Fjölgun heimsóknavina hjá Akureyrardeild

29. sep. 2006

Akureyrardeild Rauða krossins hélt fyrir skömmu námskeið fyrir verðandi heimsóknavini. Er þetta annað námskeiðið sem haldið hefur verið á þessu fyrsta ári sem verkefnið hefur verið í gangi hjá deildinni og því óhætt að segja að það fari vel af stað.

Á námskeiðinu fræddi Guðný H. Björnsdóttir, svæðisfulltrúi Rauða kross Íslands á Norðurlandi, þátttakendur um flest það sem viðkemur heimsóknaþjónstunni. Farið var í stuttu máli yfir sögu og starf Rauða krossins og starfsemi Akureyrardeildar var kynnt. Tveir sjálfboðaliðar úr heimsóknarþjónustunni, hjónin Júlía Björnsdóttir og Þorsteinn E. Arnórsson, sögðu einnig frá reynslu sinni og aðkomu að verkefninu en þau sóttu einmitt fyrra námskeiðið sem haldið var í janúar og hafa síðan sinnt heimsóknum fyrir deildina.

Heimsóknavinir deildarinnar fylla nú brátt þriðja tuginn og veitir sannarlega ekki af því fyrirspurnum og ábendingum um notendur (gestgjafa) fjölgar jafnt og þétt.

Heimsóknavinur veitir félagsskap meðal annars með því að spjalla, spila eða fara í göngu- eða ökuferðir. Heimsóknir eru að jafnaði einu sinni í viku klukkutíma í senn og eru heimsóknavinir og gestgjafar þeirra á ýmsum aldri og af báðum kynjum. Heimsóknarvinir hittast reglulega og fá fræðslu.

Hafir þú áhuga á verkefninu hvort heldur sem heimsóknavinur eða sem gestgjafi þá eru nánari upplýsingar veittar á skrifstofu Akureyrardeildar í síma 461 2374 eða akureyri@redcross.is