Námskeiðið Börn og umhverfi verður í boði í maí

19. apr. 2011

Kópavogsdeild heldur fjögur Börn og umhverfi námskeið í maí. Það fyrsta er 2.-5. maí, annað er 9.-12. maí, þriðja er 16.-19. maí og það fjórða er 23.-26.maí. Enn eru laus pláss á námskeiðin og hægt er að skrá sig með því að smella hér.  

Námskeiðin eru ætluð ungmennum á 12. aldursári eða eldri sem gæta yngri barna. Farið er í ýmsa þætti er varða umgengni og framkomu við börn. Rætt er um árangursrík samskipti, aga, umönnun og hollar lífsvenjur, leiki og leikföng. Lögð er áhersla á umfjöllun um slysavarnir og algengar slysahættur í umhverfinu ásamt ítarlegri kennslu í skyndihjálp. Að auki fá þátttakendur innsýn í sögu og starf Rauða krossins.

Námskeiðið er sextán kennslustundir og kennslan skiptist á fjögur kvöld. Í lokin fá þátttakendur litla skyndihjálpartösku að gjöf og viðurkenningarskjal til staðfestingar um þátttöku. Leiðbeinendur eru leikskólakennarar og hjúkrunarfræðingar.

Það er engin vafi á því að þessi námskeið geta gert gæfumuninn varðandi réttu viðbrögðin í skyndihjálp og varðandi það hvort viðkomandi fær starf eða ekki við barnagæslu. Námskeiðin nýtast þátttakendum líka dagsdaglega í lífinu heima fyrir, innan stórfjölskyldunnar og meðal vina.

Kópavogsdeild verður lokuð frá skírdag og framyfir páska. Starfsmenn og stjórn óskar sjálfboðaliðum og velunnurum gleðilegra páska.