Met slegið í pökkun ungbarnapakka í Kópavogi

9. nóv. 2012

Met var slegið í pökkun ungbarnapakka þegar sjálfboðaliðar úr verkefninu Föt sem framlag hittust í Rauðkrosshúsinu í vikunni og pökkuðu ungbarnafötum í fatapakka sem síðan verða sendir til barna og fjölskyldna í neyð í Hvíta Rússlandi. Fjöldi sjálfboðaliða pakkaði alls 408 pökkum á rúmum tveimur klukkutímum.

Í pakkana fara prjónaðar peysur, húfur, sokkar, teppi, samfellur, treyjur, buxur, handklæði og klútar.

Hópurinn hefur því sent frá sér alls um 660 pakka á þessu ári en í mars sl. var 252 pökkum pakkað.

Sjálfboðaliðarnir munu hittast aftur í Rauðakrosshúsinu í Kópavogi í lok mánaðarins þegar hið mánaðarlega prjónakaffi verður en það er haldið síðasta miðvikudaginn í hverjum mánuði. Þar gefst sjálfboðaliðunum tækifæri til að hittast, deila prjóna- og saumauppskriftum og eiga ánægjulega stund saman yfir kaffi og meðlæti.

Þeir sem vilja taka þátt í verkefninu eða gefa samfellur, boli, buxur eða garn geta haft samband við deildina í síma 554 6626 eða með tölvupósti á kopavogur@redcross.is.