Fatamarkaður MK-nema til styrktar börnum og ungmennum í Mósambík

14. nóv. 2007

Nemendur í Menntaskólanum í Kópavogi halda fatamarkað föstudaginn 16. nóvember kl. 15-19 og laugardaginn 17. nóvember kl. 12-16 í sjálfboðamiðstöð Kópavogsdeildar Rauða krossins að Hamraborg 11. Seld verða notuð föt á konur, karla, ungmenni og börn, ásamt alls kyns varningi, á verðinu 300-1500 krónur. Allur ágóði rennur til styrktar börnum og ungmennum í Mósambík.

Fatamarkaðurinn er lokaverkefni nemendanna í áfanga um sjálfboðið Rauða kross starf (SKA 112). Þetta er fjórða önnin í röð sem nemendur í MK geta valið áfangann en MK er fyrsti og enn sem komið er eini framhaldsskólinn sem kennir slíkan áfanga á landinu.

Í áfanganum vinna nemendurnir sjálfboðin störf fyrir Kópavogsdeild Rauða krossins í um 1-2 tíma á viku, svo sem starf með ungum innflytjendum, aðstoð við aldraða og langveik börn og stuðning við geðfatlaða. Nemendurnir hafa flokkað föt fyrir fatamarkaðinn í fataflokkunarstöð Rauða krossins og sjá einnig um uppsetningu markaðarins. Nemendurnir vonast til að sjá sem flesta Kópavogsbúa og aðra á markaðnum þar sem hægt er að gera góð kaup og styrkja um leið gott málefni.