðurlandi hlúði að aðstandendum og sjónarvottum eftir flugslysið og sóttu um 60 – 70 manns fjöldahjálparstöð sem Rauði krossinn opnaði í Glerárkirkju.

Strax eftir flugslysið var flugslysaáætlun virkjuð, sem var síðast æfð á Akureyri í vor.

Hjálparsími Rauða krossins 1717 leiðbeinir einnig um stuðning, og er fólki sem ekki hefur tök á að leita til félagsins á Akureyri bent á að hringja í hann. Símanúmer Hjálparsíma Rauða krossins er 1717. Einnig eru upplýsingar um sálrænan stuðning að finna hér.