Námsaðstoð í boði fyrir framhaldsskólanemendur

21. apr. 2010

Frá  21. apríl til 10. maí býður Kópavogsdeild upp á ókeypis námsaðstoð fyrir fólk á framhaldsskólaaldri í Molanum, ungmennahúsi að Hábraut 2 í Kópavogi.

Í Molanum er opin lesaðstaða fyrir nemendur alla virka daga en dagana 21. apríl, 28. apríl, 5. maí og 10. maí kl. 17-19 verða sjálfboðaliðar frá Kópavogsdeild á staðnum. Þar munu þeir veita þeim sem vantar sérstaka leiðsögn í stærðfræði en sjálfboðaliðarnir búa allir yfir góðri þekkingu í því fagi. Öll aðstaða undir slíka aðstoð er til fyrirmyndar í Molanum.

Tilgangur þessa verkefnis er að sporna gegn brottfalli nemenda úr námi með því að veita þeim sérstaka aðstoð yfir prófatímann. Verkefnið hefur nýst mörgum vel undanfarin misseri og Kópavogsdeild hvetur sem flesta nemendur til að nýta sér þessa aðstoð.