Rauði krossinn kynntur í grunnskólum Kópavogs

23. apr. 2007

Öllum grunnskólum á höfuðborgarsvæðinu býðst að fá kynningu á starfi Rauða krossins fyrir nemendur 8. bekkja. Í vetur hafa skólarnir í Kópavogi verið duglegir að nýta sér boðið og flestir skólar fengið kynningu fyrir sína nemendur.

-Það skemmtilegasta við þessar kynningar er að krakkarnir verða meðvitaðir um starf Kópavogsdeildar Rauða krossins og það kemur mörgum á óvart að það séu verkefni á vegum deildarinnar sem þessi aldurshópur getur tekið þátt í, segir Ingunn Ásta Sigmundsdóttir, verkefnastjóri sjálfboðamiðstöðvar Kópavogsdeildar. Í kjölfar kynninganna hafa nemendur gefið kost á sér í sjálfboðin störf og ungmennastarf deildarinnar sem ber heitið Eldhugar.

Kynningunum í grunnskólunum er hagað þannig að starfsmaður Kópavogsdeildar og svæðisfulltrúi Rauða kross deilda á höfuðborgarsvæði fara saman í skólabekkina, sýna stutt kynningarmyndband um starf félagsins og fjalla um helstu verkefni Rauða krossins hér heima og erlendis. Oft skapast líflegar og skemmtilegar umræður um störf sjálfboðaliða og flestir nemendur eru mjög áhugasamir um félagið.