Prjónað og pakkað fyrir Malavi

1. apr. 2011

Fimmtudaginn 31.mars komu sjálfboðaliðar úr verkefninu ,,Föt sem framlag“ saman og pökkuðu afrakstri vetrarins. Pökkun fer fram tvisvar til þrisvar á ári og var þetta sú fyrsta á þessu ári. Alls var pakkað 226 pökkum og má því með sanni segja að vel hafi gengið að prjóna í vetur.

Fatapakkarnir eru sendir til barna og fjölskyldna í Malaví. Sjálfboðaliðarnir prjóna, hekla og sauma peysur, sokka, húfur, teppi og bleyjubuxur en auk þess fer líka í pakkana handklæði, treyja, buxur, samfellur, taubleyjur og taustykki.

Sjálfboðaliðarnir sinna þessari handavinnu að mestu heima en hittast einu sinni í mánuði í húsnæði deildarinnar í svokölluðu prjónakaffi. Þá fá þeir garn og tækifæri til að eiga ánægjulega stund saman. Næsta prjónakaffi verður á miðvikudeginum eftir páska, 27. apríl kl. 15-18. Þeir sem hafa áhuga á að taka þátt í verkefninu geta haft samband við deildina í síma 554 6626 eða með tölvupósti á kopavogur@redcross.is. Deildin tekur einnig á móti garnafgöngum á virkum dögum kl. 9-15.