Vel heppnuð sjálfboðaliðagleði í Kópavogi

6. des. 2011

Kópavogsdeild bauð sjálfboðaliðum sínum í gleði í gærkvöldi í tilefni af alþjóðadegi sjálfboðaliðans sem haldinn er árlega 5. desember. Alls mættu 55 sjálfboðaliðar og makar þeirra. Þeir áttu notalega stund saman yfir góðum veitingum, tónlist, söng og upplestri.

Eins og venjan er þá fengu sjálfboðaliðar viðurkenningu fyrir störf sín fyrir deildina. Að þessu sinni fengu Reynir Guðsteinsson, fyrrum stjórnarmaður, og Laufey Ólafsdóttir í verkefninu Föt sem framlag viðurkenningu. Reynir var stjórnarmaður í 8 ár og hefur einnig tekið þátt í mörgum öðrum verkefnum eins og heimsóknaþjónustu, Göngum til góðs og öðrum átaksverkefnum. Laufey hefur prjónað fyrir deildina síðan árið 1989 þegar verkefnið Föt sem framlag var sett á fót. Hún er lögblind en prjónar enn um 50 húfur á mánuði sem fara í fatapakka til barna í neyð í Malaví.

Auk þeirra fengu söngvinir í Sunnuhlíð viðurkenningu. Tveir hópar af sjálfboðaliðum sjá um söngstundir á mánudögum og fimmtudögum á hjúkrunarheimilinu og hafa gert í yfir 20 ár. Þeir hafa varla misst úr dag og alltaf verið tilbúnir að aðstoða í viðburðum á heimilinu eins og í kirkjuferð á kirkjudegi aldraðra, haustferðum og á aðventugleði í desember. Á mánudögum sjá Hulda Guðmundsdóttir, Þuríður Egilsdóttir og Sigríður Guðmundsdóttir um sönginn og Tómas Ólason og Hannes Baldursson sjá um undirspil. Á fimmtudögum eru það svo Guðrún Árnadóttir, Guðrún L. Guðmundsdóttir og Bragi Óskarsson sem sjá um söngstund fyrir messu.    

[Mynd 2]
Söngvinirnir í Sunnuhlíð hlutu viðurkenningu fyrir sitt starf í þágu deildarinnar.

Að venju var svo boðið upp á fjölbreytta og áhugaverða dagskrá. Fjórir nemendur í Tónlistarskóla Kópavogs spiluðu nokkur lög fyrir gestina, þá komu í heimsókn Sigríður Víðis Jónsdóttir sem las upp úr bók sinni Ríkisfang: Ekkert og sönghópurinn L&B Voices sem söng jólalög. Eftir góða kvöldstund var svo happadrætti og fengu nokkrir heppnir gestir gjafir.

Hefð hefur skapast fyrir því hjá Kópavogsdeild að sjálfboðaliðar geri sér glaðan dag í tilefni af alþjóðadegi sjálfboðaliðans 5. desember og hefur aðsókn jafnan verið góð.