Prjónahópurinn pakkar 230 fatapökkum

30. apr. 2008

Í gær var pökkunardagur í sjálfboðamiðstöðinni þar sem sjálfboðaliðar í verkefninu Föt sem framlag pökkuðu prjónaflíkum í fatapakka sem sendir verða til Afríku. Alls pökkuðust 230 fatapakkar og hefur Kópavogsdeild ekki áður sent frá sér jafnmarga pakka í einu. Fötin í pökkunum eru afrakstur prjónavinnu sjálfboðaliðanna síðustu mánaða og eiga þeir svo sannarlega hrós skilið fyrir framtakssemi og dugnað.

Í dag var svo prjónakaffi í sjálfboðamiðstöðinni og fengu sjálfboðaliðarnir þá garn með sér heim til að prjóna ungbarnaföt í fleiri pakka eins og peysur, teppi, húfur og sokka. Einnig fara samfellur, treyjur, handklæði og taubleyjur í pakkana. Prjónakaffi er haldið síðasta miðvikudag hvers mánaðar.

Tilgangurinn með þessu verkefni er að mæta skorti á barnafötum á svæðum þar sem neyð ríkir en í almennum fatasöfnunum berst minnst af barnafötum. Handavinnan miðar að því að draga úr þessum skorti.

Þörfin fyrir Föt sem framlag er því sannarlega fyrir hendi og er kærkomið fyrir Kópavogsdeild Rauða krossins að fá fleiri sjálfboðaliða í hópinn sem hafa gaman af hannyrðum. Áhugasamir eru því eindregið hvattir til að hafa samband við deildina í síma 554 6626 eða á kopavogur@redcross.is.