Prjónakaffi

Gerða

1. mar. 2013

Í kringum 25-30 manns mæta reglulega á prjónakaffi hjá Rauða krossinum í Kópavogi. Góður andi er í hópnum, mikið hlegið og spjallað og síðast en ekki síst prjónað

Markmiðið með prjónakaffinu er að sjálfboðaliðar komi saman til að njóta félagsskapar við að prjóna eða sauma ungbarnafatnað fyrir neyðaraðstoð. Verkefnið heitir Föt sem framlag og er mikil þörf fyrir framlag af þessu tagi til hjálparstarfs innan lands sem utan. Garn, prjónar, prjóna- og saumauppskriftir og upplýsingar um verkefnið eru á boðstólum og allir geta fundið verkefni við sitt hæfi. Þar sem þörfin er mikil er kærkomið fyrir Kópavogsdeild að fá fleiri sjálfboðaliða sem hafa gaman af hannyrðum og leggja um leið sitt af mörkum til hjálparstarfs. Hver og einn getur sniðið sitt framlag að eigin þörfum, sinnt því í hópi eða heima. Einn karlmaður prjónar fyrir deildina og mætti hann sérstaklega í prjónakaffið í þetta sinn til að hitta félaga sína í hópnum og var honum vel fagnað. Í prjónakaffinu er ávallt mikil gleði og mikið gaman.

Prjónakaffi er alltaf haldið síðasta miðvikudag í hverjum mánuði. Áhugasamir sem vilja bætast í hópinn eru eindregið hvattir til að hafa samband við starfsfólk Kópavogsdeildar í síma 554 6626 eða á kopavogur@redcross.is.