Samstarf um aðstoð við fjölskyldur í Kópavogi

27. okt. 2006

Kópavogsdeild Rauða kross Íslands og Mæðrastyrks-nefnd Kópavogs munu starfa saman að neyðaraðstoð við bágstadda einstaklinga og fjölskyldur fyrir jólin. Mæðrastyrksnefnd Kópavogs annast úthlutun á matar-styrkjum til fjölskyldna í neyð með stuðningi frá Kópavogsdeild Rauða krossins sem hefur afhent Mæðrastyrksnefnd styrk að upphæð 500 þúsund krónur. Kópavogsdeild getur einnig haft milligöngu um að koma umsóknum um aðstoð til Mæðrastyrksnefndar.

Í desember munu sjálfboðaliðar Kópavogsdeildar aðstoða Mæðrastyrksnefnd við úthlutanir á matarstyrkjum og fatnaði til Kópavogsbúa.

Allan ársins hring sér Mæðrastyrksnefnd Kópavogs um að úthluta fatnaði til þeirra sem þurfa á þriðjudögum kl. 16-18 í Fannborg 5. Rauði kross Íslands úthlutar fatnaði á miðvikudögum kl. 9-14 í fataflokkunarstöðinni að Gjótuhrauni 7 í Hafnarfirði.

Kópavogsdeild Rauða krossins hvetur fyrirtæki, stofnanir, félagasamtök og einstaklinga til að leggja Mæðrastyrksnefnd Kópavogs lið í aðstoðinni við Kópavogsbúa fyrir jólin.